«داستان سالعان ىزبەن»: ەۋروپالىق كلۋبتار «قايرات» كومانداسىنىڭ تاعى ءبىر ويىنشىسىنا قىزىعۋشىلىق تانىتتى

«قايرات» فۋتبول كلۋبى جانە قازاقستان جاسوسپىرىمدەر قۇراماسىنىڭ شابۋىلشىسى يسمايل بەكبولات جازعى ترانسفەر ماۋسىمىندا شەتەلدىك كلۋب ساپىنا اۋىسىۋ مۇمكىن, دەپ حابارلايدى qandastar.kz Vesti.kz-كە سىلتەمە جاساپ.

بەكبولات بيىلعى ماۋسىمدى ءساتتى باستاپ, U-17 قۇراماسىندا دا, كلۋب ساپىندا ءوزىن جاقسى قىرىنان كورسەتتى. يسمايل ەۋروپا مەن رەسەي سكاۋتتارىنىڭ ىرىكتەلگەن تىزىمىنە بىلتىر ىلىنگەن بولاتىن, بۇگىندە رەسەي مەن ەۋروپانىڭ بىرنەشە كلۋبىنان قىزىعۋشىلىق تانىتقانى بەلگىلى بولدى.

17 جاستاعى فۋتبولشى «قايراتتىڭ» نەگىزگى قۇراماسى ساپىندا ويناپ ۇلگەردى. بيىلعى چەمپيوناتتا ول 5 كەزدەسۋگە قاتىستى. سونىمەن قاتار, ول ءبىرىنشى ليگادا وينايتىن «قايرات-جاستار» كومانداسى ساپىندا ءۇش كەزدەسۋدە ويىنعا ارالاستى.

يسمايل جاسوسپىرىمدەر اراسىنداعى ەۋروپا چەمپيوناتىنا ىرىكتەۋ كەزىندە وتكەن ويىنداردا دا كوزگە تۇسكەن بولاتىن. گرۋزياعا قارسى ويىندا 1 گول سوقسا, ليتۆاعا قارسى كەزدەسۋدە حەت-تريك جاسادى.

ەسكە سالا كەتەيىك, «قايرات» كلۋبىنىڭ تۇلەگى داستان ساتپاەۆ ايگىلى «چەلسي» كلۋبىنا اۋىسادى. 16 جاستاعى ويىنشى 2026 جىلدىڭ جازىندا كامەلەتتىك جاسقا تولعان سوڭ رەسمي تۇردە اعىلشىن كومانداسىنا قوسىلادى. ول ۋاقىتقا دەيىن داستان ساتپاەۆ «قايرات» ساپىندا ونەر كورسەتەدى.