«Delaıte, men úshin jastar tóbelesedi»: Sherzat Bolatqa qatysty sot isinde Chıka degen kim ekeni jáne onyń buıryq bergen-bermegeni aıtyldy

Foto: Kýáger Sanat Ábdiqadyr jáne jábirlenýshi Qarjaýbaı Nurymov

Qarjaýbaı Nurymovtyń aıtýynsha, marqum baýyry Nurqanat Ǵaıypbaev pen Sanat Ábdiqadyr qol alysyp, baýyrlarynyń eregisin sheshkendeı bolǵan. Sol sátte Sanattyń aýzynan «Men tóbelespeımin ǵoı, shalmyn ǵoı. Men úshin jastar tóbelesedi» degen sózder shyqqanyn estigen, dep jazdy qandastar.kz

Keıin ketip bara jatyp, Sanat «delaıte, jigitter» dep aıtqanyn da baıqaǵan. Al kýáger Sanat bul aıtylǵandardy joqqa shyǵaryp, bul sózdi múldem aıtpaǵanyn málimdedi. Bul týraly Stan.kzaqparat agenttigi habarlaıdy.

5 mamyrda Taldyqorǵanda ótip jatqan sot otyrysynda jábirlenýshi Qarjaýbaı Nurymov men ótken aptada sot otyrysynda kýálik etken Sanat Ábdiqadyrdyń aldyn ala tergeý barysyndaǵy bettestirý vıdeosy kórsetildi.

Vıdeo Sanattyń 28 sáýir kúni jaýabynan keıin jáne taǵy kýágerlerdiń sózinen soń kórsetildi. Kýágerlerdiń aıtýynsha, dúken aldyna kelgen soń «Chıka» ázil aralas sóılesip, ózin «shalmyn» dep tanystyrǵan. Artynsha dúkenniń esigin ashyp, ishke kirip «Delaıte» dep dostaryna buıryq bergen. Osy sózden keıin tóbeles bastalǵan. Kýágerlerdiń sózinshe «Chıka» dep turǵany osy Sanat Ábdiqadyr. Sotta ol qatty mazasyzdanyp, jıi sý ishken. Jaýap alý barysy 14 mınýtqa sozylǵan.

Bettestirý vıdeosynda Qarjaýbaı óziniń baýyry Nurǵanat Ǵaıypbaevpen Sanat Ábdiqadyr qol berip amandasqanyn jáne tatýlasqanyn kórgenin aıtady.

«Ekeýi sóılesip turǵan kezde dúkenniń aldynda turdym. Sol kezde ekeýi qol berisip jatqanda Sanattyń aýzynan «Men tóbelespeımin ǵoı, shalmyn ǵoı. Men úshin jastar tóbelesedi» degen áńgime shyqty. Keıin Nurǵanattan bári durys pa dep suraǵanda baýyrym bári jaqsy dep jaýap berdi. Alaıda ketip bara jatqanda Sanat «delaıte, jigitter» dep aıtty. Saǵat túngi 00:35 edi, osy áńgimeden soń 00:40-tarda «102-ge», jedel járdemge habarlastym. Eshqaısysy telefon tutqasyn kótermedi. Budan keıin dúkenniń artqy jaǵynda osylardyń, ıaǵnı úsh adamnyń turǵanyn kórdim. Keıin bular jáne taǵy 2 qyz syra alý úshine dúkenge kirdi. Sosyn dúkenniń artynda tóbeles bastalǵanyn kórip, syra satylmaıdy dep shyǵaryp jiberdim», – dedi Qarjaýbaı.

Qarjaýbaı Sanat Ábdiqadyrdyń oqıǵa ornynda bolǵan jigitterdiń bárin tanıtynyn, qol alysyp amandasqanyn aıtady.

«Balalardyń arasynda eń birinshi bolyp osy – Sanat sóılesti. Álgi tóbeleske qatysqan balalar áli kelmegen edi. Sol kezde marqum balamnyń úsh-tórt dosy keldi. Jalpy aıtqanda 20-ǵa jýyq jas balalar júrdi», – dedi Qarjaýbaı Nurymov.

Alaıda bettestirý kezinde kýáger bolǵan Sanat Ábdiqadyr jábirlenýshi Qarjaýbaıdyń sózin joqqa shyǵaryp, «delaıte» degen sózdiń aýzynan múldem shyqpaǵanyn aıtty.