COVID-19: ەلىمىزدەگى مودۋلدىك اۋرۋحانالار قالاي جۇمىس ىستەپ تۇر

2020 جىلدىڭ ناۋرىزىندا دۇنيەجۇزىلىك دەنساۋلىق ساقتاۋ ۇيىمى كوروناۆيرۋستىق ينفەكتسيا پاندەمياسىن جاريالادى. قر ۇكىمەتى دەنساۋلىق ساقتاۋ جۇيەسىنىڭ رەزەرۆتىك قۋاتىن كەڭەيتۋ جانە COVID-19 ىندەتىمەن كۇرەستە شۇعىل كومەك كورسەتۋ ءۇشىن جاڭا مەديتسينالىق مەكەمەلەردى جەدەل تۇرعىزۋ قاجەتتىگى تۋرالى شەشىم قابىلدادى. وسىلايشا ەلىمىزدىڭ ءىرى قالالارىندا 16 مودۋلدىك اۋرۋحانا سالىندى.

اۋرۋحانالار مەن ورتالىقتار زاماناۋي كومپيۋتەرلىك توموگرافيا, رەنتگەن, ۋلترادىبىستىق اپپاراتتارمەن, قۋاتتى زەرتحانامەن جانە تاعى باسقا مەديتسينالىق قۇرالدارمەن جابدىقتالدى. بۇعان دەيىن الماتىدا 300 ورىندىق ەڭ قۋاتتى جىلدام سالىناتىن مودۋلدىك اۋرۋحانانىڭ پايدالانۋ مەرزىمى 50 جىلعا جەتەتىنى تۋرالى حابارلانعان ەدى.

جالپى العاندا الماتىدا ەكى مەديتسينالىق مەكەمە, ال استانا, كوكشەتاۋ, اتىراۋ, قۇلسارى, تالدىقورعان, ورال, قوستاناي, قىزىلوردا, اقتاۋ, پاۆلودار, پەتروپاۆل, جەزقازعان, تۇركىستان جانە شىمكەنت قالاسىندا ءبىر اۋرۋحانا (ورتالىق) سالىندى.

كوروناۆيرۋس قاۋپىنىڭ بەتى قايتقان سوڭ ورىندار بوسادى, سوندىقتان تەز سالىناتىن مودۋلدىك اۋرۋحانالار مەن ورتالىقتاردىڭ كوپشىلىگى قالالىق مەديتسينالىق مەكەمەلەرگە بەرىلدى. دەنساۋلىق ساقتاۋ مينيسترلىگى كەزىندە جەدەل سالىنعان 16 اۋرۋحانانىڭ تەك ەكەۋى, ياعني اتىراۋ مەن قۇلسارى قالاسىنداعى اۋرۋحانا ۋاقىتشا جابىلعانىن حابارلاپ وتىر.

كوكشەتاۋدا اۋرۋحانا 42 ينفەكتسيالىق جانە 46 پاللياتيۆتىك توسەككە اۋىستىرىلعان, قازىر «كوكشەتاۋ كوپسالالى قالالىق اۋرۋحاناسى» مكك ينفەكتسيالىق اۋرۋلار ورتالىعى دەپ اتالادى.

تالدىقورعاندا اۋرۋحانا وبلىستىق ينفەكتسيالىق اۋرۋحانا رەتىندە جۇمىس ىستەپ تۇر.

ورال قالاسىندا سالىنعان اۋرۋحانا بۇگىندە قىزىلشامەن اۋىراتىن ناۋقاستارعا ارنالعان 100 ينفەكتسيالىق توسەك-جايعا, برونح-وكپە اۋرۋلارى بار ناۋقاستارعا ارنالعان 50 وڭالتۋ ورنىنا, توتەنشە جاعداي كەزىندە 30 كارانتيندىك جانە 20 توسەك-جايعا اۋىستىرىلعان.

قوستانايدا جۇقپالى اۋرۋلار اۋرۋحاناسىن ورنالاستىرۋعا ارنالعان مودۋلدىك كەشەن «قوستاناي وبلىستىق بالالار اۋرۋحاناسى» كمك-گە ۋاقىتشا پايدالانۋعا بەرىلدى. تولىق قۋاتتا جۇمىس ىستەيدى.

قىزىلورداداعى جىلدام سالىناتىن مودۋلدىك اۋرۋحانا «قىزىلوردا وبلىستىق ونكولوگيالىق ورتالىعى» شجق كمك بالانسىنا بەرىلدى. ورتالىقتىڭ قۋاتى 205 توسەككە دەيىن ۇلعايتىلدى.

اقتاۋداعى مودۋلدىك اۋرۋحانا «ماڭعىستاۋ وبلىستىق كوپبەيىندى اۋرۋحانا» شجق مكك بالانسىنا بەرىلگەلى جاتىر.

پاۆلودارداعى مودۋلدىك اۋرۋحانا «ع. سۇلتانوۆ اتىنداعى پاۆلودار وبلىستىق اۋرۋحاناسى» كمك ينفەكتسيالىق بولىمشەسى رەتىندە جۇمىس ىستەيدى.

پەتروپاۆلداعى «وبلىستىق فتيزيوپۋلمونولوگيا ورتالىعى» شجق كمك مودۋلدىك اۋرۋحاناسى «ءبىرىنشى قالالىق اۋرۋحانا» شجق كمك جانە «كوپبەيىندى وبلىستىق بالالار اۋرۋحاناسى» شجق كمك بالانسىنا بەرىلدى. تولىق قۋاتتا جۇمىس ىستەيدى.

تۇركىستانداعى 200 توسەك-ورنى بار جىلدام سالىنعان مودۋلدىك جۇقپالى اۋرۋلار اۋرۋحاناسى قالالىق اۋرۋحاناعا اينالدى.

«جەزقازعان قالاسىنىڭ وبلىستىق كوپسالالى اۋرۋحاناسى» شجق كمك-عا جاتاتىن جەزقازعان اۋرۋحاناسى 35 توسەك-ورىن ينفەكتسيالىق ورتالىعى 15 توسەك-جاي تەرى-ۆەنەرولوگيالىق بولىمشە جانە 33 توسەك-ورنى پەدياتريالىق بولىمشە رەتىندە جۇمىس ىستەۋدە.

الماتىدا قۋاتى 280 جانە 300 بولاتىن ەكى جىلدام سالىناتىن مودۋلدىك ينفەكتسيالىق اۋرۋحانا الماتى دسب «مگكيب» شجق كمك بالانسىندا. ەكەۋىدە تولىق قۋاتتا جۇمىس ىستەيدى.

استاناداعى قالالىق ينفەكتسيالىق ورتالىق استانا قالاسى اكىمدىگىنىڭ «كوپسالالى مەديتسينالىق ورتالىق» شجق مكك بالانسىنا بەرىلدى جانە پاللياتيۆتىك بولىمشە رەجيمىندە جۇمىس ىستەيدى.

شىمكەنتتەگى «اسار» مودۋلدىك ينفەكتسيالىق ورتالىعى قايتا قارالىپ, «قالالىق بالالار كلينيكالىق اۋرۋحاناسى» شجق مكك بالانسىنا بەرىلدى. قازىر وندا بالالارعا ارنالعان سوماتيكالىق توسەك-جاي ورنالاستىرىلعان.