«دالادا جاتقان يت ەمەس, ادام عوي»: اقتوبەلىك تۇرعىن اعاسىن ۇيسىزدەر زيراتىنا جەرلەپ تاستاعان پوليتسەيلەردى جازالاۋدى سۇرايدى

فوتو: جانات يمانعاليەۆانىڭ جەكە مۇراعاتىنان

اقتوبەدە پوليتسەيلەر امان جاقاەۆتىڭ مەرت بولعانىن جاقىندارىنا 2,5 ايدان بەرى حابارلاماعان. ونىڭ ۇستىنە ەر ادامنىڭ دەنەسىن اتى-ءجونى جازىلمايتىن ۇيسىزدەردىڭ زيراتىنا جەرلەپ تاستاعان. مارقۇمنىڭ قارىنداسى وقيعاعا قاتىستى جاسىرىن نارسە بار دەپ كۇدىكتەنەدى,  دەپ جازادى qandastar.kz Stan.kz-كە سىلتەمە جاساپ. 

اقتوبەلىك جانات يمانعاليەۆا ماۋسىمنان بەرى اعاسىن تاپپاعان. سوزىنشە, سوڭعى رەت 15-16 ماۋسىمدا ونىمەن جولىققان, سول كەزدە تەلەفونىن جوعالتىپ العانىن, ەندى ۇيالى تەلەفونسىز جۇرە تۇراتىنىن ەسكەرتىپ كەتىپتى.

“اعام قۇرىلىسشى بولعاسىن ادەتتەگىدەي تاپسىرىس بويىنشا كەتتى دەپ ويلادىق. ونىڭ ۇستىنە تەلەفونى جوق. بىراق ۇزاق بايلانىسقا شىقپاعاندىقتان, ۋايىمداي باستادىم. قىركۇيەكتىڭ 11-ءى پوليتسياعا جۇگىنىپ, اعامدى تابا الماي جۇرگەنىمدى ايتتىم. ۋچاسكەلىك پوليتسەي اعامنىڭ اتى-ءجونىن ايتقان سوڭ, فوتوسىن كورسەتتى دە, ونىڭ مەرت بولىپ كەتكەنىن ايتتى. وسى ساتتە توبەمە جاي تۇسكەندەي بولدى”, – دەدى مارقۇمنىڭ قارىنداسى.

پوليتسەيلەردىڭ جانات يمانعاليەۆاعا تۇسىندىرگەنى بويىنشا 26 ماۋسىمدا ول ەكى دوسىمەن قارعالى وزەنىندە ۋاقىت وتكىزىپ, سۋعا باتىپ كەتكەن. ايتۋلارىنشا, سول كەزدە ەر ادام ماس كۇيدە بولىپ, سۋعا سەكىرىپتى.

“دوستارى پوليتسياعا “سۋعا سەكىردى دە, شىقپاي قالدى” دەپتى. سوسىن ولار پوليتسيا شاقىرعان, پوليتسيا تجد-نى شاقىرىپتى. كەيىن ەكى ادامنان جاۋاپ الىنعان. كەيىن ءىس تىنىش جابىلعان عوي. اعامنىڭ دەنەسى 2,5 اي ءمايىتحانادا بولدى”, – دەدى يمانعاليەۆا.

ول ەكى كۋانىڭ جاۋاپتارىنا كۇمانمەن قارايدى. سەبەبى ەكەۋى ءبىپ-بىردەي ۇلگىمەن تۇسىنىكتەمە جازىپ بەرگەن, ولار دايىن جازىلعان قاعازعا قول قويا سالدى ما دەگەن كۇدىك بار.

27 ماۋسىمدا ەر ادامنىڭ دەنەسىنە سوت-مەديتسينالىق ساراپتاما جۇرگىزىلگەن.

“ادام ءولىمى اسفيكسيا سالدارىنان, ياعني وكپەگە سۋ جينالىپ, اۋا جەتپەگەننىڭ كەسىرىنەن بولدى”, – دەلىنگەن قورىتىندىدا.

6 قىركۇيەكتە ولار امان جاقاەۆتىڭ دەنەسىن ”براتسكايا موگيلا” دەپ اتالاتىن كىرپىشتى اۋدانىنداعى ۇيسىزدەرگە ارنالعان زيراتقا جەرلەپ تاستاعان.

اقتوبەلىك كەلىنشەك پوليتسەيلەردىڭ مارقۇمنىڭ تۋىستارىن ىزدەمەگەنىنە جانە ولارعا حابارلاماعانىنا نارازى. ايتۋىنشا, ۋچاسكەلىك پوليتسەي اعاسىن جاقسى تانىعان. ياعني ونىڭ قۇرىلىسپەن اينالىساتىنىن بىلگەن.

“نە سەبەپتى 3 ايدان بەرى تىنىش وتىردى? ولار امان اعامنىڭ جيليانكادا تۇرعانىن ءبىلدى, سەبەبى بىرەۋى “مەن ول اعانى بىلەمىن” دەگەن ەدى. بىلسە, نەگە حابارلامايدى? پوليتسيا بولىمشەسى مەن ءۇيىمىزدىڭ اراسى 2-اق ايالداما. ءتىپتى اعامدى بىلمەسە دە, وپ-وڭاي تاۋىپ الۋعا بولادى. ء“بىز سىزدەرگە باردىق, بولمادىڭىزدار” دەيدى. سوندا 3 اي تاپپادى ما نەمەسە حابارلاما جىبەرىپ, حات تاستاپ كەتۋگە بولمادى ما ەكەن? ول دالادا جاتقان يت ەمەس, ادام عوي”, – دەدى ول.

وبلىستىق پوليتسيا دەپارتامەنتى ايەلگە ءىس باقىلاۋدا بولاتىنىن ارى مىندەتتى تۇردە شارا قولداناتىنىن مالىمدەگەن. دەسە دە, اۋىزشا ايتىلعاندىقتان, ول ءالى دە سەنىمسىز. جانات “نەمقۇرايلىق” بويىنشا ءىس قوزعالعانىن جانە تەرگەۋشى مەن ۋچاسكەلىك پوليتسەيدىڭ جۇمىستان قۋىلۋىن سۇرايدى.

مارقۇمنىڭ بۇرىن وتباسى بولعان ەكەن, كەيىن اجىراسىپ كەتكەن. ونىڭ ارتىندا 20 جاس شاماسىنداعى ۇلى قالدى.

پوليتسيا تەرگەۋ باستالعانىن ايتتى.

«وسى فاكتى بويىنشا قىزمەتتىك تەرگەۋ جۇرگىزىلىپ جاتىر, ونىڭ ناتيجەلەرى بويىنشا شەشىم قابىلدانادى», – دەپ مالىمدەدى اقتوبە وبلىستىق پد ءباسپاسوز قىزمەتىنىڭ باسشىسى ەربولات سارقۇلوۆ.

ەسكە سالساق, بۇعان دەيىن جوعالىپ كەتىپ, وتباسى ىزدەگەن قازاقستاندىقتى پوليتسەيلەر ۇيسىزدەردىڭ زيراتىنا جەرلەپ تاستاعانىايتىلدى.