ءبىلىم
«ChatGPT ەمتيحاندى ادامدارعا قاراعاندا جاقسى تاپسىرادى»: زەرتتەۋشىلەر ءبىلىم سالاسىنا قاۋىپ ءتونىپ تۇرعانىن ايتىپ دابىل قاقتى
فوتو: .greenme.it
بريتاندىق عالىمدار جاساندى ينتەللەكتىڭ ۋنيۆەرسيتەت ەمتيحاندارىن ستۋدەنتتەردەن جاقسى تاپسىراتىنىن ايتتى. ايتۋلارىنشا ەمتيحان الۋشىلار جاساندى ميدى شىنايىدان اجىراتا المايدى. بۇل تۋرالى Stan.kz اقپارات اگەنتتىگى BBC ارناسىنا سىلتەمە جاساپ حابارلايدى.
رەدينگ ۋنيۆەرسيتەتىنىڭ زەرتتەۋشىلەرى وز زەرتتەۋلەرى ءۇشىن ChatGPT بوتىن پايدالانعان. ونىڭ كومەگىمەن 33 جالعان «ستۋدەنتتى» قۇراستىرىپ, باكالاۆر دارەجەسىن الۋ ءۇشىن پسيحولوگيادان ەمتيحان تاپسىرۋعا جىبەرگەن.
زەرتتەۋشىلەردىڭ پىكىرىنشە, جالعان «ستۋدەنتتەر» ناعىز ءبىلىم الۋشىلاردان ورتاشا ەسەپپەن جوعارى ۇپاي جيناعان.
ال جاساندى ينتەللەكتپەن جازىلعان ەسسەلەردى شىنايى ادامدار جازعان شىعارمالاردان ايىرۋ مۇمكىن بولماعان. ءتىپتى ولاردىڭ 94 پايىزى تەكسەرۋشىلەردىڭ كۇدىگىن تۋدىرماعان.
زەرتتەۋگە جەتەكشىلىك ەتكەن دوتسەنت پيتەر سكارف پەن پروفەسسور ەتەن روش وسى زەرتتەۋ ارقىلى بۇكىل الەمگە ۇندەۋ تاستاعىسى كەلگەنىن جەتكىزدى.
سكارفتىڭ ايتۋىنشا, جوعارى وقۋ ورىندارىنىڭ ستۋدەنتتەرى ديپلومدىق جۇمىستارىن ءوز قولىمەن جازۋ تاجىريبەسىنەن الشاقتاپ كەتتى. ال مەكتەپ مۇعالىمدەرى جاساندى ينتەللەكتپەن قالاي كۇرەسۋ كەرەگىن ويلاۋى كەرەك دەيدى.
«قولجازبا ەمتيحاندارىنا قايتا ورالۋدىڭ قاجەتى جوق. بىراق جاساندى ينتەلەكتىڭ دامۋىمەن جاھاندىق ءبىلىم بەرۋ سەكتورى وزگەرۋى مۇمكىن», – دەيدى سكارف.
عالىمدار جاساندى زياتتىڭ ءبىلىم بەرۋ پروتسەسىنە اسەر ەتىپ جاتقانىنا الاڭداۋلى. وسىعان وراي گلازگو ۋنيۆەرسيتەتى جاقىندا بەتپە-بەت ەمتيحانداردى قايتا ەنگىزدى.
