بيۋدجەتكە 130 ملرد پايدا: قۇرىلىس سالاسىن «كولەڭكەدەن» شىعارۋ كەرەك

فوتو: اشىق دەرەككوز

بەلگىلى پوليتولوگ مارات شيبۋتوۆ قۇرىلىس سالاسىنداعى كاسىپكەرلەردىڭ قوسىمشا قۇن سالىعىنان جالتارىپ وتقانىن جازدى, دەپ حابارلايدى qandastar.kz

«ءۆى حولدينگىنە قاراستى دەۆەلوپمەنت, كوستراكشن جىلىنا 1 ملرد تەڭگەسىن سالىققا شىعىندامايدى. ال ولاردىڭ تابىسى جۇزدەگەن ميللياردتى قۇرايتىنىن ەل بىلەدى. قالا قۇرىلىسى كەڭەسىنىڭ ءبىر وتىرىسىندا ءۆى-دىڭ  6 وكىلى ءارتۇرلى جوبامەن 6 رەت كىرگەنى ەسىمدە. تارقاتىپ ايتقاندا, سول ادامدار وزگە فيرما, وزگە تۇرعىن ءۇي كەشەندەرىنە قاتىستى ۇسىنىستاردى ورتاعا سالدى. ءارى قاراي تالداساق, ودان دا كىشى فيرمالار ىسكە قوسىلادى. وسىلايشا, ءبىر قۇرىلىستا جەڭىلدەتىلگەن رەجيمى بار كوپتەگەن فيرمالار جۇمىس ىستەيدى. كىرىس تە «كولەڭكەدە».

بۇل رەتتە ولار مۇنداي اينالىمدار كەزىندە ققس تولەمەيدى. ءبىر ۋاقىتتا قۇرىلىس سالۋشىلاردى ققس-تان بوساتۋ تۇرعىن ءۇيدى قولجەتىمدى ەتۋى كەرەك ەدى, بىراق ءىس جۇزىندە باعا 21 ەسە ءوستى. سونىمەن قاتار قۇرىلىس يندۋسترياسى ەڭ كولەڭكەلى سالالاردىڭ ءبىرى بولىپ قالا بەردى», – دەپ جازعان ارنا اۆتورى.

تەلەگرام ارنادا قازاقستاندا جاڭا سالىق مادەنيەتى قالىپتاسىپ جاتقانى, بىراق ونى اركىم ارقالاي تۇسىنەتىنى جازىلعان. اۆتور «سالىق – اۋىرتپالىق ەمەس, قوعامنىڭ دامۋىنا ۇلەس» ەكەنىن العا تارتقان.

«قۇرىلىستاعى ققس جەڭىلدىگىن الىپ تاستاۋ سەكتوردى كولەڭكەدەن شىعارۋعا جانە بيۋدجەتتى كەمىندە قوسىمشا 130 ملرد تەڭگەمەن قامتۋعا مۇمكىندىك بەرەدى. ال بۇل – 40 جاڭا زاماناۋي مەكتەپ سالۋمەن پاراپار», – دەلىنگەن جازبادا.