دانا نۇرجىگىت مارقۇم سالتانات نۇكەنوۆاعا ارناپ جازبا جاريالادى

قۋاندىق بيشىمباەۆ پەن باقىتجان بايجانوۆقا قاتىستى اپەللياتسيالىق سوت وتىرىسى ءوتىپ جاتىر,-دەپ حابارلايدى Qandastar.kz

“سوت ۇكىمى كۇشىنە ەنىپ, اپەللياتسيالىق سوتتىڭ شەشىمىمەن بيشىمباەۆتىڭ جازاسى جەڭىلدەتىلمەيتىن بولدى. كوكتەمدە بۇل پروتسەسس ءجۇرىپ جاتقاندا مەن ءبىر اۋىز ءسوز جازبادىم. پىكىر بىلدىرمەدىم. ەشتەڭە. بىرىنشىدەن: سوت پروتسەسى ءجۇرىپ جاتقان كەزدە ول جۇمىسقا كەدەرگى كەلتىرۋگە بولمايدى دەپ ەسەپتەيمىن. ەتيكالىق تۇرعىدان سولاي بولۋ كەرەك. ەكىنشىدەن: سول كۇندەرى, ءدال سول عيماراتتا جابىق ەسىك جاعدايىندا مەن قوزعاعان قىلمىستىق ءىس تە قارالىپ جاتتى. بيشىمباەۆتىڭ سالتانات جايلى ايتقان سوزدەرىندەي بىقسىق اڭگىمە قۇددى ءبىر ستسەناريستىڭ قولىنان شىققانداي مەنىڭ پروتسەسىمدە دە ماعان قاراتا دا ايتىلىپ جاتتى. مەنىڭ مۇنداي پسيحولوگيالىق-مورالدىق قىسىمنان نەگە سىنىپ كەتپەگەنىمنىڭ ءبىر سەبەبى: مەن ءومىر كورگەن اداممىن, مەنىڭ بالام بار. ماعان بوساڭسۋعا بولمايتىن, كۇرەسىپ, تويتارىس بەرۋدەن باسقا جول جوق ەكەنىن تۇسىنگەنىم. وڭاي بولعان جوق”, – دەپ جازدى جۋرناليست.

“سالتانات جاس, ء“الى-اق ءۇي بولىپ كەتەرمىز, قوياتىن شىعار…”دەگەن ۇمىتپەن ءوزىنىڭ جەكە شەكاراسىن بوساڭسىتىپ, ابيۋزەردىڭ تولىق باقىلاۋىنا تۇسكەنىن, ەرىك, جىگەرىنەن ايىرىلىپ جاتقانىن, باياعى سالتاناتتىڭ ءتىرى ولىككە اينالىپ بارا جاتقانىن اڭعارماي قالدى. بيشىمباەۆ سياقتىلار ادامدى الدىمەن تۇلعا رەتىندە جوق قىلۋعا تىرىسادى. بولمىسىن مانسۇق ەتىپ, جانىن پىسكىلەپ, قانىن تەسپەي سورىپ اياعىندا ءولتىرىپ تىنادى. سالتاناتتى ءبىر جىلعا جەتكىزبەي ءدال سولاي سىندىرىپ بارىپ,اقىرى جانىن الدى. قىزدار, قۇربىلار,ەستەرىڭىزدە بولسىن! ەشقاشان وزگەرمەيدى. ونىڭ سىزگە جانى اشىمايدى. ول وزىنە سىرت كوز بولا المايدى. ءوزىڭىزدى الداماڭىزدار!

سول كۇندەرى سوت عيماراتىنىڭ دالىزىندە سالتاناتتىڭ اكەسىمەن جولىعىپ قالدىم. ول كىسى مەنى تانىعانداي كورىندى ماعان. اۋىر دەمالىپ, بەتى بوپ-بوز بولىپ تۇر ەكەن. ورنىمنان تۇرىپ, “ اللا قۋات بەرسىن سىزگە, اعا! قايعىڭىزعا ورتاقپىن. بەكەم بولىڭىز!” دەگەننەن باسقا ءسوز تاپپادىم. ول كىسى باسىن يزەدى دە سوت زالىنا قاراي ءجۇرىپ كەتتى. نەتكەن اۋىر سىناق ەدى!”, – دەپ جازدى جۋرناليست.