Denıs Tendi óltirdi dep sottalǵandardyń jazasy jeńildetildi

Foto: Tengrinews.kz

Qazaqstandyq mánerlep syrǵanaýshy Denıs Tenniń ómirden ótkenine 6 jyl boldy. Sportshynyń ólimine kinálilerdiń jazasyn qaıda jáne qalaı ótep jatqany belgili boldy. Sot qylmyskerlerdiń jazasyn jeńildetti. Bul týraly Stan.kz aqparat agenttigi Tengrinwes.kz saıtyna silteme jasap habarlaıdy.

Nuraly Qııasov pen Arman Qudaıbergenov 2019 jyly 17 qańtarda Denıs Tenniń ólimine kináli dep tanylyp, 18 jylǵa bas bostandyǵynan aıyryldy. Olarǵa jazasyn qatań rejımdegi kolonııada óteý týraly úkim shyqty. Sottalǵandar Almaty oblysy Zarechnyı kentindegi LA-155/12 túzeý mekemesine jiberildi.

Al olardyń sybaılasy Janar Tolybaevaǵa 4 jylǵa bas bostandyǵynan aıyrý jazasy taǵaıyndaldy. Ol jazasyn qaýipsizdigi ortasha mekemede ótedi. Alaıda 2019 jyldyń jeltoqsanynda ol qamaýdan bosatyldy. Sot onyń densaýlyq jaǵdaıyn jáne qamaýda ekinshi balasyn dúnıege ákelgenin eskerip, jazanyń ótelmegen bóligin bas bostandyǵyn shekteýmen aýystyrý týraly sheshim qabyldady. Ol keıinirek kolonııaǵa oralyp, 2021 jyldyń jeltoqsanynda túbegeıli bosatyldy.

Araǵa ýaqyt salyp sportshyny óltirgen qylmyskerlerdiń jazasy jeńildegeni belgili boldy.

“2023 jyly 19 qazanda Qonaev qalalyq soty Almaty oblysy boıynsha QAJ departamentiniń №12 mekemesi basshysynyń qatań rejımdegi mekemede otyrǵan Nuraly Qııasovtyń jazasyn jeńildetý týraly usynysyn qarady. Buǵan 2023 jylǵy naýryzda qabyldanǵan «Keıbir zańnamalyq aktilerge qylmystyq is júrgizý jáne jazany atqarý salasyndaǵy adam quqyqtary máseleleri boıynsha ózgerister men tolyqtyrýlar engizý týraly» jańa Zań sebep bolǵan. Zańǵa sáıkes, qasaqana qylmys jasaǵany úshin eki jyldan astam merzimge sottalmaǵan, buryn sońdy bas bostandyǵynan aıyrylmaǵandar jazasyn qylmystyq-atqarý júıesiniń qaýipsizdigi ortasha mekemelerinde óteýi tıis”, – dep jazdy basylym.

Sondaı-aq, Almaty oblysynyń qylmystyq-atqarý júıesi departamenti 7 aı 29 táýlik tergeý ızolıatorynda bolý merzimi kúnine jarty táýlikpen eseptelýin, ıaǵnı taǵy 4 aıdy merzimge qosýdy usynǵan.

Sot Qazaqstan Respýblıkasynyń 2023 jylǵy 17 naýryzdaǵy Zańyn basshylyqqa ala otyryp, Almaty oblysy jáne Jetisý aýdany boıynsha qylmystyq-atqarý júıesi departamentiniń №12 mekemesi basshysynyń qamaýda ustaý merzimin esepteý týraly usynysyn qanaǵattandyrý týraly sheshim qabyldady. Almaty qalasynyń qylmystyq ister jónindegi mamandandyrylǵan aýdanaralyq sotynyń 2019 jylǵy 17 qańtardaǵy úkimimen sottalǵan Qııasov Nuraly Daýletbekulyna taǵaıyndalǵan jazany óteý orny qylmystyq-atqarý júıesiniń qaýipsizdigi ortasha mekemesi bolyp belgilendi.

Ekinshi sottalýshy Arman Qudaıbergenovke de qatysty osyndaı usynys qaraldy. Sýdıa sonymen qatar onyń úkim shyǵarylǵanǵa deıin qamaýda bolǵan 4 aıyn sanap, ony qatań rejımdegi mekemeden qaýipsizdigi ortasha mekemege aýystyrý týraly sheshim shyǵarǵan.

“Qazir Arman Qudaıbergenov pen Nuraly Qııasov Jambyl jáne Shyǵys Qazaqstan oblystaryndaǵy qaýipsizdigi ortasha túzeý mekemelerinde jazasyn ótep jatyr. Olar kolonııada jumys istemeıdi, óıtkeni onda jumys oryndary tapshy. Olarǵa qalypty jaǵdaı jasalǵan. Qylmystyq-atqarý kodeksine sáıkes olar jylyna eki uzaq jáne alty qysqa merzimdi kezdesýge shyǵýǵa quqyly”, – delingen habarlamada.

Buǵan deıin Arman Qudaıbergenov te, Nuraly Qııasov ta densaýlyǵyna shaǵymdanbaǵan.

Aıta ketsek, Denıs Ten 2018 jyldyń 19 shildesinde urylar qolynan qaza tapty.

Qaıǵyly oqıǵa 2018 jyldyń 19 shildesinde Almatyda bolǵan. Denıs kafeden shyǵyp, kóliginiń aınalaryn eki jigittiń urlap jatqanyn kóredi. Qasha jónelgen olardy qýyp jetken sportshyǵa bir ury jambasynan pyshaq salady. Nátıjesinde arterııasy zaqymdalyp, qóp qan ketedi. Keıin aýrýhanada kóz jumdy.