جاڭالىقتار
دەپۋتات: اقتاۋداعى اپاتقا قاتىستى تەرگەۋ اشىق ءجۇرىپ جاتىر
فوتو: اشىق دەرەككوز
ءماجىلىس دەپۋتاتى, ماجىلىستەگى «AMANAT» فراكتسياسىنىڭ جەتەكشىسى ەلنۇر بەيسەنباەۆ اقتاۋداعى ازەربايجاننىڭ اپاتقا ۇشىراعان ۇشاعىنا قاتىستى پىكىر ءبىلدىردى, دەپ جازدى qandastar.kz
«بيىلعى كىبىسە جىلدىڭ سوڭىندا جۇزدەگەن ادامنىڭ قازا تابۋىنا اكەلگەن اۋىر ۇشاق اپاتتارى بولدى. ونىڭ ءبىرى – ازەربايجان ۇشاعىنىڭ اقتاۋ قالاسىندا اپاتقا ۇشىراۋى.
قىسقا ۋاقىت ىشىندە بۇل ماسەلە ساياسيلانىپ, الەمدىك باق بەتتەرىندە كوپ تالقىلانىپ, ءتۇرلى پىكىرلەر ايتىلعان تاقىرىپقا اينالدى. ويتكەنى بۇل اپاتقا بىزبەن شەكارالاس بىرنەشە ەلدىڭ تىكەلەي قاتىسى بار.
وسى رەتتە, جاعدايدىڭ كۇردەلىلىگىنە بايلانىستى مەملەكەت باسشىسىنىڭ تاپسىرماسىمەن ارنايى ۇكىمەتتىك كوميسسيا قۇرىلىپ, اپات بويىنشا ءاربىر قابىلداناتىن شەشىم بۇقارالىق اقپارات قۇرالدارىندا بۇكپەسىز تاراتىلىپ جاتىر», – دەدى حالىق قالاۋلىسى.
ونىڭ ايتۋىنشا, تەرگەۋ امالدارىنا ەشبىر مۇددەلى مەملەكەتتەر تاراپىنان قىسىمعا جول بەرىلمەي, ول تەك قانا حالىقارالىق تالاپتارعا ساي جان-جاقتى زەرتتەلىپ جاتىر. بۇل – قازاقستاننىڭ مىزعىماس ءارى نىق ۇستانىمى.
«وعان دالەل – زارداپ شەككەن مەملەكەتتەردىڭ ساياسي قىسىمىنا قاراماستان, قازاقستان باسشىلىعى ازەربايجان ۇشاعىنىڭ قارا جاشىكتەرىن برازيليانىڭ اۋە اپاتتارىن تەرگەۋ جانە الدىن الۋ ورتالىعىنا (CENIPA) بەرۋ تۋرالى شەشىم قابىلداۋى. بۇل – تاۋەلسىز قازاقستاننىڭ دەربەس پوزيتسياسى.
باۋىرلاس جانە كورشى ازەربايجان, رەسەي, قىرعىزستان جانە قازاقستان ەلدەرىنىڭ اراسىنداعى بەيتاراپتىقتى ساقتاۋ ماقساتىندا تەرگەۋ امالدارىن الەم قاۋىمداستىعىنىڭ سەنىمىن تۋدىراتىنداي ماقساتتا جۇرگىزۋ – ءبىز ءۇشىن باستى ورىندا ەكەنىن پرەزيدەنتىمىز ناقتى كورسەتتى.
ويتكەنى الەم كوز تىگىپ وتىرعان وسى اپات بويىنشا تەرگەۋدى ءادىل جانە وزىق حالىقارالىق ستاندارتتارعا ساي جۇرگىزۋ ەلىمىزدىڭ ابىرويى مەن بەدەلى ءۇشىن وتە ماڭىزدى.
بۇل – ءبىزدىڭ ىرگەلى ەل رەتىندەگى بۇلجىماس قاعيدامىز»,– دەدى ە. بەيسەنباەۆ.
