ء«دارى ىشكەنى ءۇشىن ۇرعان»: اسكەردە سوققىعا جىعىلىپ, كوماعا تۇسكەن ساربازدىڭ ءىسى بويىنشا سوت باستالدى

فوتو: جەكە قورىنان

الماتى گارنيزونى اسكەري سوتىندا اسكەري بورىشىن وتەپ ءجۇرىپ كوماعا تۇسكەن قوستانايلىق نۇرجىگىت ابدىلپاتتاعا قاتىستى العاشقى سوت وتىرىسى ءوتتى. بۇل تۋرالى qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

وقيعا 2024 جىلدىڭ ماۋسىم ايىندا وتارداعى اسكەري بولىمدە بولعان. ايىپتاۋشى تاراپتىڭ ايتۋىنشا, جىگىتكە الىمجەتتىك كورسەتىلگەن.

سوت جابىرلەنۋشىنىڭ, سونداي-اق كۋاگەرلەر, نۇرجىگىتتىڭ ءتورت ارىپتەسى مەن اكەسى تيمۋر ءجاناليننىڭ ايعاقتارىن تىڭدادى.

بۇعان دەيىن پرەزيدەنتتىڭ ءباسپاسوز حاتشىسى بەرىك ءۋالي بالانىڭ اتا-اناسىنىڭ ۆيدەو ۇندەۋىنەن كەيىن پرەزيدەنت قاسىم-جومارت توقاەۆ ءىستى تەكسەرۋدى تاپسىرعانىن مالىمدەگەن ەدى.

جابىرلەنۋشى ءوزىن كىشى سەرجانت داستان تۇرلاننىڭ ساپتا تۇرعان كەزىندە تاماق ءدارىسىن قولدانعانى ءۇشىن اسقازان تۇسىنان ۇرعانىن ايتتى.

«سەرجانت بايقامايدى دەپ ۇمىتپەن, ءدارىنى تاماعىما شاشىپ جىبەردىم. ءبىزدى اسكەري بولىمگە اپارار الدىندا ۆوەنكوماتتا تۇنەپ, ازداپ سالقىن تيگىزىپ العان ەدىم. بىراق تۇرلان مۇنى بايقاپ قالىپ, ءىشىمنىڭ وڭ جاعىنان ۇردى, مەنىڭ تىنىسىم تارىلا باستادى», – دەيدى جابىرلەنۋشى.

سونىمەن قاتار سەرجانت ساربازدى قاتارلاستارىنىڭ كوزىنشە بالاعاتتاپ, كوپشىلىك الدىندا ماسقارالاعان. جايۋىرلەنۋشى بۇل وقيعادان كەيىن ءوزىن ۇزاق ۋاقىت وتە ناشار سەزىنگەنىن ايتتى, ساربازدا باس اينالۋ, مۇرىننان ءجيى قان كەتۋ, جۇرەك اينۋ جانە تابەتىنىڭ جوعالۋى باستالعان.

ء«بىر كۇنى مەن اسحانادا اۋىرا باستادىم. دارەتحاناعا جۇگىرىپ بارىپ, قۇستىم, سودان كەيىن ارىپتەستەرىم مەنى مەديتسينالىق بولىمشەگە اپاردى. سول جەردەن مەنى اۋرۋحاناعا جىبەردى. ودان كەيىن ەشنارسە ەسىمدە جوق, تەك قوردايداعى اۋرۋحانانىڭ جانساقتاۋ بولىمىندە ويانعانىمدى بىلەمىن», – دەيدى نۇرجىگىت.

سوتقا كۋاگەر رەتىندە جابىرلەنۋشى ساربازدىڭ اكەسى تيمۋر جانالين دە كەلدى. ونىڭ ايتۋىنشا, ايەلىنە اسكەري بولىمنەن تەلەفون سوعىپ, نۇرجىگىتتىڭ قوردايداعى اۋرۋحانادا جاتقانى حابارلانعان, ول كەزدە ۇلدارىڭىزدا بارى جاقسى, الاڭداۋعا نەگىز جوق دەپ سەندىردى. الايدا بىرنەشە ساعاتتان كەيىن ولار قايتا تەلەفون سوعىپ, ساربازدىڭ جاعدايى وتە اۋىر ەكەنىن ايتقان.

جابىرلەنۋشىنىڭ اكەسى ايەلى ەكەۋى اۋرۋحاناعا بالاسىن كورۋگە كەلگەندە, ولاردى ۇزاق ۋاقىت بولمەگە كىرگىزبەگەنىن ايتتى. سونىمەن قاتار نۇرجىگىت كومادا جاتقاندا اكەسى ونى ءوز بەتىنشە تەكسەرىپ, نۇرجىگىتتىڭ ءىشىنىڭ كوگەرگەنىن انىقتاعان. مۇنى العاشقى سوت-مەديتسينالىق ساراپتاماسىن جۇرگىزگەن ساراپشى دا راستادى. ساراپتامانى بۇعان دەيىن سالتانات نۇكەنوۆانىڭ ولىمىنە قاتىستى اتىشۋلى ءىس بويىنشا سوت وتىرىسىندا ءسوز سويلەگەن بەلگىلى تاحير حاليمنازاروۆ جۇرگىزگەن.

جابىرلەنۋشى سەرجانتتىڭ سوققىسىنان اۋىرىپ قالعانىن سوڭعى ساتكە دەيىن اسكەري بولىمدە ەشكىمگە ايتپاعانىن دا اتاپ ءوتتى. ونىڭ ايتۋىنشا, ول بۋللينگتەن قورقىپ, سوندىقتان بولعان وقيعا تۋرالى ەشكىمگە ايتقىسى كەلمەگەن.

سارباز سوتتا كلينيكالىق ءولىمدى باستان وتكەرگەنىن ايتتى. ونىڭ ۇستىنە قوستانايدا اتا-اناسىنىڭ باقىلاۋىندا ءبىر ايعا جۋىق ۇيدە بولىپ, تەك مۇگەدەكتەر ارباسى ارقىلى عانا قوزعالعان.

ەسكە سالساق, جامبىل وبلىسىندا «وڭتۇستىك» وڭىرلىك قولباسشىلىعىنىڭ ساربازى قورداي اۋداندىق ورتالىق اۋرۋحاناسىنىڭ جانساقتاۋ بولىمىنە تۇسكەنى تۋرالى جازعان ەدىك. قورعانىس مينيسترلىگى ساربازعا جاسالعان زورلىق-زومبىلىق فاكتىسىن راستادى.