بۇرىنعى سۇيىكتىسىن ولتىرمەك بولعان: كۇدىكتى ۇستالدى

ەر ادام ايەلگە پىشاقپەن شابۋىل جاساعان وقيعا 9 ماۋسىمدا بولعان. ءۇش ايدان بەرى دۇكەندە وپەراتور بولىپ جۇمىس ىستەيتىن سالتاناتتىڭ ارىپتەستەرى «كۇيەۋىن ءبىر-ەكى رەت جۇمىسقا كەلگەندە عانا كوردىك, ەرسى مىنەزىن بايقامادىق», – دەيدى,-دەپ حابارلايدى Qandastar.kz

«جەكە تانىس ەمەسپىن. بىراق كۇيەۋىنىڭ كەلىپ جۇرەتىنىنەن حابارىم بار. ىشىمدىك ىشكەنىن دە كورمەپپىن. ال سالتانات جۇمىسىنا جاۋاپتى, اشىق-جارقىن كەلىنشەك. جۇمىستا ەشقاشان ەرسى قىلىق تانىتپادى. وقيعانىڭ ءوزىن بەينەكادردان عانا كوردىم», – دەدى سالتاناتتىڭ ارىپتەسى ناتاليا پاك.

قازىر 33 جاستاعى ايەلدىڭ جاعدايى اۋىر دەپ باعالانعان. دارىگەرلەر ونىڭ موينى قاتتى زاقىمدانعانىن ايتتى.

«جاعدايى تۇراقتى اۋىر, سەبەبى اشىق مويىن جاراقاتى بولىپ تۇر. سوعان بايلانىستى ءبىر جاق قول-اياعى ءالسىز, قوزعالىسى شەكتەلگەن. كەشەندى ەم الىپ جاتىر. اتى-ءجونىن دە ايتا المايمىز», – دەدى اتىراۋ وبلىستىق اۋرۋحاناسىنىڭ نەيروحيرۋرگ دارىگەرى سابىر دەمەگەنوۆ.

كۇدىكتى ايەلگە شابۋىل جاساعان سوڭ وقيعا ورنىنان تايىپ تۇرعان. پوليتسيا قىزمەتكەرلەرى بۇل ىسكە قاتىستى سوت-مەديتسينالىق ساراپتاما تاعايىندالعانىن ايتتى.

«سوت مەديتسينالىق ساراپتاماسى تاعايىندالدى. وزگە اقپارات تەرگەۋ مۇددەسىنە سايكەس جاريالانبايدى», – دەدى قالالىق پوليتسيا باسقارماسىنىڭ باستىعى رۋسلان بايتەنوۆ.

ازىرگە ەر ادامنىڭ مۇنداي قادامعا نە ءۇشىن بارعانىن ەشكىم بىلمەيدى. ال جابىرلەنۋشى ەسىن جيعان. دەگەنمەن دارىگەلەردىڭ ايتۋىنشا, قيمىل-قوزعالىسى قيىن.

كەيىن 1991 جىلى تۋعان ايەل ادامدى ولتىرۋگە وقتالعان 29 جاستاعى كۇدىكتى ۇستالدى.

«اتىراۋ وبلىسى پوليتسيا دەپارتامەنتى قىزمەتكەرلەرىنىڭ كەشەندى جەدەل ىزدەستىرۋ ءىس-شاراسى ناتيجەسىندە ەر ادام اقتاۋ قالاسىندا ۇستالدى. كۇدىكتىگە قاتىستى قىلمىستىق ءىس تەرگەلىپ جاتىر», – دەپ جازىلعان مالىمەتتە.