«دارىگەرلەر اقشانى ءومىر بويى العان, الا بەرەدى»: تالدىقورعان ونكولوگيالىق ورتالىق قىزمەتكەرىنىڭ پارا العانىن مويىنداعان ۆيدەوسى تارادى

فوتو: اشىق دەرەككوز

تالدىقورعانداعى كوپسالالى ونكولوگيالىق ديسپانسەردىڭ ءبولىم مەڭگەرۋشىسى مەرۋەرت نۇراقىنقىزى پارا العانىن مويىنداعان ۆيدەوسى جەلىدە تارادى. اۋرۋحانادان ءماجبۇرلى تۇردە كەتكەن بۇرىنعى قىزمەتكەرى ايگەرىم تالعاتقىزىنىڭ ايتۋىنشا, مەڭگەرۋشى ەمدەلۋشىلەر مەن ولاردىڭ تۋىستارىنان پارا الىپ, 4-ساتىداعى ناۋقاستارعا ەش پايداسى جوق دارىلەردى ساتقان كورىنەدى. بۇل تۋرالى  qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

اۋرۋحانانىڭ بۇرىنعى قىزمەتكەرى ايگەرىم تالعاتقىزىنىڭ جۇمىستان شىعۋىنا ونكولوگيالىق اۋرۋحانانىڭ اكىمشىلىگى تاراپىنان قىسىم كورسەتۋى سەبەپ بولعان. ويتكەنى ايگەرىم بولىم مەڭگەرۋشىسى اراپوۆاعا قارسى ايعاقتارى بارىن ايتقاننان كەيىن اۋرۋحانا ديرەكتورى, كەرىسىنشە, وعان جالا جاپقان. سودان كەيىن جاعدايدى ۆيدەوعا تۇسىرۋگە تىرىسقان ونى ديرەكتور كوپشىلىك الدىندا قورلاپ, اگرەسسيۆتى تۇردە تەلەفونىن تارتىپ العان كورىنەدى. ارتىنشا ايگەرىمنىڭ جەكە مالىمەتتەرىن قاراپ, سوڭىندا جۇمىستان شىعارعان.

«مەن ونىڭ سىبايلاس جەمقورلىق ارەكەتتەرىنىڭ كۋاسى بولدىم جانە بۇل تۋرالى ونكولوگيا ديرەكتورى ومىرباەۆ م.ا. مەن ديرەكتوردىڭ ورىنباسارى ءداۋران تۇرسىنقۇل ۇلىنا ايتتىم. بىراق ولار, كەرىسىنشە, مەنى ايىپتاپ, ءبولىم مەڭگەرۋشىسى مەرۋەرت اراپوۆانى جاقتاپ, قولداۋ كورسەتە باستادى», – دەدى بۇرىنعى دارىگەر.

بۇدان قالدى ءبولىم مەڭگەرۋشىسى ناۋقاستارعا دياگنوزعا ساي ەمەس ءدارى-دارمەكتەردى ساتىپ الۋعا ماجبۇرلەپتى.

سونىمەن قاتار بۇل ماسەلە تەك اراپوۆاعا ەمەس, باسقا دا دارىگەرلەرگە قاتىستى ەكەنىن اتاپ ءوتتى. ول پاتسيەنتتەردى مۇنداي دارىگەرلەردەن قورعاۋ ءۇشىن ۆيدەو جاريالاعان. ۆيدەودا ءبولىم مەڭگەرۋشىسىنىڭ ايگەرىمنىڭ قۇربىسىنا WhatsApp جەلىسىندە جىبەرگەن اۋديوجازباسى شىققان. الايدا جازبادا اراپوۆانىڭ ايتۋىنشا, وعان قىزمەتكەردىڭ ىشكى الاۋىزدىعى بار ەكەن.

«وعان جۇمىستان شىعۋ تۋرالى ەمەس, تۇسىنىكتەمە جازىڭدار دەپ ايتتىم. قالاۋلارىڭ بولسا, شىعا بەرىڭدەر دەدىم. جارايدى, ول جىندىمەن جىندى بولامىن با? پارا الاسىڭ دەگەنىنە اشۋىم كەلىپ تۇر. پارانى دارىگەرلەر ءومىر بويى العان, الا بەرەدى. سەنىڭ قۇربىڭ, ايگەرىم… ءىشى جارىلايىن دەپ ءجۇر عوي. ماعان ەلدەر «پارا» بەرەدى. سونى كورە الماي ءجۇر. وزىنە پارا بەرمەيدى. سودان كەيىن ءىشى تارىلىپ ءجۇر. ەشكىمنەن اقشا سۇرامايمىن. سۇراسا الا بەرەمىن. سونى ءتۇسىندىرشى قۇربىڭا. جاڭا عانا جاكيباەۆتىڭ ايەلى ماعان كەلىپ, قالتاما سالدى. تۋرا سول كەزدە ونىڭ كوزى جانىپ, شاراسىنان شىعىپ كەتە جازدادى. ول مەنى قىزعانادى», – دەدى ءبولىم مەڭگەرۋشىسى ۆيدەودا.

ايگەرىم ءوزىنىڭ جاريالانىمىنان كەيىن اۋرۋحانا ديرەكتورى اراپوۆا م.ن-نىڭ جۇمىستان شىعارىلۋىن تالقىلايتىن تارتىپتىك كەڭەس شاقىرعانىن ايتتى. ول پروكۋراتۋرا مەن سىبايلاس جەمقورلىققا قارسى ورگانداردى اۋرۋحانا اكىمشىلىگىنە قارسى شارا قولدانۋعا شاقىرادى. ايگەرىمنىڭ قۇقىق قورعاۋ ورگاندارىنا قويعان تالاپتارى – جەمقورلىق پەن قىسىم كورسەتۋدە كىنالى دەپ ەسەپتەيتىندەردى جاۋاپقا تارتۋ.

رەداكتسيا تالدىقورعانداعى وبلىستىق ونكولوگيالىق ورتالىقتان جاعدايدىڭ ەگجەي-تەگجەيىن سۇراپ كوردى.

«ينستاگرامداعى «krisp.tdk» الەۋمەتتىك جەلىسىندە جاريالانعان اقپاراتقا قاتىستى وبلىستىق كوپسالالى ەمحانا بىلاي دەپ حابارلايدى. بۇل ءىس بويىنشا قىزمەتتىك تەكسەرۋ جۇرگىزىلىپ جاتىر. ناتيجەسى كەيىنىرەك بەلگىلى بولادى», – دەلىنگەن جاۋاپتا.