Burynǵy depýtat Nyǵmatýlınniń áýleti atynan Dýbaıda 50-den astam úı satyp alynǵany belgili boldy

Foto: ashyq derekkóz

Burynǵy depýtat Nyǵmatýlınniń áýleti atynan Dýbaıda 50-den astam úı satyp alǵany belgili boldy, dep habarlaıdy qandastar.kz «Azattyq»-qa siltep. 

Qazaqstannyń burynǵy prezıdenti Nursultan Nazarbaevtyń serigi sanalǵan Nurlan Nyǵmatýlın áýletiniń Dýbaıdaǵy múlki áshkere bolyp jatyr.

C4ADS uıymy Azattyqqa bergen derekke qaraǵanda, Dýbaıda Nyǵmatýlınniń áıeli Venera Baımyrzaevanyń atyna 50 shaqty jyljymaıtyn múlik tirkelgen.

Sonyń alǵashqysy – 860 sharshy metrlik vılla. Living Legends dep atalatyn kottedj qalashyǵyndaǵy bul jyljymaıtyn múliktiń quny 670 mln teńgeniń (1,5 mln dollar) aınalasynda.

Sondaı-aq, FAIROOZ degen ǵımaratta Venera Baımyrzaevanyń atyna aýmaǵy 500 sharshy metrlik apartament tirkelgen. C4ADS uıymy onyń naryqtaǵy quny shamamen 850 mln teńgeden (1,9 mln dollar) asatynyn eseptegen.

C4ADS derek bazasynda Baımyrzaeva – Dýbaıdyń ortalyǵynda budan ózge premıým sanattaǵy birneshe páterdiń ıesi dep kórsetilgen. DM MESK kesheninde jalpy quny jarty mlrd teńgedeı (1 mln dollar) eki páter, ROYAL OCEANIC ǵımaratynda 270 mln teńge (600 myń dollar) shamasynda turatyn apartament, REGAL TOWER kesheninde 250 mln teńgeniń (550 myń dollar) páteri, BAHAR kesheninde 150 mln teńgeden (380 myń dollar) qymbat turatyn páter Baımyrzaevanyń atyna jazylǵan.

Oraıy kelgende aıta keteıik, Qazaqstanda Nurlan Nyǵmatýlınniń áıel, bala-shaǵasynyń ıeliginde túrli kompanııalar bar. Áıeli Venera Baımyrzaeva negizinen eldegi jyljymaıtyn múlikteri arqyly kásip jasaıdy.