Comic Con Astana-2025: جۇلدىزدى حەدلاينەرلەر فەستيۆالدان العان اسەرىن ءبولىستى

 فوتو: سسا

ورتالىق ازياداعى ەڭ ءىرى پوپ-مادەنيەت فەستيۆالى Comic Con Astana-2025-ءتىڭ ءۇشىنشى كۇنى ميلليونداعان وقىرمانى بار بلوگەرلەرمەن, تانىمال كوسپلەي شەبەرلەرىمەن كەزدەسۋلەرمەن جانە گولليۆۋد جۇلدىزدارىنىڭ استانادا كينو ءتۇسىرۋ تۋرالى ۇسىنىستارىمەن ەستە قالدى, دەپ جازدى qandastar.kz

فەستيۆالدىڭ باستى قوناقتارى – گولليۆۋد جۇلدىزدارى ەساي مورالەس پەن سكوتت ەدكينس ءباسپاسوز كونفەرەنتسياسىن وتكىزىپ, جانكۇيەرلەرگە قولتاڭبا بەردى. ال تانىمال بلوگەر Qewbite فاناتتاردىڭ سۇراقتارىنا جاۋاپ بەردى. تاجىريبەلى جانە ەرەكشە الەمگە ەندى عانا قادام باسقان كوسپلەيشىلەر حالىقارالىق بايقاۋدىڭ ىرىكتەۋ كەزەڭىنە قاتىستى.

«بارىس ارەنا» مۇز سارايىنىڭ باس ساحناسىندا YouTube جۇلدىزى ۆلاديسلاۆ كاششەنكو, ياعني Qewbite  كورەرمەندەردى تامساندىردى.

قىسقا ۋاقىتتا ول استانا مەن Comic Con Astana-2025 فەستيۆالى تۋرالى ءوز اسەرىمەن ءبولىستى.

«استانا – بۇل كەڭىستىك, بۇل تازا اۋا مەن سامال جەل. مۇندا اينالانىڭ ءبارى جاسىل. مەنىڭ تۋعان قالام تاگانروگتا دا اعاش كوپ, بىراق استانادا ءبارى ەرەكشە كورىنەدى. اسپانى كەڭ, اشىق ءارى ادەمى. ادامدارى وتە سىپايى ءارى قورشاعان ورتاعا قۇرمەتپەن قارايدى. فەستيۆالدىڭ ۇيىمداستىرىلۋى جوعارى دەڭگەيدە, مەن باسقا قالالارداعى Comic Con-دا دا بولدىم, بىراق مۇنداعى اتموسفەرا وتە كەرەمەت دەپ ايتا الامىن, – دەدى Qewbite.

فەستيۆالدىڭ ءۇشىنشى كۇنىندەگى جارقىن ساتتەردىڭ ءبىرى – ەكى باستى حەدلاينەردىڭ ءباسپاسوز كونفەرەنتسياسى بولدى. ولار باق وكىلدەرىنىڭ ساۋالدارىنا جاۋاپ بەردى.

• ەساي مورالەس – 40 جىلدىق تاجىريبەسى بار گولليۆۋد جۇلدىزى («وزارك», «تيتانى», «ميسسيا نەۆىپولنيما», «لا بامبا»).
• سكوتت ەدكينس – اكتەر جانە جەكپە-جەك ونەرىنىڭ شەبەرى ( «نەوسپوريمىي» فيلمدەرىنىڭ سەرياسى, «دجون ۋيك 4», «دوكتور سترەندج», «يپ مان 4»).

ەساي مورالەس استانادا قانداي فيلم تۇسىرگىسى كەلەتىنىن دە ايتىپ بەردى.

«مۇمكىن, بۇل كىمنىڭ كىم ەكەنىن انىقتايتىن تىڭشىلىق جايلى فيلم بولار. مۇندا ءتۇرلى مادەنيەتتەر, يدەيالار, ەۋروپا مەن ازيادان كەلگەن ادامدار توعىسادى. فيلم ءتۇسىرۋ ارقىلى بۇل قالانى تانىپ, زەرتتەۋ وتە قىزىق بولار ەدى. ەگەر مەن وسىندا كينو تۇسىرسەم, بۇل تىڭشىلىق پەن رومانتيكالىق كومەديا جانرىنداعى تۋىندى بولار ەدى», – دەدى اكتەر.

سكوتت ەدكينس قازاقستاندا فيلمگە ءتۇسۋدى قالايتىنىن  جاسىرمادى. سونداي-اق ول بايتەرەكتە تىلەك تىلەگەنىن, ال ەگەر ول ورىندالسا, استاناعا قايتا ورالىپ, ونى مىندەتتى تۇردە بولىسۋگە ۋادە ەتتى.

«مەن بۇل اسەم قالانى كوردىم. ماعان كورىكتى جەرلەر مەن مۇراجايلاردى قامتيتىن شاعىن ەكسكۋرسيا ۇيىمداستىردى. ءبىز مەيرامحانادا بولدىق. ايتپاقشى, مۇندا تاعامدار وتە ءدامدى. ماعان ادامداردىڭ جىلى قارسى الۋى, قوناقجايلىعى  قاتتى ۇنادى», – دەدى سكوتت ەدكينس.

فەستيۆالدىڭ ءۇشىنشى كۇنىندە جالپى جۇلدە قورى 15 ميلليون تەڭگەنى قۇرايتىن حالىقارالىق كوسپلەي بايقاۋىنىڭ كەزەكتى ىرىكتەۋ كەزەڭى ءوتتى. «بارىس ارەنا» باستى ساحناسىندا تانىمال كاسىبي كوسپلەيشىلەر مەن جاڭا قاتىسۋشىلار ۆيدەوويىندار, كوميكستەر, مانگا, انيمە جانە تانىمال فيلمدەر كەيىپكەرلەرىنىڭ وبرازدارىن ۇسىندى.

وسى ۋاقىتتا فەستيۆال اياسىنداعى قاراما قارسى الاڭ – «استانا ارەنا» سپورت كەشەنىندە گەيمەرلەر, ازيالىق پوپ-مۋزىكانىڭ جانكۇيەرلەرى, مانگا مەن انيمە فاناتتارى ارنايى تاقىرىپتىق ايماقتاردا باس قوستى. مۇندا ءستيلدى فوتوايماقتار, رەترو-ويىندار ۇسىنىلعان ويىن ايماعى, ەركىن بيلەۋگە ارنالعان Just Dance ساحناسى, Tekken تۋرنيرىنە ارنالعان الاڭ جانە باسقا دا قىزىقتى ورىندار قامتىلدى.

اۆتورلار اللەياسىندا جانە جارمەڭكە ايماعىندا ءارتۇرلى جانردا جۇمىس ىستەيتىن 150-دەن استام قازاقستاندىق سۋرەتشى مەن قولونەر شەبەرى ءوز تۋىندىلارىن ۇسىندى.

بيىل شارا 9-13 شىلدە ارالىعىندا ءوتىپ جاتىر جانە وعان 75 000-نان استام قوناق كەلەدى دەپ كۇتىلۋدە, ونىڭ كەمىندە 10 000-ى – شەتەلدىك تۋريست.

Comic Con Astana-2025 فەستيۆالى استانا قالاسى اكىمدىگى مەن «Astana Tourism» ءتۋريزمدى دامىتۋ ورتالىعىنىڭ قولداۋىمەن وتۋدە.