جاڭالىقتار
دەپۋتات: بالا اسىراپ العىسى كەلەتىندەر كەدەرگىلەرگە تاپ بولادى
فوتو:Caravan.kz
ەلىمىزدە بالا اسىراپ الۋ ءۇردىسى باياۋ ءجۇرىپ جاتىر, دەپ جازدى qandastar.kz
رەسمي دەرەكتەرگە سايكەس, ەلىمىزدە 21 387 جەتىم جانە اتا-اناسىنىڭ قامقورلىعىنسىز قالعان بالا بار. ماسەلەن, 5 مىڭنان استام ازامات بالا اسىراپ الۋ كەزەگىندە تۇرعانىمەن, 2023 جىلى – 194, 2024 جىلى 153 بالا عانا ءوز وتباسىن تاپقان ەكەن. دەپۋتات گەننادي شيپوۆسكيح بالا اسىراپ العىسى كەلەتىندەر بيۋروكراتيالىق كەدەرگىلەرگە تاپ بولاتىنىن ايتتى. سەبەبى پروتسەستىڭ ءوزى بىرنەشە ايعا, ءتىپتى جىلدارعا سوزىلىپ كەتەدى.
«ولاردىڭ ارقايسىسى تولىققاندى وتباسىندا تاربيەلەنۋگە لايىقتى. سوندىقتان, مەملەكەت تاراپىنان قابىلدانىپ جاتقان باعدارلامالار مەن زاڭنامالىق شارالار ولاردىڭ شىنايى قاجەتتىلىكتەرىنە ساي بولۋى كەرەك. وكىنىشكە قاراي, كوپتەگەن جەتىمدەرىمىز بالالار ۇيىندە تاربيەلەنىپ, وتباسىنىڭ جىلۋىن سەزىنبەي وسەدى. بۇل ولاردىڭ بولاشاقتا قوعامعا بەيىمدەلۋىن قيىنداتادى», – دەدى شيپوۆسكيح.
سەنات دەپۋتاتى بۇل ماسەلەنى وڭتايلى شەشۋ ءۇشىن بالا اسىراپ الۋ ءراسىمىن جەڭىلدەتۋدى, تسيفرلاندىرۋدى, سونداي-اق ۇمىتكەرلەردى قولداۋ مەحانيزمدەرىن كۇشەيتۋدى ۇسىندى.
