دانا ورمانباەۆا تاعى مالىمدەمە جاسادى

فوتو:  exclusive.kz

تاياۋدا ۇستىنەن ۇلتارالىق ارازدىقتى ءورشىتۋ فاكتىسى بويىنشا قىلمىستىق ءىس قوزعالىپ, حالىقارالىق ىزدەۋ جاريالانعان جۋرناليست دانا ورمانباەۆا مالىمدەمە جاسادى, دەپ حابارلايدى qandastar.kz اقپارات پورتالى.

بۇل تۋرالى Facebook جەلىسىندەگى پاراقشاسىندا جازدى.

«مىنا ۇساق-تۇيەك سارساڭعا تۇسكەندەر مەنىڭ ءوزىمدى مەنەن تارتىپ العىسى كەلەتىن سياقتى.

قالاي ەلەستەتىپ وتىرسىزدار, «جاقسى» مىرزالار مەن حانىمدار?

سىزدەر جەڭىسكە جەتەمىز دەپ ويلايسىزدار ما? قالاي?

اتىمدى تارتىپ الامىن دەيسىزدەر مە?

ول ەشقاشان دا مۇمكىن ەمەس. تاعى نەنى تارتىپ العىلارىڭ كەلەدى? مەنىڭ كاسىبىمدى, تاجىريبەمدى مە?

ءبىزدىڭ جوبالارىمىز الدەقاشان حالىقارالىق دەڭگەيدە دامىپ, الەمدە مويىندالعان. ءارى قاراي نە? بەدەلىمدى مە? مەنىڭ بەدەلىم – سانالى ادامدار اراسىندا.

اقىل-ويى اشىق, باستى مەن قوسىمشانى ايىرا الاتىن, ۇرپاعىنا ىشكى بايلىق پەن مەيىرىمدى جۇرەك قالدىرۋدى ماقسات ەتەتىن جانداردىڭ الدىندا مەنىڭ ءوز ورنىم بار.

قارىم-قاتىناسىمدى, ورتامدى تارتىپ الامىن دەيسىزدەر مە?

مەنىڭ جانىمدا سۇيىكتى جارىم, عاجاپ بالالارىم, قاينار بۇلاقتاي تازا شىنايى دوستارىم بار.

مەنىڭ الەمىمدە قارابەتتەرگە, ەكىجۇزدىلەر مەن قورقاقتارعا ورىن جوق. بۇل جاعىنان دا قولدارىڭنان ەشتەڭە كەلمەيدى.

ماعان سەنەتىن, بۇل سۇمدىق وتىرىككە ەمەس, اقيقاتقا قۇلاق اساتىن, مەنىڭ قاسىمدا قالاتىن بارلىق جاندارعا العىسىم شەكسىز!», — دەپ جازدى دانا ورمانباەۆا.

ەسكە سالساق, الماتى پوليتسيا دەپارتامەنتىنىڭ تەرگەۋ باسقارماسى دانا ورمانباەۆا قاتىستى ۇلتارالىق ارازدىقتى قوزدىرۋ فاكتىسى بويىنشا قىلمىستىق ءىستى تەرگەپ جاتىر.