دەكرەتكە ميلليونمەن شىعۋعا كومەكتەسكەن ەكى قازاقستاندىق 6 جىلعا سوتتالدى

فوتو: freepik.com

اقتوبەدە ميلليونداعان اقشامەن دەكرەتتىك دەمالىسقا شىعارۋمەن اينالىسقان ەكى ايەل 6 جىلعا سوتتالدى. ولار مەملەكەتكە 98 ميلليون تەڭگە شىعىن اكەلگەن.

بۇل تۋرالى qandastar.kz اقپارات اگەنتتىگى “دياپازون”پورتالىنا سىلتەمە جاساپ حابارلايدى.

2023 جىلدان 2024 جىلعا دەيىن ەكى بۋحگالتەر اقتوبەلىك ايەلدەرگە دەكرەتتىك دەمالىسقا شىقپاس بۇرىن ونداعان جەكە كاسىپكەر (يپ) راسىمدەپ, سول ارقىلى ميلليونداعان الەۋمەتتىك تولەمدەر الدىرتقان.

سوتتالۋشىلاردىڭ ءبىرى – 39 جاستاعى گاۋحار, ەكىنشىسى – 28 جاستاعى تۇرسىناي. ەكەۋى دە جەكە كاسىپكەر, بۋحگالتەرلىك جانە سالىق ەسەپتىلىگىن جۇرگىزۋمەن اينالىسقان. ولار الاياقتىق ارەكەتتەرى ءۇشىن سوت الدىندا جاۋاپ بەرۋدە.

ءىس ماتەريالدارىنا سايكەس, گاۋحار الەۋمەتتىك جەلىلەر ارقىلى «دەكرەتكە ميلليونمەن» اتتى كۋرسقا قاتىسىپ, وندا ايەلدەردى دەكرەتكە شىقپاس بۇرىن جەكە كاسىپكەر رەتىندە تىركەۋ, جۇمىس ورىندارىن جاساۋ, الەۋمەتتىك جارنالاردى دۇرىس تولەۋ ارقىلى كوپ الەۋمەتتىك تولەم الۋ جولدارىن ۇيرەنگەن. ول Instagram پاراقشاسىندا «دەكرەتكە ميلليونمەن» دەگەن جارناما جاريالاپ, جۇكتى ايەلدەرگە ميلليون تەڭگە الۋعا كومەكتەسەتىنىن ايتقان. كەيىن وسى ءىستى ءوزىنىڭ بۋحگالتەر تانىسىنا تاپسىرعان. ول دا بۋحگالتەرلىك جانە سالىق ەسەپتىلىگى بويىنشا تاجىريبەسى بار, كاسىپكەرلەرگە كەڭەس بەرگەن.

ءبىرىنشى كليەنتىنەن بۋحگالتەرلەر 1 ميلليون 64 مىڭ تەڭگە العان. ول ءوز ەتسپ كىلتىن بەرگەن. ال بۋحگالتەرلەر ونى بىردەن 12 جەكە كاسىپكەر رەتىندە تىركەگەن. بۋحگالتەرلەر ونىڭ اتىنان الەۋمەتتىك جارنالار – 235 200 تەڭگە, زەينەتاقى جارنالارى – 144 000 تەڭگە, مەديتسينالىق ساقتاندىرۋعا – 72 000 تەڭگە تولەم جاساعان. كەيىن وعان 12 جەكە كاسىپكەرلىك ارقىلى اقشالاي جالاقى العانىن راستايتىن جالعان كاسسالىق قۇجاتتار تولتىرعان. ناتيجەسىندە وعان جۇكتىلىك جانە بوسانۋ ءۇشىن 4 053 404 تەڭگە الەۋمەتتىك تولەم تاعايىندالعان. سونىمەن قاتار, بالا 1,5 جاسقا تولعانعا دەيىن اي سايىن 185 140 تەڭگە تولەنگەن. اقشا شوتقا تۇسكەننەن كەيىن, ايەل بۋحگالتەرلەرگە 532 000 تەڭگە سىياقى رەتىندە بەرگەن.

ال ەكىنشى كليەنتتى دەكرەتكە شىعاردا بۋحگالتەرلەر 13 جەكە كاسىپكەرلىك راسىمدەگەن. وعان دا الەۋمەتتىك جارنالار مەن زەينەتاقى, مەديتسينالىق ساقتاندىرۋ جارنالارى تولەنگەن. وعان 2023 جىلدىڭ ناۋرىزىنان 2024 جىلدىڭ اقپانىنا دەيىن جالاقى العانىن راستايتىن جالعان كاسسالىق قۇجاتتار تولتىرىلعان. وسىلايشا ايەلگە جۇكتىلىك جانە بوسانۋ بويىنشا 4 070 501 تەڭگە, بالا كۇتىمى ءۇشىن 1,5 جاسقا دەيىن اي سايىن 204 167 تەڭگە الەۋمەتتىك تولەم تاعايىندالعان. اقشا شوتقا تۇسكەننەن كەيىن ايەل بۋحگالتەرلەرگە 532 000 تەڭگە بەرگەن.

بۋحگالتەرلەر ءۇشىنشى جۇكتى ايەلگە 19 جەكە كاسىپكەرلىك اشقان. وعان جۇكتىلىك جانە بوسانۋ بويىنشا 3 981 292 تەڭگە, بالا 1,5 جاسقا تولعانعا دەيىن 169 417 تەڭگە تولەنگەن. ول دا بۋحگالتەرلەرگە 532 000 تەڭگە تولەم جاساعان. كەيبىر ايەلدەر ءتىپتى 1-2 ميلليون تەڭگە كولەمىندە سىياقى بەرگەن.

2023-2024 جىلدارى بۋحگالتەرلەر وسىلاي ونداعان ايەلدى ميلليونداعان الەۋمەتتىك تولەم الىپ, دەكرەتكە شىعارعان.

اقتوبە فيليالىنىڭ مالىمەتى بويىنشا, ولاردىڭ ارەكەتتەرى مەملەكەتكە 98 ميلليون تەڭگە زيان كەلتىرگەن. ەندى بۇل قاراجاتتى قايتارۋ كەرەك. سوتقا دەيىن گاۋحار 25 ميلليون تەڭگە وتەماقى تولەدى. قالعانىن گفسس فيليالى ازاماتتىق سوت ارقىلى تالاپ ەتۋدى جوسپارلاپ وتىر.

الاياقتىق ءۇشىن سوت بۋحگالتەر ايەلدەردى 6 جىلعا باس بوستاندىعىنان ايىردى. م ۇلىكتەرىن تاركىلەدى جانە بۋحگالتەرلىك قىزمەتپەن اينالىسۋ قۇقىعىنان 5 جىلعا ايىردى. بىراق بالالارى 14 جاسقا تولماعاندىقتان جازا 5 جىلعا كەيىنگە شەگەرىلدى.

سوتتالعانداردىڭ جىلجىمايتىن مۇلكىنە سالىنعان تاركىلەۋ شارالارى كۇشىندە قالدى. سونداي-اق مۇعالجار اۋدانىندا دا دەكرەت تولەمدەرىمەن بايلانىستى تاعى ءبىر داۋلى ءىس قارالۋدا. وندا مەملەكەتكە كەلتىرىلگەن زيان 187 ميلليون تەڭگە.