«دەنەسىن بالتالاپ تاستاعان»: الماتىدا شەتەل ازاماتىنىڭ ولىمىنە قاتىستى تەرگەۋ باستالدى

فوتو: Azattyq Rýhy/اسەت قۇنداقباەۆ

الماتىدا 50-گە تاياعان شەتەل ازاماتىنىڭ ولىمىنە قاتىستى تەرگەۋ باستالدى. كۇدىكتى رەتىندە بىرگە تۇراتىن كوڭىلدەسى قاماۋعا الىنعان. الايدا مارقۇمنىڭ قىزى اكەسىنىڭ اۋىرىپ باقيلىق بولعانىن ايتادى. ال دەنەسىن بولشەكتەپ ورتەلگەنىن, وتاعاسى كوزى تىرىسىندە ءوزى سۇراپتى-مىس. ياعني مارقۇم ۇستانعان ءدىننىڭ جورالعىسى سونداي دەيدى تۋىستارى. بۇل تۋرالى Azattyq Rýhy كتك ارناسىنا سىلتەمە جاساپ حابارلايدى.

جانتۇرشىگەرلىك وقيعا قالانىڭ ءتورتىنشى شاعىن اۋدانىندا بولدى. كوپقاباتتى ۇيدەگى پاتەرلەردىڭ بىرىنەن ەر ادامنىڭ بولشەكتەلگەن دەنەسى تابىلعان. ءمايىت تابىلعان پاتەرگە العاش بولىپ پوليتسەيلەرمەن بىرگە كۋا رەتىندە نۇرلان جاپارقۇلوۆ تا كىرىپتى. بالتالانعان 50 جاستاعى مارقۇمنىڭ دەنەسى ءالى كوز الدىندا.

 «بالتامەن شاۋىپ تاستاعان. ۆانناعا بولشەكتەپ-بولشەكتەپ كىرگىزىپ, جاتقىزىپ قويعان. بولشەكتەپ تاستاعاننان كەيىن ۇستىنەن وت جاققان. قارايىپ كەتكەن عوي, تىرناقتارى. ءبىر-ەكى ساۋساعى كۇيىپ كەتكەن, قاپ قارا بولىپ. ءار جەرىنەن جاققان. قولىنىڭ ۇستىنە قاعاز جاققان با, ايتەۋىر ورتەگەن», – دەدى اۋلا سىپىرۋشى نۇرلان جاپارقۇلوۆ.

ءوزىن مارقۇمنىڭ قىزىمىن دەپ تانىستىرعان كەلىنشەك اكەسىنىڭ دەرتتەن قايتىس بولعانىن ايتادى. بىراق نەمەن اۋىرعانىن ايتا المادى.

 «اكەمدى ەشكىم ولتىرمەدى. اۋىرىپ اجال قۇشتى. ول سكانديناۆتىق دىنگە سەنەتىن. ءتىرى كەزىندە, بىزگە «ولگەننەن كەيىن دەنەسىن بولشەكتەپ, ورتەپ جىبەرىڭدەر» دەپ ىلعي ايتاتىن. سكانديناۆتىق جەرلەۋ ءراسىمى بويىنشا, ءمايىتتى قايىققا سالىپ سۋعا جىبەرەدى. ارتىنان جانىپ تۇرعان جەبەنى ساداقپەن اتىپ, ءمايىتتى ورتەيدى», – دەدى مارقۇمنىڭ قىزى.

مارقۇم رەسەيدە تۋىپ وسكەن ەكەن. كەيىن قازاقستانعا كەلىپ, وتباسىن قۇرىپ, بالالى-شاعالى بولىپتى. ەكى قىزى بار. تاعى ءبىر قىزدى اسىراپ العان دەسەدى.

 «اكەم جەرلەۋ ءراسىمىن جۇرگىزۋدى وگەي قىزىنا تاپسىرعان. ويتكەنى ول ەموتسيونالدى, فيزيكالىق تۇرعىدان ارامىزداعى ەڭ مىقتىسى بولاتىن. اكەمىزدى امان الىپ قالا الماعاسىن, دەنەسىن سىرتقا شىعارا المايتىنىن ءتۇسىنىپ, پاتەردىڭ ىشىندەگى ۆاننادا ورتەيتىن بولىپ شەشتىك», – دەدى مارقۇمنىڭ قىزى.

الايدا سول ماڭداعى تۇرعىندار قىلمىستىڭ قىزعانىشتان بولعانىنا سەنىمدى. ويتكەنى اسىراندى دەگەن 20-نىڭ توڭىرەگىندەگى قىز مارقۇمنىڭ كوڭىلدەسى بولۋى مۇمكىن ەكەن.

ال ءتارتىپ ساقشىلارى ءبىر ادامنىڭ عانا قامالعانىن جەتكىزدى. ايەلى ما, كوڭىلدەسى مە, الدە وگەي قىزى ما, بەلگىسىز.

«اۋەزوۆ اۋدانى پوليتسيا باسقارماسى قىلمىستىق ءىس قوزعادى. كۇدىكتى ۇستالىپ, ۋاقىتشا ۇستاۋ يزولياتورىنا قامالدى. باسقا ءمان-جايى انىقتالىپ جاتىر», – دەدى الماتى قالاسى پد رەسمي وكىلى سالتانات ازىربەك.

مارقۇم شامامەن وسىدان بەس كۇن بۇرىن قايتىس بولعان ەكەن. سول ۋاقىت بويى بورشالانعان دەنەسى ۆاننادا جاتىپتى. كىسى قولىنان قازا تاپتى ما, الدە دەمى دەرتتەن ءۇزىلدى مە, بۇل سۇراقتىڭ جاۋابى ساراپتامادان كەيىن بەلگىلى بولماق.