Chat arqyly tanysyp, kezdesýge shaqyrǵan: Almatyda úsh jigit geılerdi uryp-soǵyp, aqsha tapqan

Foto:Pixabay

Almatyda bir top jigit tanysý chatynda geılerdi arbap, kezdesýge shaqyryp, keıin tonaý áreketin jasaǵan. Úsh jigit osylaısha birneshe adamdy aldap, aqsha tabýǵa tyrysqan. Bul týraly Stan.kzaqparat agenttigi habarlaıdy.

Jýrnalıst Mıhaıl Kozachkovtyń málimetinshe Almatyda dástúrli emes jynystyq baǵdar ókilderin tonap júrgen qaraqshylar paıda bolǵan.

“Osy jyldyń basynda 19 jastaǵy Iýsýf Mýzaparov, Baktıerjon Tohtıev pen 20 jastaǵy Imran Hashamov álsizder arqyly aqsha tabýdy oılaǵan. Olar tanysý chatyn taýyp, onda olardyń biri ózin jalǵan esimmen tanystyryp, ózge jigitpen áńgimelesken. Habarlama barysynda chattaǵy jigit ózine er adamdardyń unaıtynyn moıyndady. Sony paıdalanǵan qaskóıler ony birge ýaqyt ótkizýge, oıyn oınap, pıa jeýge shaqyrǵan. Jigitter tipti jańa tanystaryna taksı aqysyn tólep beretinin aıtqan. Al chattaǵy jigit sol túni «Aınabulaqqa» kelgen”,- delingen jazbada.

Úshtiktiń kámeletke tolmaǵan dosy ony qarsy alyp, saıabaqqa aparady. Keıin olar qonaqtaryn uryp-soǵyp, onyń eki uıaly telefonyn tartyp alǵan. Sodan soń oǵan taksı shaqyryp bergen.

“Jigitter smartfondardy lombardqa tapsyryp, kelesi kúni osy áreketti qaıtalady. Olardyń biri «Geılerge arnalǵan tanysý» chatynyń basqa qonaǵymen kezdesti. Oǵan da dál burynǵydaı usynys aıtyp tuzaqqa túsirdi. Mýzaparov, Tohtıev jáne Hashamov kámeletke tolmaǵan kómekshilerimen birge jábirlenýshiniń telefony men noýtbýgyn tartyp alyp, uryp tastaǵan”, – delingen jazbada.

Bir-eki kúnnen keıin úsheýi de anyqtalyp, qamaýǵa alyndy. Olar tergeý ızolıatorynda bolǵan kezde jábirlenýshilerge zalaldyń orny toltyrylǵan. Sondyqtan jábirlenýshiler qaraqshylardy bas bostandyǵynan aıyrmaýdy suraǵan. Nátıjesinde sýdıa Nurgúl Batyrhan eki qylmyskerge 5 jyl, al bireýine 3 jyl merziminde shartty túrdegi jazany taǵaıyndady.