ءبىلىم
دەپۋتات: ءبىلىم بەرۋ سالاسىندا 303 قىلمىستىق ءىس تىركەلگەن
فوتو:پارلامەنت
ءماجىلىس دەپۋتاتى تەمىر قىرىقباەۆ مىناداي دەرەكپەن ءبولىستى, دەپ جازادى qandastar.kz.
سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتى بويىنشا, 2023 جىلدىڭ باسىنان بەرى ءبىلىم بەرۋ سالاسىندا 303 قىلمىستىق ءىس تىركەلىپ, ول جالپى شىعىن 17,5 ملرد تەڭگەنى قۇراعان.
قارجىنى كوپ جىمقىرعان فاكتىلەر جەتىسۋ, تۇركىستان, قىزىلوردا, الماتى وبلىسىندا جانە الماتى قالاسىندا انىقتالعان. بۇل ايماقتاردا قارجىلىق باقىلاۋدىڭ السىزدىگى بايقالادى. دەرەكتى تەرەڭ تالدايتىن بولساق, 249 ادام جاۋاپكەرشىلىككە تارتىلعان. ولاردىڭ اراسىندا 10 ءبىلىم ءبولىمىنىڭ باسشىسى, 2 كوللەدج ديرەكتورى, 28 مەكتەپ ديرەكتورى, 21 بالاباقشا باسشىسى جانە 136 ەسەپشى بار, — دەدى تەمىر قىرىقباەۆ.
ونىڭ سوزىنشە, پەداگوگيكالىق كادردى ىرىكتەۋدىڭ جاڭا ەرەجەسى ەنگىزىلگەنىنە قاراماستان, بۇرىنعى زاڭسىزدىقتاردى اينالىپ ءوتۋ جانە جەمقورلىق تاۋەكەلىن تۋدىرۋ مۇمكىندىگى ساقتالىپ وتىر.
حالىق اراسىندا مەكتەپكە جۇمىسقا ورنالاسۋ ءۇشىن ديرەكتورعا نەمەسە باسقارما قىزمەتكەرىنە «زاڭسىز سىياقى» بەرۋ قاجەت دەگەن قاۋەسەت جەلدەي ەسىپ ءجۇر.
ويتكەنى وڭتۇستىك وڭىردە جۇمىسسىزدىق ستاتيستيكادا كورسەتىلگەننەن الدە قايدا جوعارى. اۋىلدىق جەرلەردە مەكتەپ, بالاباقشا, كلۋب ۇيىنەن باسقا جۇمىس كوزى تاپشى. سوندىقتان مۇعالىم بولۋعا تالپىناتىندار تىم كوپ. ءتىپتى لابورانت نەمەسە تەحنيكالىق قىزمەتكەر بولۋ ءۇشىن دە زاڭسىز اقشا بەرۋ جاعدايلارى كەزدەسەدى. سونىمەن قاتار قىزمەتكەرلەردىڭ جۇمىستان شىقپاۋ ءۇشىن جالاقىسىنىڭ ءبىر بولىگىن بەرۋ فاكتىلەرى تۋرالى دا ايتىلىپ ءجۇر, — دەدى قىرىقباەۆ.
دەپۋتات مىناداي ۇسىنىس ايتتى:
1) «ەلەكتروندىق مەكتەپ» سىندى ەلەكتروندىق جۇيەلەردى ەنگىزىپ, ءبىلىم بەرۋ سالاسىنداعى كادرلاردى باسقارۋدىڭ بىرىڭعاي ەلەكتروندىق بازاسىن قۇرۋدى تەزدەتۋ;
2) جۇمىسقا ورنالاسۋ پروتسەسىنىڭ اشىقتىعىن قامتاماسىز ەتىپ, پەداگوگيكالىق كادرلاردى ىرىكتەۋدىڭ اشىق جانە ءادىل جۇيەسىن قامتاماسىز ەتۋ;
3) قوعامدىق باقىلاۋدى كۇشەيتۋ ماڭىزدى. ياعني اتا-انالار كوميتەتى جانە باسقا قوعامدىق ۇيىمداردىڭ ءبىلىم بەرۋ پروتسەسىنە جانە قارجىلىق قىزمەتكە قاتىسۋىن كەڭەيتۋ.
