چات ارقىلى تانىسىپ, كەزدەسۋگە شاقىرعان: الماتىدا ءۇش جىگىت گەيلەردى ۇرىپ-سوعىپ, اقشا تاپقان

فوتو:Pixabay

الماتىدا ءبىر توپ جىگىت تانىسۋ چاتىندا گەيلەردى ارباپ, كەزدەسۋگە شاقىرىپ, كەيىن توناۋ ارەكەتىن جاساعان. ءۇش جىگىت وسىلايشا بىرنەشە ادامدى الداپ, اقشا تابۋعا تىرىسقان. بۇل تۋرالى Stan.kzاقپارات اگەنتتىگى حابارلايدى.

جۋرناليست ميحايل كوزاچكوۆتىڭ مالىمەتىنشە الماتىدا ءداستۇرلى ەمەس جىنىستىق باعدار وكىلدەرىن توناپ جۇرگەن قاراقشىلار پايدا بولعان.

“وسى جىلدىڭ باسىندا 19 جاستاعى يۋسۋف مۋزاپاروۆ, باكتيەرجون توحتيەۆ پەن 20 جاستاعى يمران حاشاموۆ السىزدەر ارقىلى اقشا تابۋدى ويلاعان. ولار تانىسۋ چاتىن تاۋىپ, وندا ولاردىڭ ءبىرى ءوزىن جالعان ەسىممەن تانىستىرىپ, وزگە جىگىتپەن اڭگىمەلەسكەن. حابارلاما بارىسىندا چاتتاعى جىگىت وزىنە ەر ادامداردىڭ ۇنايتىنىن مويىندادى. سونى پايدالانعان قاسكويلەر ونى بىرگە ۋاقىت وتكىزۋگە, ويىن ويناپ, پيتستسا جەۋگە شاقىرعان. جىگىتتەر ءتىپتى جاڭا تانىستارىنا تاكسي اقىسىن تولەپ بەرەتىنىن ايتقان. ال چاتتاعى جىگىت سول ءتۇنى «اينابۇلاققا» كەلگەن”,- دەلىنگەن جازبادا.

ۇشتىكتىڭ كامەلەتكە تولماعان دوسى ونى قارسى الىپ, ساياباققا اپارادى. كەيىن ولار قوناقتارىن ۇرىپ-سوعىپ, ونىڭ ەكى ۇيالى تەلەفونىن تارتىپ العان. سودان سوڭ وعان تاكسي شاقىرىپ بەرگەن.

“جىگىتتەر سمارتفونداردى لومباردقا تاپسىرىپ, كەلەسى كۇنى وسى ارەكەتتى قايتالادى. ولاردىڭ ءبىرى «گەيلەرگە ارنالعان تانىسۋ» چاتىنىڭ باسقا قوناعىمەن كەزدەستى. وعان دا ءدال بۇرىنعىداي ۇسىنىس ايتىپ تۇزاققا ءتۇسىردى. مۋزاپاروۆ, توحتيەۆ جانە حاشاموۆ كامەلەتكە تولماعان كومەكشىلەرىمەن بىرگە جابىرلەنۋشىنىڭ تەلەفونى مەن نوۋتبۋگىن تارتىپ الىپ, ۇرىپ تاستاعان”, – دەلىنگەن جازبادا.

ءبىر-ەكى كۇننەن كەيىن ۇشەۋى دە انىقتالىپ, قاماۋعا الىندى. ولار تەرگەۋ يزولياتورىندا بولعان كەزدە جابىرلەنۋشىلەرگە زالالدىڭ ورنى تولتىرىلعان. سوندىقتان جابىرلەنۋشىلەر قاراقشىلاردى باس بوستاندىعىنان ايىرماۋدى سۇراعان. ناتيجەسىندە سۋديا نۇرگۇل باتىرحان ەكى قىلمىسكەرگە 5 جىل, ال بىرەۋىنە 3 جىل مەرزىمىندە شارتتى تۇردەگى جازانى تاعايىندادى.