جاڭالىقتار
Comic Con Astana-2025: سكوتت ەدكينس جانكۇيەرلەرىمەن كەزدەستى
فوتو: سسا
Comic Con Astana-2025 ءۇشىنشى كۇنى باس ساحنادا گولليۆۋد اكتەرى, جەكپە-جەك شەبەرى سكوتت ەدكينس جانكۇيەرلەرىمەن كەزدەستى, دەپ جازدى qandastar.kz
گولليۆۋد جۇلدىزدارى, اتاقتى كوسپلەيەرلەر, ميلليوننان استام وقىرماندارى بار بلوگەرلەر, بەينە ويىندار, مانگا, كوميكستەر جانە ت.ب. – وسىنىڭ ءبارىنىڭ ارقاسىندا Comic Con Astana-2025 ءتۇرلى ەلدەردەن كەلگەن ءارتۇرلى جاستاعى ادامداردىڭ باسىن قوسقان ورتاعا اينالدى. العاشقى ەكى كۇننىڭ وزىندە فەستيۆالدىڭ ەكى الاڭىنا 29 000-عا جۋىق ادام كەلدى. ءۇشىنشى كۇننىڭ جۇلدىزدى قوناعى گولليۆۋد اكتەرى سكوتت ەدكينس بولدى.
سكوتت ەدكينسءتى جانكۇيەرلەر «نەوسپوريمىي» فيلمدەر سەرياسىنداعى يۋري بويكو ءرولى, سونداي-اق «دجون ۋيك 4», «دوكتور سترەندج», «يپ مان 4» فيلمدەرىندەگى رولدەرى ارقىلى بىلەدى.
جانكۇيەرلەرىمەن كەزدەسۋدە ول ءبىرىنشى كەزەكتە استاناداعى Comic Con فەستيۆالىنىڭ باسقا ەلدەردەگى وسىنداي ءىس-شارالارمەن سالىستىرعاندا تاماشا ۇيىمداستىرىلىپ جاتقانىن اتاپ ءوتتى. سونىمەن قاتار ول استانا تۋرالى دا جىلى پىكىر ءبىلدىردى:
«قالا وتە ادەمى. ماعان كورىكتى جەرلەر, مۋزەيلەردى كورسەتىپ, شاعىن تۋر ۇيىمداستىردى, سوسىن مەيرامحاناعا باردىق. مۇنداعى تاعامدار دا وتە ءدامدى. ماعان سونداي-اق ادامداردىڭ مەنى قالاي قارسى العانى قاتتى ۇنادى».
جانكۇيەرلەر اكتەردەن سۇيىكتى فيلمدەرى مەن كوميكستەرى تۋرالى, ول سومداعان جانە سومداعىسى كەلەتىن كەيىپكەرلەر تۋرالى سۇرادى. اكتەر «نەوسپوريمىي» فيلمىندەگى يۋري بويكو رولىنە ەرەكشە نازار اۋداردى جانە بۇل ءرولدى سكوتت ەدكينس ءۇشىن «كينو الەمىنە جول اشقان كەيىپكەر» دەپ اتادى.
«مەن استاناعا ۇشىپ كەلگەندە, اۋەجايدا سوققىنىڭ كۇشىن انىقتايتىن اپپارات بولدى. ال قۇرىلعىنىڭ جان-جاعىندا يۋري بويكونىڭ سۋرەتى جاپسىرىلعان ەكەن. مەن بۇل سۋرەتتەردى كورىپ: «قۇدايىم-اۋ, بۇل مەن عوي!» دەدىم. شىنىمدى ايتسام, بويكو تەك ز ۇلىم ادام عانا ەمەس, ول اردىڭ ادامى. مەن ونى مىقتى كۇرەسكەر رەتىندە كورسەتىپ قانا قويماي, ونىڭ مىنەزىن تولىق اشىپ كورسەتۋگە تىرىستىم», – دەپ اتاپ ءوتتى سكوتت ەدكينس.
