دەپۋتات ايداربەك حودجانازاروۆ قىزمەتتىك پاتەر مەن كولىكتەن نەگە باس تارتقانىن ءتۇسىندىردى

فوتو: instagram.com/a1darbek?

Respublica پارتياسىنىڭ توراعاسى, پارلامەنت ءماجىلىسىنىڭ دەپۋتاتى ايداربەك حودجانازاروۆ «ايگەرىم سەيفوللانىڭ سىرلاسۋىنا» بەرگەن سۇحباتىندا دەپۋتاتتىق قىزمەتىنە بايلانىستى بەرىلەتىن پاتەر, كولىك جانە جالاقىدان نەلىكتەن باس تارتقانىن ءتۇسىندىردى, — دەپ حابارلايدى Massaget.kz تىلشىسى.

دەپۋتاتتىڭ سوزىنشە, كولىك پەن باسپانا وزىندە بار, سوندىقتان وعان مەملەكەتتىك دۇنيە كەرەك ەمەس. ال جالاقىسى قايىرىمدىلىققا جۇمسالادى.

«كولىككە كەلەتىن بولساق, سەبەبى مەنىڭ ءوزىمنىڭ كولىگىم بار. ماعان ءوز كولىگىممەن جۇرگەن ىڭعايلى. وندا مەنىڭ زاتتارىم جاتادى, ۇيرەنىپ قالعانمىن. مەن سونداي ادەتتىڭ ادامىمىن, ەگەر ماعان بىرنارسە ۇناسا, ونى ءبىرشاما ۋاقىت قولدانامىن. ال مەملەكەتتىڭ كولىگىنىڭ ماعان قاجەتى جوق, مەنىڭ ءوزىمنىڭ جۇرگىزۋشىم بار, ول ءوز جۇمىسىن بىلەدى, مەنى جانە مىنەزىمدى بىلەدى. ال پاتەرگە كەلەتىن بولساق, بىرنەشە جىلعا ءبىر ۇيگە كوشىپ, كەيىن ۋاقىت اياقتالعان سوڭ باسقا ۇيگە كوشۋ دەگەن, بىرىنشىدەن, وتباسى ءۇشىن قيىن, ەكىنشىدەن, مەنىڭ بالالارىم كوپ, ولاردىڭ بارىنە ءۇي قايدان تابادى? مەنىڭ ءوز بالا-شاعاما ارنالعان ءۇيىم بار, سوندىقتان مەملەكەتتىك باسپانانى باسقا بىرەۋگە بەرسىن دەدىم. ءۇي مەن كولىك ىڭعايلىلىقتىڭ ماسەلەسى. وعان قوسا, ءۇي مەن كولىك مەندە بار, ونى نە ىستەيمىن? ول مەملەكەتتىڭ دۇنيەسى, جەكە زاتىم ەمەس. بىرەۋدىڭ ۇيىندە تۇرۋ قيىن. ال جالاقىعا كەلەتىن بولساق, مەن اسحات مىرزامەن بۇرىننان تانىسپىن, بىرگە قانشاما جۇمىس ىستەدىك, جوبادا بىرگە جەتەكشىلىك ەتتىك. مەن اسحات مىرزاعا مەنىڭ قايىرىمدىلىق جاسايتىنىم تۋرالى ەشكىمگە ايتپاڭىز دەپ ايتىپ قويىپ ەدىم, بىراق ماعان بۇدان ارتىق شىداي المايتىنىن جەتكىزىپ, وسى جاقىندا «بىزگە كومەكتەسىپ جۇرگەن ايداربەك مىرزا» دەپ ايتتى. مەنىڭ جالاقىم قايىرىمدىلىققا كەتەدى. بۇل — ءبىرىنشى كەزەكتە, مەن سياقتى كاسىپكەر, دەپۋتاتتارعا ۇلگى بولسىن دەيمىن, ەكىنشى كەزەكتە — مەن اقشا ءۇشىن, بىلعارى كوستيۋم ءۇشىن, كابينەت ءۇشىن پارتياعا كەلگەن جوقپىن دەگەن بەلگى. مەن حالىقتىڭ اقشاسىن جەپ جاتقان جوقپىن, مەن حالىققا تەگىن قىزمەت جاساۋعا كەلدىم دەگەن نيەتتى كورسەتۋ ءۇشىن. مەن جالاقىنى باسقا دا قايىرىمدىلىق تۇرىنە جۇمساي الامىن, بىراق ناقتى بۇل ءىس-ارەكەتىم حالىققا بەلگى بولدى. بۇل شەشىمىمدى حالىق وڭ باعالاپ جاتىر ەكەن, سوندىقتان ءالى كۇنگە دەيىن مۇنى دۇرىس قادام دەپ سانايمىن. ءارتۇرلى پىكىر ايتىلىپ جاتادى. كوپ ادام مۇنى پوپۋليستىك قادام دەپ قابىلداپتى, بىراق جىلىنا جايدان-جاي 11-12 ميلليون تەڭگەنى لاقتىرۋ دا وڭاي ەمەس», — دەدى ول.

ايتا كەتەيىك, ايداربەك حودجانازاروۆ — 1983 جىلى دۇنيەگە كەلگەن. ول بۇگىندە Respublica پارتياسىنىڭ توراعاسى, پارلامەنت ءماجىلىسىنىڭ دەپۋتاتى, ءماجىلىستىڭ اگرارلىق ماسەلەلەر جونىندەگى كوميتەتىنىڭ مۇشەسى, «Alto Logistics» جشس (بۇرىنعى «Olzha Logistics» جشس) تەڭ يەسى جانە «ولجا اگرو» كومپانيالار توبىنىڭ بۇرىنعى باس ديرەكتورى.

«اتامەكەن» ۇكپ تورالقاسىنىڭ مۇشەسى جانە قوستاناي وبلىسى كاسىپكەرلەر پالاتاسى وڭىرلىك كەڭەسىنىڭ توراعاسى.

قوستاناي وبلىسى دجيۋ-دجيتسۋ فەدەراتسياسىنىڭ جانە گرەپپلينگ سپورتتىق كۇرەس فەدەراتسياسىنىڭ (UWW) پرەزيدەنتى, «كوكپار» فەدەراتسياسىنىڭ قۇرمەتتى پرەزيدەنتى.