داۋرەن اباەۆ حالىقتىڭ 95 پايىزى ورىس تىلىندە سويلەيتىنىن ەلدىڭ مىقتى تۇسى رەتىندە اتادى

رەسەي فەدەراتسياسىنداعى قازاقستاننىڭ ەلشىسى داۋرەن اباەۆ رەسەيدىڭ تاسس اگەنتتىگىنە بەرگەن سۇحباتىندا قازاق حالقىنىڭ 95 پايىزى ورىس تىلىندە سويلەي الاتىنىن ەلدىڭ مىقتى تۇسى دەپ اتادى, دەپ حابارلايدى qandastar.kz   Orda.kz-كە سىلتەمە جاساپ.

قازاقستان رەسپۋبليكاسىنىڭ رەسەي فەدەراتسياسىنداعى ەلشىسى داۋرەن اباەۆ قازاقستان حالقىنىڭ 95 پايىزى ورىس تىلىندە سويلەي الاتىنى – ەلدىڭ مىقتى جاعى دەپ سانايتىنىن اتاپ ءوتتى, دەپ مالىمدەدى تاسس اگەنتتىگى.

«قازاقستاندا, مەنىڭشە, حالىقتىڭ 95 پايىزى ورىس ءتىلىن بىلەدى جانە ءبىز ورىس ءتىلىن ءبىلۋ – ءبىزدىڭ ارتىقشىلىعىمىز ءارى كۇشىمىز دەپ سانايمىز. ارينە, باستى باسىمدىق  مەملەكەتتىك ءتىلىمىز – قازاق تىلىندە جانە ونىڭ ءرولى جىل سايىن ارتىپ كەلەدى. بىراق سونىمەن بىرگە, ەلىمىزدە بارلىعىنىڭ ورىس ءتىلىن بىلەتىنىنە ءبىز وتە قۋانىشتىمىز, ويتكەنى بۇل  تاعى دا قايتالاپ ايتامىن – ءبىزدىڭ  ارتىقشىلىعىمىزدىڭ ءبىرى», – دەدى ديپلومات.

ەلشى اتاپ وتكەندەي, قازاقستانداعى شامامەن 7 مىڭ مەكتەپتىڭ 3 مىڭى ورىس تىلىندە  بىلىم بەرەدى. سونىمەن قاتار ول ورىس ءتىلىن وقىتۋ بارلىق مەكتەپتەردە مىندەتتى ەكەنىن دە ماقتانىشپەن اتاپ ءوتتى.

«ورىس ءتىلىن ءبىز قازاقستاندا باسەكەگە قابىلەتتىلىك بەرەتىن ءتىل دەپ سانايمىز» , – دەدى ول.

2023 جىلى ءماجىلىس دەپۋتاتى قازىبەك يسا قازاقستان رەسپۋبليكاسى جوعارعى سوتى مەن م.نارىكباەۆ اتىنداعى قازاقگزۋ وتكىزگەن «قۇقىق جۇيەسىندەگى قازاق ءتىلىنىڭ ماسەلەلەرى جانە ولاردى شەشۋ جولدارى» اتتى رەسپۋبليكالىق عىلىمي-تاجىريبەلىك كونفەرەنتسيادا كونستيتۋتسيادان ورىس ءتىلىن الىپ تاستاۋدى ۇسىندى.

2024 جىلى ءماجىلىس دەپۋتاتى داۋلەت مۇقاەۆ قازاق سىنىپتارىندا وقىتىلاتىن ورىس ءتىلى ءپانى باعدارلاماسىنا قاتىستى ءوز پىكىرىن ءبىلدىردى. ونىڭ ايتۋىنشا قازاق سىنىپتارىنداعى ەكىنشى سىنىپ وقۋشىلارىنا ارنالعان ورىس ءتىلى وقۋلىقتارى تىم قيىن. ساباق باستالا سالىسىمەن بالالارعا كۇردەلى تاپسىرمالار بەرىلەدى. بىردەن سويلەم قۇراۋ, ولەڭ جاتتاۋ سەكىلدى كۇردەلى تاپسىرمالار جۇكتەلەدى. دەپۋتاتتىڭ پىكىرىنشە, الدىمەن الفاۆيتتەن باستاپ ۇيرەتۋ قاجەت.

ەسكە سالساق, جاقىندا الماتى قالاسىنىڭ بوستاندىق اۋدانىندا قازاق مەكتەبى بولادى دەپ كۇتىلگەن جاڭا ءبىلىم ورداسىندا ورىس سىنىپتارىنىڭ اشىلۋى اتا-انالاردىڭ اشۋ-ىزاسىن تۋعىزىپ, جەلىدە قىزۋ پىكىرتالاس تۋدىرىپ, اتا-انالار جاڭا مەكتەپتىڭ ارالاس تىلدە اشىلعانىنا قارسى شىعىپ, «تەك قازاق تىلىندە اشىلسىن» دەپ تالاپ ەتتى.