«دەنەسىنە وتۆەرتكا تىعىپ العان»: شىمكەنتتە اۋلادان ءمايىتى تابىلعان ايەلدىڭ بالالارى اكەسىنىڭ قالاي ازاپتاعانىن ايتىپ بەردى

فوتو: مارقۇمنىڭ وتباسىنان

شىمكەنتتەگى كوپقاباتتى تۇرعىن ءۇيدىڭ اۋلاسىنان دەنەسى قانعا بويالعان ايەلدىڭ ءمايىتى تابىلدى. مارقۇمنىڭ تۋىستارى ونىڭ ءوز-وزىنە قول سالعانىنا سەنبەيدى, دەپ حابارلايدى qandastar.kz

5 اقپان كۇنى شىمكەنتتەگى كوپقاباتتى تۇرعىن ءۇيدىڭ اۋلاسىنان 42 جاستاعى شولپان اقمىرزانىڭ ءمايىتى تابىلدى. مارقۇمنىڭ ارتىندا جەتى بالاسى قالدى. ول قايتىس بولاردان ءبىر كۇن بۇرىن اجىراسىپ كەتكەن كۇيەۋىمەن قايتا تابىسقان. الايدا ارادا 1 كۇن وتكەندە تەرەزەدەن سەكىرىپ كوز جۇمعان.

«مەن ءوزى ولگەنىنە سەنبەيمىن. ءۇشىنشى قاباتتان سەكىرگەننىڭ وزىندە دە ونداي جاراقاتتار بولمايدى. ءىنىمنىڭ ايتىپ تۇرعان سوزىنە سەنەمىن. ۇرعان, سۇيرەگەن, تەرەزەدەن لاقتىرىپ جىبەرگەن دەيدى. ودان بۇرىن بىزدە كۇندە ۇرىس-كەرىس بولاتىن. انام 2020-دا زاڭدى تۇردە اجىراسسا دا, مەكەنجايىمىزدى ءبىلىپ, كۇندە ەسىك قاعىپ تۇراتىن», – دەيدى مارقۇمنىڭ قىزى پەريزات قالداربەك.

Qaz365.kz.جازعانداي,  قايعىلى وقيعانىڭ كۋاگەرلەرى – ايەلدىڭ 10 جاسقا تولماعان بالالارى. مارقۇمنىڭ تۋىستارى بالالارىنىڭ سوزىنە سەنەدى. ويتكەنى, ەر ادام تەرگەۋدە ايەلىنىڭ سۋيتسيد جاساعانىن مالىمدەگەن.

«ءتورت جاسار بالاسى ايتىپ وتىر. گانتەلمەن باسىن ۇرىپ-ۇرىپ قۇلاتقان. ودان كەيىن قاشىپ بارا جاتقاندا تىزەسىنەن تاعى گانتەلمەن ۇرعان. قۇلاعان ادامعا ۇقسامايدى. ابدەن بىلگەنىن ىستەپ, ۇرىپ-ۇرىپ, دەنەسىنە وتۆەرتكا, پىشاق تىعىپ, كوگالا قويداي قىلىپ تاستاعان» , – دەيدى مارقۇمنىڭ اپكەسى اقمارال اقمىرزا.

قارا جامىلعان وتباسى ءىستىڭ «ءوزىن-ءوزى ولتىرۋگە جەتكىزۋ» ەمەس, «ادام ءولتىرۋ» بابى بويىنشا تەرگەلۋىن تالاپ ەتەدى. ال جەرگىلىكتى پوليتسيا دەپارتامەنتى تەرگەۋ قۇپيالىلىعىن العا تارتىپ, ءىستىڭ قاي باپ بويىنشا جۇرگىزىلىپ جاتقانىن مالىمدەگەن جوق.

«ازاماتشانىڭ ءولىم جايتى بويىنشا پوليتسيامەن قىلمىستىق ءىستى تىركەگەن. قازىرگى تاڭدا وقيعانىڭ بارلىق ءمان-جايىن انىقتاۋ ءۇشىن تەرگەۋ ءىس-شارالارى جۇرگىزىلىپ جاتىر. سوت-مەديتسينالىق ساراپتاماسى جۇرگىزىلۋدە. كۇدىكتى قاماۋدا», – دەلىنگەن شىمكەنت قالاسى پوليتسيا دەپارتامەنتى حابارلاماسىندا.

ازاپتالىپ قازا تاپتى دەگەن شولپان اقمىرزا جولداسىمەن 22 جىل تۇرعان. ولار 4 جىل بۇرىن زاڭدى تۇردە اجىراسقان. بىراق كەيىن جولداسىمەن بىرنەشە رەت تابىسىپ, تاعى ەكى بالا دۇنيەگە كەلگەن. جەتى بالانىڭ ەكەۋى كامەلەت جاسىنا تولعان. ال قالعاندارى ازىرگە بالالار ۇيىندە. مارقۇم ساۋدا جاساپ, بالالارىن جالدامالى پاتەردە جالعىز ءوزى اسىراپ كەلگەن.