جاڭالىقتار
ەكس-پرەزيدەنتتەر تۋرالى اقپارات نەگە قۇپيا ساقتالادى?
فوتو: اشىق دەرەككوز
ەكس پرەزيدەنت نۇرسۇلتان نازارباەۆ پەن ونىڭ وتباسى مۇشەلەرىنىڭ دەنساۋلىعى مەن جەكە ءومىرى تۋرالى مالىمەتتەر مەملەكەتتىك قۇپيا سانالاتىن بولدى. 12 جەلتوقساندا پارلامەنت سەناتى ءتيىستى تۇزەتۋ ەنگەن زاڭدى ماقۇلداپ, پرەزيدەنتتىڭ قول قويۋىنا جىبەرگەن بولاتىن, دەپ جازدى qandastar.kz
«مەملەكەتتىك قۇپيالار تۋرالى» زاڭعا بارلاۋشىلىق, قارسى بارلاۋشىلىق, جەدەل-ىزدەستىرۋشىلىك جانە وزگە دە قىزمەتتى مەملەكەتتىك قۇپيالارعا جاتقىزۋدان باسقا, قازاقستان رەسپۋبليكاسى پرەزيدەنتىنىڭ جانە ونىڭ وتباسى مۇشەلەرىنىڭ قاۋىپسىزدىگىن قامتاماسىز ەتۋدىڭ ۇيىمداستىرىلۋى, كۇشتەرى, قۇرالدارى مەن ادىستەرى تۋرالى مالىمەتتەر, قازاقستان رەسپۋبليكاسى پرەزيدەنتىنىڭ دەنساۋلىق جاعدايى مەن جەكە ءومىرى تۋرالى مالىمەتتەر, قازاقستان رەسپۋبليكاسىنىڭ ەكس-پرەزيدەنتتەرىنىڭ جانە ولاردىڭ وتباسى مۇشەلەرى تۋرالى ۇقساس مالىمەتتەردى ەنگىزۋ بويىنشا تولىقتىرۋ ەنگىزىلەدى», – دەلىنگەن قورىتىندىدا.
پارلامەنت سەناتىنىڭ مۇشەسى ايگۇل قاپباروۆا بۇل جاڭا نورما زاڭ جوباسى ماجىلىستە قارالعان كەزدە ەنگىزىلگەنىن ايتتى.
«بۇل دەنساۋلىق تۋرالى دەرەكتەر. قازاقستاندا كەز كەلگەن ازامات جەكە ءومىرىنىڭ قۇپياسىن ساقتاۋعا قۇقىلى. بۇل دەنساۋلىق ماسەلەسىنە, وعان قويىلعان دياگنوزدارعا بايلانىستى. كوپتەگەن ەلدە پرەزيدەنتتەردىڭ دەنساۋلىعى تۋرالى مالىمەتتەر قۇپياعا جاتادى», – دەگەن سەنات دەپۋتاتى.
وسىعان دەيىن مادەنيەت جانە اقپارات ۆيتسە-ءمينيسترى ايزادا قۇرمانوۆا قازاقستاندا نازارباەۆتىڭ اتىنداعى «ەلباسى مەدالىن» الىپ تاستاۋ ازىرگە جوسپارلانباعانىن ايتقان بولاتىن. سەنات سپيكەرى ماۋلەن اشىمباەۆ تا تۇڭعىش پرەزيدەنت نۇرسۇلتان نازارباەۆ اتىنداعى ناگرادانىڭ كۇشىن جويۋ ماسەلەسى ازىرگە كۇن تارتىبىندە جوق ەكەنىن مالىمدەگەن.
ەسكە سالا كەتسەك, 2023 جىلى قاڭتار ايىندا پارلامەنت «قر تۇڭعىش پرەزيدەنتى – ەلباسى تۋرالى» كونستيتۋتسيالىق زاڭنىڭ كۇشi جويىلدى دەپ تانۋ تۋرالى» زاڭدى قابىلدادى. بۇل قۇجات نازارباەۆتى بىرقاتار ارتىقشىلىقتاردان, سونىڭ ىشىندە ەلباسى مارتەبەسىنەن ايىردى.
