بىرتىرعى تاسقىن سىناق بولدى: پرەزيدەنت سۋ تاسقىنى تۋرالى پىكىر ءبىلدىردى

فوتو: اقوردا

جالپى, وتكەن جىل وڭاي بولعان جوق, ءتىپتى كۇردەلى جىل بولدى دەۋگە كەلەدى. قازاقستانعا سىرتقى فاكتورلاردىڭ سالقىنى ءتيدى, تابيعات اپاتى دا جوسپارلارىمىزعا اسەر ەتتى. الايدا ءبىز احۋالدى باقىلاۋدا ۇستاپ قانا قويماي, جان-جاقتى رەفورمالارىمىزدى جالعاستىرا الدىق. وسىلايشا, جاسامپازدىق ستراتەگياسى ودان ءارى جۇزەگە اسىرىلىپ جاتىر. بۇل تۋرالى پرەزيدەنت “انا ءتىلى” گازەتىنە بەرگەن سۇحباتىندا ايتتى, دەپ جازادى qandastar.kz.

 – بىلتىرعى تاسقىن ەلىمىز ءۇشىن زور سىناق بولدى. مۇنداي الاپات تاس­قىن قازاقستاندا بۇرىن بولماعان. مەملەكەت وراسان زور قاۋىپتىڭ بەتىن قايتارۋ ءۇشىن شۇعىل شارالار قابىلدادى. ادامدار دەر كەزىندە قاۋىپسىز جەرگە كوشىرىلدى, ولاردىڭ ۋاقىتشا پانالايتىن ورىندارى ازىرلەندى, ماتەريالدىق رەزەرۆتى پايدالانۋعا رۇقسات بەرىلدى. اپاتتان قۇتقارۋ جۇمىستارىنا توتەنشە جاعدايلار مينيسترلىگىنىڭ عانا ەمەس, ىشكى ىستەر جانە قورعانىس مينيسترلىكتەرىنىڭ, ۇلتتىق ۇلاننىڭ جانە باسقا دا قۇرىلىمداردىڭ قىزمەتكەرلەرى, جالپى سانى 63 مىڭعا جۋىق ادام جۇمىلدىرىلدى. سونىڭ ارقاسىندا كوپتەگەن ازاماتتى قۇتقارىپ, امان ساقتاپ قالدىق. ەڭ باستىسى – وسى.

ءبىر ەل, ءبىر حالىق بولىپ, جۇدىرىقتاي جۇمىلا بىلسەك قانا مۇنداي اپاتتاردى ەڭسەرە الاتىنىمىزعا ءبارىمىز كوز جەتكىزدىك. سۋ تاسقىنى كەزىندە ۆولونتەرلەر قوزعالىسىنىڭ الەۋەتى زور ەكەنىن كوردىك. ەلىمىزدىڭ تۇكپىر-تۇكپىرىنەن كەلگەن ەرىكتىلەر قۇتقارۋشىلارعا جاردەمدەستى, گۋمانيتارلىق كومەك ۇيىمداستىرىپ, زارداپ شەككەندەرگە قولداۋ كورسەتتى, — دەدى پرەزيدەنت.

قارعىن سۋدىڭ قارقىنى شىنىمەن دە قاتتى بولدى: ۇيلەر, جولدار, كوپىرلەر, الەۋمەتتىك جانە كوممەرتسيالىق نىساندار ءب ۇلىندى, ءبىراز مال قىرىلدى. بوگەتتەر مەن گيدروتەحنيكالىق قوندىرعىلار سالۋعا ونداعان جىل بويى جەتە كوڭىل بولىنگەندە, اپاتتىڭ سالدارى سونشالىقتى اۋىر بولماس ەدى.