«بىلتىرعىدان ساباق العان». بيىل تاجىكستان ونىمدەرىنىڭ جارمەڭكەسىندە «توناۋعا» مۇمكىندىك بەرمەدى

فوتو: استانا قالاسى اكىمدىگى

بيىل دا استانادا تاجىكستان ونىمدەرىنىڭ جارمەڭكەسى ءوتىپ جاتىر. جارمەڭكەدە جاڭا پىسكەن جەمىس-جيدەك, كوكونىس, تابيعي بال, جاڭعاق, كەپتىرىلگەن جەمىس, ءتۇرلى دامدەۋىشتەر جانە ت.ب. بار, دەپ حابارلايدى Qaz365.kz.

جەمىس-جيدەكتىڭ ءتۇر-ءتۇرى دە ەلوردالىقتارعا ارزان باعامەن ساتىلىپ جاتىر. تاجىك اسپازدارى پالاۋ باسىپ, كوپشىلىككە ءتاتتى-دامدىلەرىنەن ءدام تاتقىزدى.

«بۇل جارمەڭكە بيىل وسىمەن ەكىنشى رەت ءوتىپ جاتىر. ءبىز  تاجىكستاننان 1000 توننادان استام اۋىل شارۋاشىلىعى ونىمدەرىن استانالىقتارعا ۇسىنىپ وتىرمىز. سونداي-اق قولونەر بۇيىمدارى ساتىلىمعا شىعارىلعان جانە كونتسەرتتىك باعدارلاما جوسپارلانعان. وسىنداي جارمەڭكەلەر الداعى ۋاقىتتا دا وتەدى دەپ ۇمىتتەنەمىز», – دەدى سوعدى وبلىسى توراعاسىنىڭ  اۋىل شارۋاشىلىعى جونىندەگى ورىنباسارى زاريف ميردادو.

جارمەڭكەنىڭ نەگىزگى ساحناسىندا تاجىكستان مادەنيەت قايراتكەرلەرىنىڭ قاتىسۋىمەن كونتسەرت ۇيىمداستىرىلادى.

ۇيىمداستىرۋشىلار بىلتىرعى قاتەلىكتەن ساباق العان. ويتكەنى وتكەن جىلى تاجىكستان تاۋارلارى قويىلعان جارمەڭكەنى جۇرت تالاپ كەتكەن ەدى.

«تاجىكستاننىڭ جارمەڭكەسىنە بارىپ-كەلدىك. بيىل قاۋىن-قاربىزدى قورشاپ قويىپتى, سوسىن ءوزىمىزدىڭ پوليتسيا وكىلدەرى قوسىمشا قورشاپ تۇر ەكەن. سودان امالسىزدان ساتىپ الۋعا تۋرا كەلدى», «ءبىزدى, استانالىقتاردى ەندى سونشالىقتى جابايى كورمەڭىزدەر, اينالايىندار. بىزدەن اسقان مادەنيەتتى قالا جوق», «ەسەسىنە تاجىك باسشىسىنىڭ نۇرلى ءجۇزى بەينەلەنگەن سۋرەتتەر قورشالماپتى». «ايتپاقشى, قىزىل الماسى ءدامدى ەكەن, ال ۇلتتىق قۋىرشاقتارى بىزدىكىنەن ارزان», «تاجىك ساتۋشىلارىنىڭ بارىندە Kaspi Gold بار ەكەن, ىشتەي «ءاي, ءوزىمىزدىڭ تاجىكتەر مە ەكەن»  دەگەن كۇدىك تە بولدى. بىراق تولەم جاساپ, ساتۋشىعا كورسەتكەنىمدە, كاسپي-گولدىم قازاقشا بولعاسىن, ءار ساتۋشى تەلەفونعا تەسىلە قارادى. ءيا, تاجىكتەردى وسىلاي دا تاڭ قالدىرۋعا بولادى ەكەن», – دەپ جازدى جەلى قولدانۋشىلارىنىڭ ءبىرى.