بۇرىنعى سۇيىكتىسىنەن ۇرلاپ, جاڭا عاشىعىنا سىيلاعان: استانادا Instagram ارقىلى ءبىر قىلمىستىڭ بەتى اشىلدى

فوتو: oceania.ru

Instagram جەلىسىندەگى جازبا استانا تۇرعىنىنىڭ ۇرلانعان زاتىن تابۋعا كومەكتەستى. بۇل تۋرالى qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

پوليتسيانىڭ مالىمەتىنشە, جەدەل ءىس-شارالار بارىسىندا پوليتسيا قىزمەتكەرلەرى ۇرلىققا قاتىسى بار دەگەن كۇدىكپەن 23 جاستاعى استانا تۇرعىنىن انىقتادى. كۇدىكتى بۇرىنعى سۇيىكتىسىنىڭ سەنىمىن پايدالانىپ, ۇيىندە بولعان كەزدە قۇنى 200 مىڭ تەڭگە تۇراتىن “Pandora» بىلەزىگىن ۇرلاپ كەتكەن.

جابىرلەنۋشى بىلەزىگىنىڭ جوعالعانىن ءبىر اپتادان كەيىن, جىگىتتىڭ جاڭا سۇيىكتىسىنىڭ Instagram جەلىسىندە جاريالاعان فوتوسىنان ءوز بۇيىمىن كورگەندە ءبىر-اق بايقاعان. جابىرلەنۋشى فوتوداعى بىلەزىكتىڭ وزىنىكى ەكەنىنە كوز جەتكىزگەن سوڭ بىردەن پوليتسياعا حابارلاسقان.

كۇدىكتى ءوز قىلمىسىن مويىندادى. پوليتسەيلەر بىلەزىكتى زاڭدى يەسىنە قايتاردى.