جاڭالىقتار
دەپۋتات اباي وبلىسىن اباتتاندىرۋ ءۇشىن قوسىمشا قارجى سۇرادى
فوتو:اشىق دەرەككوز
ءماجىلىس دەپۋتاتى نۇرتاي سابيليانوۆ جاڭادان قۇرىلعان اباي وبلىسىنىڭ الەۋمەتتىك جانە ينفراقۇرىلىمدىق ماسەلەلەرىن شەشۋ ءۇشىن ۇكىمەتتەن قوسىمشا قاراجات ءبولۋدى سۇرادى, دەپ جازدى qandastar.kz
«مەملەكەت باسشىسى قاسىم-جومارت توقاەۆ ۇلتتىق قۇرىلتايدا ۇكىمەتكە جاڭا وبلىستارعا ەرەكشە كوڭىل ءبولۋدى تاپسىردى. بىراق اباي وبلىسىنداعى جاعدايدى ەسكەرسەك, كوپتەگەن ماسەلە ءالى كۇنگە دەيىن شەشىلمەگەن», – دەدى دەپۋتات.
سابيليانوۆتىڭ ايتۋىنشا, سەمەي قالاسىنداعى قوعامدىق كولىك جۇيەسى سىن كوتەرمەيدى. قازىر قالادا 424 اۆتوبۋس بار, ونىڭ 72%-ى (307 اۆتوبۋس) ەسكى, كەشكى ۋاقىتتا كولىك تاپشىلىعى ايقىن سەزىلەدى.
«قوعامدىق كولىك قىزمەتىن اتقاراتىن 5 كومپانيا 2022-2024 جىلدارى 18,7 ملرد تەڭگە سۋبسيديا العان. بىراق بۇل ماسەلەنى تولىق شەشپەدى», – دەدى دەپۋتات.
20 مىڭنان استام ادام تۇرعىن ءۇي كەزەگىندە تۇر
دەپۋتاتتىڭ مالىمەتىنشە, اباي وبلىسىندا 20 600 ادام تۇرعىن ءۇي كەزەگىندە تۇر, ونىڭ ىشىندە سەمەي قالاسىندا – 14 600 ادام. كەزەكتە تۇرعانداردىڭ قاتارىندا كوپبالالى انالار, الەۋمەتتىك وسال توپتار, جەتىم بالالار بار.
«بۇل ماسەلەنى شەشۋ ءۇشىن قوماقتى قاراجات قاجەت. ۇكىمەتتەن ارنايى قارجى ءبولۋ كەرەك», – دەدى سابيليانوۆ.
اباي وبلىسىندا سانيتارلىق جانە جەدەل جاردەم كولىكتەرىنىڭ 63%-ى (200 كولىك) توزعان, ونىڭ 21%-ى (67 كولىك) 2010 جىلعا دەيىن شىعارىلعان.
«مۇنداي جاعدايدا العاشقى مەديتسينالىق كومەك كورسەتۋ قيىندايدى. سوندىقتان بۇل ماسەلەنى شەشۋ ءۇشىن بيۋدجەتتەن 5 ملرد تەڭگە ءبولۋدى سۇرايمىن», – دەدى دەپۋتات.
2023 جىلعى 28 جەلتوقسانداعى پرەزيدەنت جارلىعىمەن اباي وبلىسىندا ماقانشى جانە جاڭاسەمەي اۋداندارى قۇرىلدى. الايدا, بۇل اۋداندارداعى مەملەكەتتىك مەكەمەلەردىڭ عيماراتتارى مەن حالىققا قىزمەت كورسەتۋ ورتالىقتارىن سالۋعا 13,2 ملرد تەڭگە ءبولۋ تۋرالى ۇسىنىس ۇكىمەت تاراپىنان قولداۋ تاپپاعان.
«جاڭا اۋدانداردى قاجەتتى ينفراقۇرىلىممەن قامتاماسىز ەتۋ كەرەك. بۇل ماسەلە شەشىمىن تابۋعا ءتيىس», – دەدى سابيليانوۆ.
اباي وبلىسىندا 30 ەلدى مەكەندى اۋىز سۋمەن قامتۋ ءۇشىن 15 ملرد تەڭگە قاجەت. دەپۋتات بۇل قاراجاتتى ءبولۋ تۋرالى ۇسىنىس ەنگىزگەن, بىراق ۇكىمەت تولىق كولەمدە قارجى بولمەگەن.
سونىمەن قاتار, وڭىردە:
- سپورت كەشەندەرى, مادەنيەت ۇيلەرى, وقۋشىلار سارايى قاجەت.
- بوزاي, تاسساي, ۇشبيىك اۋىلدارىنداعى سۋ تاسقىنىنان بۇزىلعان كوپىرلەردى قالپىنا كەلتىرۋ كەرەك.
وسى ماسەلەلەرگە 30 ملرد تەڭگە ءبولۋ قاجەت.
«اباي وبلىسى جاڭا قۇرىلسا دا, تۇرعىنداردىڭ ءومىر ءسۇرۋ ساپاسىن جاقسارتۋ ءۇشىن قوسىمشا قاراجات قاجەت. سوندىقتان ۇكىمەت اتالعان ماسەلەلەردى قاراستىرىپ, تەز ارادا شەشىم قابىلداۋى كەرەك», – دەدى نۇرتاي سابيليانوۆ.
