«بۇرىنعىداي ەمەس»: مۇحتار شاحانوۆتىڭ قازىرگى كۇيىنە الاڭداعان جۋرناليست ۇسىنىس ايتتى

جۋرناليست اسىلحان ماماش ۇلى بۇگىن تۋعان كۇنىن اتاپ ءوتىپ جاتقان اقىن مۇحتار شاحانوۆ جايلى جازبا جاريالادى, دەپ حابارلادى qandastar.kz اقپارات پورتالى turkystan.kz-كە سىلتەپ.

«فەيسبۋكتەن مۇحتار شاحانوۆتىڭ سۋرەتىن كورىپ وتىرمىن (تومەندە تۇر). بۇرىنعىداي ەمەس, قاريا باياۋلاپ قاپتى, بۇگىن 83-كە تولىپتى. 2022 جىلى بيلىك قانداي ويمەن بەرسە دە بۇل كىسىگە “قازاقستاننىڭ ەڭبەك ەرى” اتاعىن دۇرىس بەردى.  كوزى تىرىسىندە بيۋست, الدە ەسكەرتكىش ورناتىپ, كوڭىلىن اۋلاپ قويسا بولعانداي ەكەن, قاشانعى جۇرەر دەيسىڭ. قاريا قيسايىپ قالسا, ەكى تۋماس ەرىم-اي دەيمىز.  اناۋ يليندەر مەن بالانديندەردىڭ دە اتىندا ساراي تۇر ەمەس پە?», — دەدى اسىلحان ماماش ۇلى.

سونداي-اق جۋرناليست اقىندى ازاماتتىق كورسەتكەن كىسى دەپ باعالادى.

«ءار ادامنىڭ قايرات كورسەتەر, كوزگە تۇسەر, ەلگە زور پايداسى تيەر ءساتى بولادى ەكەن. سول ساتتە بۇعىپ قالساڭ – كوپتىڭ ءبىرىسىڭ. مۇحتار شاحانوۆ, اسىرەسە 1987-90 جىلدارى ايرىقشا قايرات كورسەتكەن ادام. سول كەزدەگى قىزمەتى دوكتورلىق  ديسسەرتاتسيا تاقىرىبىنا لايىق. “مۇحتار كوكەم تاماشا” دەپ قۇر جەلپىنە بەرمەي, دۇرىسى مەن بۇرىسىن سالىستىرىپ, وبەكتيۆتى زەرتتەۋ شىعارسا, كىم ەكەنى جارقىراي تۇسەدى. الدە ونداي زەرتتەۋدى بايقاماي قالدىم با?  “مەن بولماسام كورەر ەدىڭدەر” دەپ ۇرساتىن ءسوزىن ەستە ۇستاپ, ونشا جاقتىرىڭقىراماي, سول قىزمەتىن اسىقپاي, سالىستىرىپ قاراپ شىقتىم. سويتسەم حالىققا قىزمەتى قادىرلەنبەگەن سوڭ, كۇيگەننەن ايتادى ەكەن عوي», — دەپ جازدى اۆتور.