ادام ساۋداسى: جان-كلود ۆان داممعا قاتىستى قىلمىستىق ءىس قوزعالدى

بەلگيالىق اكتەر جان-كلود ۆان دامم رۋمىنيادا ادام ساۋداسىنا بايلانىستى باستالعان كەڭ اۋقىمدى تەرگەۋ اياسىندا كۇدىككە ءىلىندى. بۇل تۋرالى   Qandastar.kz CNN جانە Antena 3 تەلەارنالارى حابارلادى.

رۋمىنيانىڭ ۇيىمداسقان قىلمىس پەن لاڭكەستىككە قارسى كۇرەس باسقارماسى (DIICOT) 64 جاستاعى اكتەرگە ادام ساۋداسىنىڭ قۇربانى بولعان بىرنەشە ايەلمەن سەكسۋالدىق قارىم-قاتىناسقا ءتۇستى دەگەن ايىپ تاعىلىپ وتىر.

تەرگەۋ دەرەكتەرىنە سايكەس, ۆان دامم ادام ساۋداسىنا بايلانىستى كۇدىككە ىلىنگەن بىرنەشە اداممەن كەزدەسكەن, ولار وعان «سىيلىق رەتىندە» بەس رۋمىن مودەلىمەن جىنىستىق قاتىناسقا ءتۇسۋدى ۇسىنعان. سولاردىڭ ءبىرى, مودەلدىك اگەنتتىكتىڭ يەسى, رۋمىن كاسىپكەرى مورەل بولەا دەگەن بولجام بار.

وقيعا كانن قالاسىندا بولعانى ايتىلعانىمەن, ناقتى ۋاقىتى كورسەتىلمەگەن. جابىرلەنۋشىلەردىڭ ءبىرىنىڭ ادۆوكاتى ادريان كۋكۋليستىڭ ايتۋىنشا, كانندا جان-كلود ۆان دامم ۇيىمداستىرعان ءىس-شارا كەزىندە, رۋمىنيادا قىلمىستىق توپ قۇردى جانە جەڭگەتايلىقپەن اينالىستى دەگەن كۇدىكپەن تەرگەلىپ جاتقان بىرنەشە ادام اكتەرگە فوتومودەل رۋمىن ايەلدەرىن ۇسىنعان.

«ول ايەلدەردىڭ قانداي جاعدايدا ەكەنىن اكتەر جاقسى بىلگەن», – دەدى ادۆوكات كۋكۋليس.

بۇل وقيعا رۋمىنيا پروكۋراتۋراسى 2020 جىلى باستاعان ادام مەن كامەلەتكە تولماعانداردى ساۋدالاۋ ىسىنە قاتىستى تەرگەۋدىڭ ءبىر بولىگى سانالادى.

بۇل وقيعا فرانتسيادا بولعاندىقتان, رۋمىنيا تاراپى كۇدىكتىلەردى شاقىرتۋ ءۇشىن فرانتسيانىڭ كاسساتسيالىق سوتىنىڭ رۇقساتىن الۋعا ءتيىس.