«دەكرەتكە ميلليونمەن» كۋرسىن شىعارعاندار جازالانۋى مۇمكىن

فوتو: halyqonline

ولار بۇعان دەيىن جۇكتىلىك پەن بوسانۋ تولەمدەرىنىڭ سوماسىن ۇلكەيتۋدىڭ ءادىسىن ۇيرەتەتىن كونسۋلتاتسيالىق قىزمەتتەردىڭ ۇستىنەن شاعىم تۇسىرگەن ەدى, دەپ حابارلايدى qandastar.kz

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا باق وكىلدەرىنە جۇكتىلىك پەن بوسانۋ تولەمدەرىن شامادان تىس راسىمدەگەن 113 ادامعا 16 قىلمىستىق ءىس قوزعالعانىن مالىمدەگەن بولاتىن. جۋرناليستەر «وسى قىلمىستىق ىستەردىڭ اراسىندا «دەكرەتكە ميلليونمەن» كۋرسىنىڭ اۆتورلارى بار ما?» دەپ سۇراعان.

– بۇگىندە ءبىز الەۋمەتتىك جەلىلەردە ءۇشىنشى تۇلعالاردىڭ تاراپىنان ءارتۇرلى كونسۋلتاتسيالىق قىزمەتتىڭ, ونىڭ ىشىندە كاسىپكەرلىك سۋبەكتىلەرى مەن دەكرەتتىك دەمالىسقا شىعۋدى جوسپارلاپ وتىرعان ايەلدەر اراسىندا «فورمالدى» ەڭبەك شارتتارىن جاساسۋ ارقىلى الەۋمەتتىك تولەمدەردى جوعارى مولشەردە الۋ تاسىلدەرىنىڭ ايتارلىقتاي وسكەنىن بايقاپ وتىرمىز, – دەلىنگەن جاۋاپتا.

قازىرگى ۋاقىتتا قۇزىرلى ورگاندار ءوز جۇمىسىن اتقارىپ جاتقان كورىنەدى.

– اتالعان ماسەلە بويىنشا مينيسترلىك پەن مەملەكەتتىك الەۋمەتتىك ساقتاندىرۋ قورى ءوزىنىڭ قۇزىرەتى بويىنشا ءتيىستى ءىس-شارالار جۇرگىزۋ ءۇشىن قۇقىق قورعاۋ ورگاندارىنا بىرقاتار وتىنىشكە باستاماشىلىق جاسادى. قوزعالعان قىلمىستىق ىستەر شەڭبەرىندە جەدەل تەرگەپ-تەكسەرۋ جۇمىستارى جۇرگىزىلىپ جاتىر. قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرىن جاريا ەتۋگە جول بەرىلمەيدى, – دەپ جازىلعان جاۋاپتا.