Daıyn «ónimdi» óz «dininiń» pıaryna paıdalanyp jatqanyna mán bermeımiz…

Foto: ashyq derekkózden

Áleýmettik jeli qoldanýshylary Olımpıada oıyndaryna qatysýshy sportshylardyń sóz saptamynan sekem alyp jatyr, olardyń nanym-senimi jaıly syn pikirlerde aıtyldy dep habarlaıdy Qandastar.kz Ulysmedia.kz silteme jasap.

«Qaba saqal , qyrma murt qaýym baýyryna basyp alǵan…»

Jýrnalıst Erbol Janatuly Eldos Smetovtiń «Olımpıada chempıony bolý taǵdyryma jazylǵan eken» degenine ol chempıon bolǵan soń kópshilik úndemegenin, qoǵam ataǵy men bıligi bar adamdy synaı almaıtynyn jazdy.

«Aslanbek jeńilip qalǵanda «Allahtyń qalaýy solaı boldy» dedi. Synadyq. Sebebi bizdiń sanamyz álsiz ben jeńilgenderdi taptap ótip, ústine jýyndy quıyp ketýge beıim. Tanymal sportshylardy «qaba saqal, qyrma murt» qaýym qushaǵyna basyp alǵany eshkimdi alańdatpaıdy. Memlekettiń, salyq tóleýshilerdiń qarjysymen bala kezden baptalyp, bıikke jetken sportshy — halyq ókili, halyq perzenti. Ondaı daıyn «ónimdi» Bekbolat, Muhametjandar óz «dininiń» pıaryna paıdalanyp jatqanyna mán bermeımiz», – dep jazdy jýrnalıst.

Sportshy dinı ıdeologııalaryn qorǵaýǵa muqtaj…

Onyń sózinshe bul — jas sportshylarǵa jasyryn messedj.

«Bizdiń dindegiler ǵana osyndaı jetistikke jetedi» degen ym. «Myqtylardyń bári bizdiń qatarymyzda!» degen ıshara. Al, sportshy — kóbine mundaılardyń ara-jigin ajyrata alatyn sana ıesi bolmaıdy. Sportshy — kóp shynyqqan dene, tásilderdi kóp qaıtalap, baptalǵan tán ıesi. Onyń 24 saǵatynyń kóp bóligi fızıkalyq daıyndyqqa jumsalǵan. Sportshy — dinı ıdeologııalardan qorǵaýǵa muqtaj adam! Jat dinı ıdeologııadan bárimizdi qorǵaýshy — memleket!», – dep jazdy Erbol Janatuly.

Taǵy bir jeli qoldanýshysy bokstan komanda kapıtany Aslanbek Shymbergenovtiń jýrnalısterge bergen jaýabyn mise tutpady. Bas bapkerge bazynasyn jetkizdi.

«Aınalaıyn, Myrzaǵalı baýyrym, aıttym ǵoı, «qarsylasynyń qolynda ólýge daıyn, kózinen ot shashyp turǵan jigitterdi aparmasań, jeńistiń aýyly alys» dep? Ne dep tur myna kapıtan óziniń jigersizdigin Qudaıǵa jaýyp?!», – dep jazdy О́mirzaq Aqjigit.

«Kásibı sportshynyń sózi»…

Bloger Arshat Orazov Ábıba Ábýjaqynovanyń sózderine nazar aýdarǵan. Balýan qyzdyń óz áreketine kásibı baǵa bergenin aıtady.

«Ábıbanyń jeńilisten keıingi sózderin estidińiz be? Eshqandaı Alla, din, duǵa, qoldaý emes, naqty sebepterin aıtty. Profı sportshynyń sózderi. О́ziniń kem tustaryn, jaraqatyn, qarsylastyń yńǵaısyzdyǵy men onyń jaraqat tusyn jaqsy paıdalanǵanyn aıtty. О́ziniń kemshiligin de, qarsylastyń myqtylyǵyn da jaqsy bilip tur. Naǵyz sportshynyń sózderi!», — dep jazdy ol.