داۋلەت مۇقاەۆ ەر بالالار قانداي كىتاپ وقۋى كەرەكتىگىن ايتتى

فوتو: اشىق دەرەككوز

قر پارلامەنتى ءماجىلىسىنىڭ دەپۋتاتى داۋلەت مۇقاەۆ «ۇجدان» اكەلەر الاڭىنا بەرگەن سۇحباتىندا اكەسىنەن العان ءتالىم-تاربيەسى مەن ۇلگى ەتكەن ونەگەسى تۋرالى ايتىپ بەردى, – دەپ حابارلايدى qandastar.kz

«مەنىڭ اكەم وتە قاراپايىم ەڭبەك ادامى. ول بىزگە ءاردايىم ادال بولىڭدار, بىلىمگە ۇمتىلىڭدار جانە ەشكىمگە وزدىگىنەن تيىسپەڭدەر, ءوزى ءبىرىنشى باستاپ ءتيىستى مە وندا ونى اياما دەپ قۇلاعىمىزعا قۇيىپ ءوسىردى. اكەم بۇل سوزدەردى ەر بالا بولعاندىقتان ءجيى ايتقان بولار دەپ ويلايمىن. بالا كەزىمىزدە اكەم وقۋ-بىلىمگە قۇشتار بولۋ كەرەكتىگىن ەسىمىزگە ءجيى سالىپ وتىردى. سودان بولار كىتاپ وقۋعا, ءبىلىم الۋعا ەرەكشە قىزىعۋشىلىق تانىتتىم. ءبىزدىڭ بالالىق شاعىمىز توقسانىنشى جىلداردىڭ توقىراۋ كەزەڭىندە وتكەندىكتەن قيىنشىلىقتىڭ نە ەكەنىن سەزىنىپ وستىك. ول ۋاقىتتا بىزدە وينايتىن قاراپايىم ويىنشىق بولمادى. ۇيدە نە بار سودان ويىنشىق قۇراستىرىپ, جوقتان بار جاساۋدى, قيراپ قالعان دۇنيەنى قايتا قۇراستىرۋدى ۇيرەندىك. ال قازىر بارلىعى بار, مۇمكىندىك كوپ, بالالار وتە باقىتتى. بىراق بۇگىنگىنىڭ بالالارى ءۇشىن كوپ نارسەگە قول جەتكىزۋ وڭاي بولعاندىقتان, بار دۇنيەنىڭ قادىرىن بىلە بىلمەيدى. سەبەبى, قاراپايىم ويىنشىقتىڭ ءوزىن كىشكەنە ۋاقىتتا سىندىرىپ, قوقىسقا لاقتىرىپ جاتادى. سول سەبەپتى ءوز بالالارىمدى اكەم ايتقان اقىلمەن تاربيەلەپ كەلەمىن. اكە رەتىندە بالالارىمدى ءبىلىمدى, ەڭبەكقور, ادال ازامات ەتىپ وسىرگىم كەلەدى. ءوزىمنىڭ جاسىم وتىز ەكىگە كەلسە دە ءالى كۇنگە دەيىن اكەمنىڭ قاباعىنا قاراپ, ءتۇيىنى شەشىلمەگەن ماسەلەنى سول كىسىمەن اقىلداسىپ وتىرامىن. اكە-شەشەمىز قاسىمىزدا بار كەزدە قادىرىن ءبىلۋىمىز كەرەك», – دەدى داۋلەت مۇقاەۆ.

سۇحبات بارىسىندا “ەر بالالار قانداي كىتاپتى مىندەتتى تۇردە وقۋى كەرەك?”,- دەگەن سۇراعىمىزعا داۋلەت مۇقاەۆ ء“بىرىنشى كەزەكتە باۋىرجان مومىش ۇلىن وقۋ كەرەك”,- دەپ جاۋاپ بەردى.

«ءوزىم ەكونوميست بولعاننان كەيىن قارجىلىق ساۋاتتىلىق باعىتىنداعى كىتاپتاردى ءجيى وقيمىن. بىراق, وسكەلەڭ ۇرپاققا باۋىرجان مومىش ۇلى اتامىز جايلى جانە ءازىلحان نۇرشايىقوۆ تۋرالى كىتاپتاردى ءجيى وقىتۋىمىز كەرەك. سونداي-اق, جاستاردىڭ وتانسۇيگىشتىك قاسيەتىن وياتاتىن كىتاپتاردى دا ءجيى وقىتۋىمىز كەرەك. ال ونىڭ بارلىعىن ءبىز تاريحتان الامىز. سوندىقتان ءسىز بەن ءبىز ءوز تاريحىمىزدى تەرەڭ ءتۇسىنۋىمىز قاجەت», – دەدى داۋلەت مۇقاەۆ.