دايىن «ءونىمدى» ءوز «ءدىنىنىڭ» پيارىنا پايدالانىپ جاتقانىنا ءمان بەرمەيمىز…

فوتو: اشىق دەرەككوزدەن

الەۋمەتتىك جەلى قولدانۋشىلارى وليمپيادا ويىندارىنا قاتىسۋشى سپورتشىلاردىڭ ءسوز ساپتامىنان سەكەم الىپ جاتىر, ولاردىڭ نانىم-سەنىمى جايلى سىن پىكىرلەردە ايتىلدى دەپ حابارلايدى Qandastar.kz Ulysmedia.kz سىلتەمە جاساپ.

«قابا ساقال , قىرما مۇرت قاۋىم باۋىرىنا باسىپ العان…»

جۋرناليست ەربول جانات ۇلى ەلدوس سمەتوۆتىڭ «وليمپيادا چەمپيونى بولۋ تاعدىرىما جازىلعان ەكەن» دەگەنىنە ول چەمپيون بولعان سوڭ كوپشىلىك ۇندەمەگەنىن, قوعام اتاعى مەن بيلىگى بار ادامدى سىناي المايتىنىن جازدى.

«اسلانبەك جەڭىلىپ قالعاندا «اللاھتىڭ قالاۋى سولاي بولدى» دەدى. سىنادىق. سەبەبى ءبىزدىڭ سانامىز ءالسىز بەن جەڭىلگەندەردى تاپتاپ ءوتىپ, ۇستىنە جۋىندى قۇيىپ كەتۋگە بەيىم. تانىمال سپورتشىلاردى «قابا ساقال, قىرما مۇرت» قاۋىم قۇشاعىنا باسىپ العانى ەشكىمدى الاڭداتپايدى. مەملەكەتتىڭ, سالىق تولەۋشىلەردىڭ قارجىسىمەن بالا كەزدەن باپتالىپ, بيىككە جەتكەن سپورتشى — حالىق وكىلى, حالىق پەرزەنتى. ونداي دايىن «ءونىمدى» بەكبولات, مۇحامەتجاندار ءوز «ءدىنىنىڭ» پيارىنا پايدالانىپ جاتقانىنا ءمان بەرمەيمىز», – دەپ جازدى جۋرناليست.

سپورتشى ءدىني يدەولوگيالارىن قورعاۋعا مۇقتاج…

ونىڭ سوزىنشە بۇل — جاس سپورتشىلارعا جاسىرىن مەسسەدج.

«ءبىزدىڭ دىندەگىلەر عانا وسىنداي جەتىستىككە جەتەدى» دەگەن ىم. «مىقتىلاردىڭ ءبارى ءبىزدىڭ قاتارىمىزدا!» دەگەن يشارا. ال, سپورتشى — كوبىنە مۇندايلاردىڭ ارا-جىگىن اجىراتا الاتىن سانا يەسى بولمايدى. سپورتشى — كوپ شىنىققان دەنە, تاسىلدەردى كوپ قايتالاپ, باپتالعان ءتان يەسى. ونىڭ 24 ساعاتىنىڭ كوپ بولىگى فيزيكالىق دايىندىققا جۇمسالعان. سپورتشى — ءدىني يدەولوگيالاردان قورعاۋعا مۇقتاج ادام! جات ءدىني يدەولوگيادان ءبارىمىزدى قورعاۋشى — مەملەكەت!», – دەپ جازدى ەربول جانات ۇلى.

تاعى ءبىر جەلى قولدانۋشىسى بوكستان كوماندا كاپيتانى اسلانبەك شىمبەرگەنوۆتىڭ جۋرناليستەرگە بەرگەن جاۋابىن مىسە تۇتپادى. باس باپكەرگە بازىناسىن جەتكىزدى.

«اينالايىن, مىرزاعالي باۋىرىم, ايتتىم عوي, «قارسىلاسىنىڭ قولىندا ولۋگە دايىن, كوزىنەن وت شاشىپ تۇرعان جىگىتتەردى اپارماساڭ, جەڭىستىڭ اۋىلى الىس» دەپ? نە دەپ تۇر مىنا كاپيتان ءوزىنىڭ جىگەرسىزدىگىن قۇدايعا جاۋىپ?!», – دەپ جازدى ومىرزاق اقجىگىت.

«كاسىبي سپورتشىنىڭ ءسوزى»…

بلوگەر ارشات ورازوۆ ءابيبا ابۋجاقىنوۆانىڭ سوزدەرىنە نازار اۋدارعان. بالۋان قىزدىڭ ءوز ارەكەتىنە كاسىبي باعا بەرگەنىن ايتادى.

«ءابيبانىڭ جەڭىلىستەن كەيىنگى سوزدەرىن ەستىدىڭىز بە? ەشقانداي اللا, ءدىن, دۇعا, قولداۋ ەمەس, ناقتى سەبەپتەرىن ايتتى. پروفي سپورتشىنىڭ سوزدەرى. ءوزىنىڭ كەم تۇستارىن, جاراقاتىن, قارسىلاستىڭ ىڭعايسىزدىعى مەن ونىڭ جاراقات تۇسىن جاقسى پايدالانعانىن ايتتى. ءوزىنىڭ كەمشىلىگىن دە, قارسىلاستىڭ مىقتىلىعىن دا جاقسى ءبىلىپ تۇر. ناعىز سپورتشىنىڭ سوزدەرى!», — دەپ جازدى ول.