ChL: «Qaırat» qaqpashysy týraly ne bilemiz?

Foto: ashyq derekkóz

Almaty fýtbolynda jańa qaharman paıda boldy. «Qaırat» qaqpashysy Temirlan Anarbekov Chempıondar lıgasynyń toptyq kezeńine joldama syılaǵan tarıhı matchtyń basty keıipkeri atandy. 21 jastaǵy qaqpashyny nege jankúıerler qazirdiń ózinde qazaq fýtbolynyń jańa juldyzy dep ataı bastady? Bul týraly qandastar.kz Vesti.kz-ke silteme jasap habarlaıdy.

Shotlandııalyq «Seltıkke» qarsy qarymta oıynda Anarbekov óz sheberligin tolyq kórsetti. Penaltı serııasynda ol qatarynan úsh soqqyny qaıtara bildi. Nátıjesinde «Qaırat» 3:2 esebimen jeńiske jetip, basty eýrokýboktyń toptyq kezeńine shyqty (negizgi ýaqyt – 0:0).

Atyraýdan «Qaırattyń» negizgi quramyna deıin

2003 jyldyń 14 qazanynda Atyraýda týǵan Temirlan alǵashqy fýtbol qadamyn sol qalada jasady. 2017 jyly «Qaırat» akademııasyna aýysyp, 2022 jyly negizgi quramǵa kóterildi. Al 2024 jyly tájirıbe jınaý úshin astanalyq «Jeńiste» jalǵa oınady.

«Seltıkpen» kezdesýde ol kezdeısoq alańǵa shyqty – alǵashqy matchta negizgi qaqpashy Aleksandr Zarýkıı jaraqat alǵan bolatyn. Degenmen, jas oıynshy bul múmkindikti tıimdi paıdalanyp, jankúıerlerdiń júregin jaýlap aldy.

Maýsymdaǵy jetistikteri

2025 jyl Temirlan úshin erekshe maýsym boldy. Barlyq jarystarda ol 11 oıynda alańǵa shyǵyp, nebári 7 gol jiberdi jáne 7 matchta qaqpasyn «qurǵaq» saqtady. Biraq basty erligi – dál «Seltıkke» qarsy oıyn.

Bir kúnde juldyzǵa aınalǵan qaqpashy

Match aldynda onyń Instagram paraqshasynda bar bolǵany eki myńǵa jýyq oqyrman bolsa, oıynnan keıin bul kórsetkish 40 myńǵa jýyqtady. Endi Anarbekov tek «Qaırattyń» oıynshysy ǵana emes, klýbtyń tarıhı jeńisiniń sımvolyna aınaldy.

Bolashaǵy jarqyn qaqpashy

Jasy 21-de bolsa da, Temirlan Anarbekov Qazaqstan fýtbolynyń tarıhyna esimin jazyp úlgerdi. Alda ulttyq quramanyń 2026 jylǵy álem chempıonatyna irikteý oıyndary kútip tur. Jankúıerler jas qaqpashynyń bul deńgeıde de ózin dáleldeı alatynyna senimdi.