دارەتحانادان تابىلعان ءۇش جاسار اسىلىمنىڭ كىسى قولىنان قازا تاپقانى انىقتالدى

فوتو: اشىق دەرەككوز

ءۇش جاسار اسىلىمنىڭ كىسى قولىنان قازا تاپقانى بەلگىلى بولدى, – دەپ حابارلايدى qandastar.kz.

جۋرناليست گۇلميرا ابىقاي پاراقشاسىندا تۇركىستان وبلىسى, سىرگەلى اۋىلىنىڭ تۇرعىنى اسىلىمدى كورشى تۇراتىن 16 جاستاعى ءجاسوسپىرىم قىز بۋىندىرىپ, ءولتىرىپ, تەپكىلەپ دارەتحاناعا تاستاعانىن جازدى.

“وسى اۋىلدا شىلدە ايىندا تاعى بۇل جايت قايتالانعان. 5 جاسار نۇراي ەسىمدى قىزدى دا كۇدىكتى تىستەپ, ۇرىپ, دارەتحاناعا تاستاماقشى بولعان. ابىروي بولعاندا كورشىسى كورىپ, امان ساقتاپ قالعان. سول ساتتە ول اسىلىمدى ولتىرگەنىن مويىنداعان, كۇدىكتىنىڭ دەنساۋلىعىندا اقاۋ بولۋى مۇمكىن”, – دەپ جازادى گ.ابىقاي.

قازىر تەرگەۋ جالعاسۋدا, ءىس سوت قاراۋىندا. بىراق بۇعان دەيىن قۇقىق قورعاۋ ورگاندارىنىڭ قالاي جۇمىس جۇرگىزگەنى, سوت مەديتسينالىق ساراپتامانىڭ قالاي قورىتىندىسى شىققانى كۇمان تۋدىراتىنىن ايتادى جۋرناليست.

ەسكە سالساق, سىرگەلى اۋىلىندا ءۇش جاسار اسىلىمنىڭ 16 مامىردا جوعالىپ كەتكەنى تۋرالى اقپارات تارادى. اتا-اناسىسىنىڭ ايتۋىنشا, ءۇي تىرلىگىمەن جۇرگەندە تاڭعى ساعات 9:00 شاماسىندا ءبۇلدىرشىن ەسىك الدىنداعى قاقپا الدىندا ويناپ جۇرگەن. سودان كەيىن ءىز-ءتۇزسىز جوعالىپ كەتكەن.

تۇركىستان وبلىسى پوليتسيا دەپارتامەنتى كريمينالدىق پوليتسيا باسقارماسى مەن سارىاعاش اۋداندىق پوليتسيا ءبولىمى جەدەل-ىزدەستىرۋ ءىس-شارالارى بارىسىندا اسىلىمنىڭ دەنەسى كورشى ءۇيدىڭ دارەتحاناسىنان تابىلعانىن, كىشكەنتاي قىزدىڭ دەنەسىندە زورلىق-زومبىلىق بەلگىلەرى بولماعانىن حابارلاعان ەدى.