Dekretke mıllıonmen shyǵýǵa kómektesken eki qazaqstandyq 6 jylǵa sottaldy

Foto: freepik.com

Aqtóbede mıllıondaǵan aqshamen dekrettik demalysqa shyǵarýmen aınalysqan eki áıel 6 jylǵa sottaldy. Olar memleketke 98 mıllıon teńge shyǵyn ákelgen.

Bul týraly qandastar.kz aqparat agenttigi “Dıapazon”portalyna silteme jasap habarlaıdy.

2023 jyldan 2024 jylǵa deıin eki býhgalter aqtóbelik áıelderge dekrettik demalysqa shyqpas buryn ondaǵan jeke kásipker (IP) rásimdep, sol arqyly mıllıondaǵan áleýmettik tólemder aldyrtqan.

Sottalýshylardyń biri – 39 jastaǵy Gaýhar, ekinshisi – 28 jastaǵy Tursynaı. Ekeýi de jeke kásipker, býhgalterlik jáne salyq eseptiligin júrgizýmen aınalysqan. Olar alaıaqtyq áreketteri úshin sot aldynda jaýap berýde.

Is materıaldaryna sáıkes, Gaýhar áleýmettik jeliler arqyly «Dekretke mıllıonmen» atty kýrsqa qatysyp, onda áıelderdi dekretke shyqpas buryn jeke kásipker retinde tirkeý, jumys oryndaryn jasaý, áleýmettik jarnalardy durys tóleý arqyly kóp áleýmettik tólem alý joldaryn úırengen. Ol Instagram paraqshasynda «Dekretke mıllıonmen» degen jarnama jarııalap, júkti áıelderge mıllıon teńge alýǵa kómektesetinin aıtqan. Keıin osy isti óziniń býhgalter tanysyna tapsyrǵan. Ol da býhgalterlik jáne salyq eseptiligi boıynsha tájirıbesi bar, kásipkerlerge keńes bergen.

Birinshi klıentinen býhgalterler 1 mıllıon 64 myń teńge alǵan. Ol óz EP kiltin bergen. Al býhgalterler ony birden 12 jeke kásipker retinde tirkegen. Býhgalterler onyń atynan áleýmettik jarnalar – 235 200 teńge, zeınetaqy jarnalary – 144 000 teńge, medıınalyq saqtandyrýǵa – 72 000 teńge tólem jasaǵan. Keıin oǵan 12 jeke kásipkerlik arqyly aqshalaı jalaqy alǵanyn rastaıtyn jalǵan kassalyq qujattar toltyrǵan. Nátıjesinde oǵan júktilik jáne bosaný úshin 4 053 404 teńge áleýmettik tólem taǵaıyndalǵan. Sonymen qatar, bala 1,5 jasqa tolǵanǵa deıin aı saıyn 185 140 teńge tólengen. Aqsha shotqa túskennen keıin, áıel býhgalterlerge 532 000 teńge syıaqy retinde bergen.

Al ekinshi klıentti dekretke shyǵarda býhgalterler 13 jeke kásipkerlik rásimdegen. Oǵan da áleýmettik jarnalar men zeınetaqy, medıınalyq saqtandyrý jarnalary tólengen. Oǵan 2023 jyldyń naýryzynan 2024 jyldyń aqpanyna deıin jalaqy alǵanyn rastaıtyn jalǵan kassalyq qujattar toltyrylǵan. Osylaısha áıelge júktilik jáne bosaný boıynsha 4 070 501 teńge, bala kútimi úshin 1,5 jasqa deıin aı saıyn 204 167 teńge áleýmettik tólem taǵaıyndalǵan. Aqsha shotqa túskennen keıin áıel býhgalterlerge 532 000 teńge bergen.

Býhgalterler úshinshi júkti áıelge 19 jeke kásipkerlik ashqan. Oǵan júktilik jáne bosaný boıynsha 3 981 292 teńge, bala 1,5 jasqa tolǵanǵa deıin 169 417 teńge tólengen. Ol da býhgalterlerge 532 000 teńge tólem jasaǵan. Keıbir áıelder tipti 1-2 mıllıon teńge kóleminde syıaqy bergen.

2023-2024 jyldary býhgalterler osylaı ondaǵan áıeldi mıllıondaǵan áleýmettik tólem alyp, dekretke shyǵarǵan.

Aqtóbe fılıalynyń málimeti boıynsha, olardyń áreketteri memleketke 98 mıllıon teńge zııan keltirgen. Endi bul qarajatty qaıtarý kerek. Sotqa deıin Gaýhar 25 mıllıon teńge ótemaqy tóledi. Qalǵanyn GFSS fılıaly azamattyq sot arqyly talap etýdi josparlap otyr.

Alaıaqtyq úshin sot býhgalter áıelderdi 6 jylǵa bas bostandyǵynan aıyrdy. Múlikterin tárkiledi jáne býhgalterlik qyzmetpen aınalysý quqyǵynan 5 jylǵa aıyrdy. Biraq balalary 14 jasqa tolmaǵandyqtan jaza 5 jylǵa keıinge shegerildi.

Sottalǵandardyń jyljymaıtyn múlkine salynǵan tárkileý sharalary kúshinde qaldy. Sondaı-aq Muǵaljar aýdanynda da dekret tólemderimen baılanysty taǵy bir daýly is qaralýda. Onda memleketke keltirilgen zııan 187 mıllıon teńge.