جاڭالىقتار
دەنيس تەندى ءولتىردى دەپ سوتتالعانداردىڭ جازاسى جەڭىلدەتىلدى
فوتو: Tengrinews.kz
قازاقستاندىق مانەرلەپ سىرعاناۋشى دەنيس تەننىڭ ومىردەن وتكەنىنە 6 جىل بولدى. سپورتشىنىڭ ولىمىنە كىنالىلەردىڭ جازاسىن قايدا جانە قالاي وتەپ جاتقانى بەلگىلى بولدى. سوت قىلمىسكەرلەردىڭ جازاسىن جەڭىلدەتتى. بۇل تۋرالى Stan.kz اقپارات اگەنتتىگى Tengrinwes.kz سايتىنا سىلتەمە جاساپ حابارلايدى.
نۇرالى قياسوۆ پەن ارمان قۇدايبەرگەنوۆ 2019 جىلى 17 قاڭتاردا دەنيس تەننىڭ ولىمىنە كىنالى دەپ تانىلىپ, 18 جىلعا باس بوستاندىعىنان ايىرىلدى. ولارعا جازاسىن قاتاڭ رەجيمدەگى كولونيادا وتەۋ تۋرالى ۇكىم شىقتى. سوتتالعاندار الماتى وبلىسى زارەچنىي كەنتىندەگى لا-155/12 تۇزەۋ مەكەمەسىنە جىبەرىلدى.
ال ولاردىڭ سىبايلاسى جانار تولىباەۆاعا 4 جىلعا باس بوستاندىعىنان ايىرۋ جازاسى تاعايىندالدى. ول جازاسىن قاۋىپسىزدىگى ورتاشا مەكەمەدە وتەدى. الايدا 2019 جىلدىڭ جەلتوقسانىندا ول قاماۋدان بوساتىلدى. سوت ونىڭ دەنساۋلىق جاعدايىن جانە قاماۋدا ەكىنشى بالاسىن دۇنيەگە اكەلگەنىن ەسكەرىپ, جازانىڭ وتەلمەگەن بولىگىن باس بوستاندىعىن شەكتەۋمەن اۋىستىرۋ تۋرالى شەشىم قابىلدادى. ول كەيىنىرەك كولونياعا ورالىپ, 2021 جىلدىڭ جەلتوقسانىندا تۇبەگەيلى بوساتىلدى.
اراعا ۋاقىت سالىپ سپورتشىنى ولتىرگەن قىلمىسكەرلەردىڭ جازاسى جەڭىلدەگەنى بەلگىلى بولدى.
“2023 جىلى 19 قازاندا قوناەۆ قالالىق سوتى الماتى وبلىسى بويىنشا قاج دەپارتامەنتىنىڭ №12 مەكەمەسى باسشىسىنىڭ قاتاڭ رەجيمدەگى مەكەمەدە وتىرعان نۇرالى قياسوۆتىڭ جازاسىن جەڭىلدەتۋ تۋرالى ۇسىنىسىن قارادى. بۇعان 2023 جىلعى ناۋرىزدا قابىلدانعان «كەيبىر زاڭنامالىق اكتىلەرگە قىلمىستىق ءىس جۇرگىزۋ جانە جازانى اتقارۋ سالاسىنداعى ادام قۇقىقتارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جاڭا زاڭ سەبەپ بولعان. زاڭعا سايكەس, قاساقانا قىلمىس جاساعانى ءۇشىن ەكى جىلدان استام مەرزىمگە سوتتالماعان, بۇرىن سوڭدى باس بوستاندىعىنان ايىرىلماعاندار جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەلەرىندە وتەۋى ءتيىس”, – دەپ جازدى باسىلىم.
سونداي-اق, الماتى وبلىسىنىڭ قىلمىستىق-اتقارۋ جۇيەسى دەپارتامەنتى 7 اي 29 تاۋلىك تەرگەۋ يزولياتورىندا بولۋ مەرزىمى كۇنىنە جارتى تاۋلىكپەن ەسەپتەلۋىن, ياعني تاعى 4 ايدى مەرزىمگە قوسۋدى ۇسىنعان.
سوت قازاقستان رەسپۋبليكاسىنىڭ 2023 جىلعى 17 ناۋرىزداعى زاڭىن باسشىلىققا الا وتىرىپ, الماتى وبلىسى جانە جەتىسۋ اۋدانى بويىنشا قىلمىستىق-اتقارۋ جۇيەسى دەپارتامەنتىنىڭ №12 مەكەمەسى باسشىسىنىڭ قاماۋدا ۇستاۋ مەرزىمىن ەسەپتەۋ تۋرالى ۇسىنىسىن قاناعاتتاندىرۋ تۋرالى شەشىم قابىلدادى. الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2019 جىلعى 17 قاڭتارداعى ۇكىمىمەن سوتتالعان قياسوۆ نۇرالى داۋلەتبەك ۇلىنا تاعايىندالعان جازانى وتەۋ ورنى قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسى بولىپ بەلگىلەندى.
ەكىنشى سوتتالۋشى ارمان قۇدايبەرگەنوۆكە دە قاتىستى وسىنداي ۇسىنىس قارالدى. سۋديا سونىمەن قاتار ونىڭ ۇكىم شىعارىلعانعا دەيىن قاماۋدا بولعان 4 ايىن ساناپ, ونى قاتاڭ رەجيمدەگى مەكەمەدەن قاۋىپسىزدىگى ورتاشا مەكەمەگە اۋىستىرۋ تۋرالى شەشىم شىعارعان.
“قازىر ارمان قۇدايبەرگەنوۆ پەن نۇرالى قياسوۆ جامبىل جانە شىعىس قازاقستان وبلىستارىنداعى قاۋىپسىزدىگى ورتاشا تۇزەۋ مەكەمەلەرىندە جازاسىن وتەپ جاتىر. ولار كولونيادا جۇمىس ىستەمەيدى, ويتكەنى وندا جۇمىس ورىندارى تاپشى. ولارعا قالىپتى جاعداي جاسالعان. قىلمىستىق-اتقارۋ كودەكسىنە سايكەس ولار جىلىنا ەكى ۇزاق جانە التى قىسقا مەرزىمدى كەزدەسۋگە شىعۋعا قۇقىلى”, – دەلىنگەن حابارلامادا.
بۇعان دەيىن ارمان قۇدايبەرگەنوۆ تە, نۇرالى قياسوۆ تا دەنساۋلىعىنا شاعىمدانباعان.
ايتا كەتسەك, دەنيس تەن 2018 جىلدىڭ 19 شىلدەسىندە ۇرىلار قولىنان قازا تاپتى.
قايعىلى وقيعا 2018 جىلدىڭ 19 شىلدەسىندە الماتىدا بولعان. دەنيس كافەدەن شىعىپ, كولىگىنىڭ اينالارىن ەكى جىگىتتىڭ ۇرلاپ جاتقانىن كورەدى. قاشا جونەلگەن ولاردى قۋىپ جەتكەن سپورتشىعا ءبىر ۇرى جامباسىنان پىشاق سالادى. ناتيجەسىندە ارتەرياسى زاقىمدالىپ, قوپ قان كەتەدى. كەيىن اۋرۋحانادا كوز جۇمدى.
