«دەلايتە, مەن ءۇشىن جاستار توبەلەسەدى»: شەرزات بولاتقا قاتىستى سوت ىسىندە چيكا دەگەن كىم ەكەنى جانە ونىڭ بۇيرىق بەرگەن-بەرمەگەنى ايتىلدى

فوتو: كۋاگەر سانات ابدىقادىر جانە جابىرلەنۋشى قارجاۋباي نۇرىموۆ

قارجاۋباي نۇرىموۆتىڭ ايتۋىنشا, مارقۇم باۋىرى نۇرقانات عايىپباەۆ پەن سانات ابدىقادىر قول الىسىپ, باۋىرلارىنىڭ ەرەگىسىن شەشكەندەي بولعان. سول ساتتە ساناتتىڭ اۋزىنان «مەن توبەلەسپەيمىن عوي, شالمىن عوي. مەن ءۇشىن جاستار توبەلەسەدى» دەگەن سوزدەر شىققانىن ەستىگەن, دەپ جازدى qandastar.kz

كەيىن كەتىپ بارا جاتىپ, سانات «دەلايتە, جىگىتتەر» دەپ ايتقانىن دا بايقاعان. ال كۋاگەر سانات بۇل ايتىلعانداردى جوققا شىعارىپ, بۇل ءسوزدى مۇلدەم ايتپاعانىن مالىمدەدى. بۇل تۋرالى Stan.kzاقپارات اگەنتتىگى حابارلايدى.

5 مامىردا تالدىقورعاندا ءوتىپ جاتقان سوت وتىرىسىندا جابىرلەنۋشى قارجاۋباي نۇرىموۆ مەن وتكەن اپتادا سوت وتىرىسىندا كۋالىك ەتكەن سانات ابدىقادىردىڭ الدىن الا تەرگەۋ بارىسىنداعى بەتتەستىرۋ ۆيدەوسى كورسەتىلدى.

ۆيدەو ساناتتىڭ 28 ءساۋىر كۇنى جاۋابىنان كەيىن جانە تاعى كۋاگەرلەردىڭ سوزىنەن سوڭ كورسەتىلدى. كۋاگەرلەردىڭ ايتۋىنشا, دۇكەن الدىنا كەلگەن سوڭ «چيكا» ءازىل ارالاس سويلەسىپ, ءوزىن «شالمىن» دەپ تانىستىرعان. ارتىنشا دۇكەننىڭ ەسىگىن اشىپ, ىشكە كىرىپ «دەلايتە» دەپ دوستارىنا بۇيرىق بەرگەن. وسى سوزدەن كەيىن توبەلەس باستالعان. كۋاگەرلەردىڭ سوزىنشە «چيكا» دەپ تۇرعانى وسى سانات ابدىقادىر. سوتتا ول قاتتى مازاسىزدانىپ, ءجيى سۋ ىشكەن. جاۋاپ الۋ بارىسى 14 مينۋتقا سوزىلعان.

بەتتەستىرۋ ۆيدەوسىندا قارجاۋباي ءوزىنىڭ باۋىرى نۇرعانات عايىپباەۆپەن سانات ابدىقادىر قول بەرىپ امانداسقانىن جانە تاتۋلاسقانىن كورگەنىن ايتادى.

«ەكەۋى سويلەسىپ تۇرعان كەزدە دۇكەننىڭ الدىندا تۇردىم. سول كەزدە ەكەۋى قول بەرىسىپ جاتقاندا ساناتتىڭ اۋزىنان «مەن توبەلەسپەيمىن عوي, شالمىن عوي. مەن ءۇشىن جاستار توبەلەسەدى» دەگەن اڭگىمە شىقتى. كەيىن نۇرعاناتتان ءبارى دۇرىس پا دەپ سۇراعاندا باۋىرىم ءبارى جاقسى دەپ جاۋاپ بەردى. الايدا كەتىپ بارا جاتقاندا سانات «دەلايتە, جىگىتتەر» دەپ ايتتى. ساعات تۇنگى 00:35 ەدى, وسى اڭگىمەدەن سوڭ 00:40-تاردا «102-گە», جەدەل جاردەمگە حابارلاستىم. ەشقايسىسى تەلەفون تۇتقاسىن كوتەرمەدى. بۇدان كەيىن دۇكەننىڭ ارتقى جاعىندا وسىلاردىڭ, ياعني ءۇش ادامنىڭ تۇرعانىن كوردىم. كەيىن بۇلار جانە تاعى 2 قىز سىرا الۋ ۇشىنە دۇكەنگە كىردى. سوسىن دۇكەننىڭ ارتىندا توبەلەس باستالعانىن كورىپ, سىرا ساتىلمايدى دەپ شىعارىپ جىبەردىم», – دەدى قارجاۋباي.

قارجاۋباي سانات ابدىقادىردىڭ وقيعا ورنىندا بولعان جىگىتتەردىڭ ءبارىن تانيتىنىن, قول الىسىپ امانداسقانىن ايتادى.

«بالالاردىڭ اراسىندا ەڭ ءبىرىنشى بولىپ وسى – سانات سويلەستى. الگى توبەلەسكە قاتىسقان بالالار ءالى كەلمەگەن ەدى. سول كەزدە مارقۇم بالامنىڭ ءۇش-ءتورت دوسى كەلدى. جالپى ايتقاندا 20-عا جۋىق جاس بالالار ءجۇردى», – دەدى قارجاۋباي نۇرىموۆ.

الايدا بەتتەستىرۋ كەزىندە كۋاگەر بولعان سانات ابدىقادىر جابىرلەنۋشى قارجاۋبايدىڭ ءسوزىن جوققا شىعارىپ, «دەلايتە» دەگەن ءسوزدىڭ اۋزىنان مۇلدەم شىقپاعانىن ايتتى.