دەپۋتات دجەي لونىڭ كونتسەرتىنە كوپ پوليتسەي تارتىلعانىنا نارازى

فوتو: الەۋمەتتىك جەلى

ءماجىلىس دەپۋتاتى ولجاس قۇسپەكوۆ كوممەرتسيالىق ءىس-شارالاردا پوليتسيا قىزمەتكەرلەرىن ەمەس, جەكە كۇزەتتى تارتۋ كەرەك ەكەنىن جەتكىزدى, دەپ حابارلايدى  qandastar.kz     Dalanews.kz-كە سىلتەمە جاساپ.

ونىڭ ايتۋىنشا, كەيىنگى كەزدە قازاقستاندا ءىرى كونتسەرتتەر مەن سپورتتىق ماتچتار ءجيى ءوتىپ جاتىر.

«استانادا وتكەن دجەننيفەر لوپەستىڭ كونتسەرتىنە شامامەن 1300 پوليتسەي, ال الماتىدا 2240 پوليتسيا قىزمەتكەرى, اسكەري مەن ەرىكتى جۇمىلدىرىلدى. سونىڭ سالدارىنان پارادوكس جاعداي قالىپتاسادى: جاپپاي شوۋ مەن كونتسەرتتەرگە بۇكىل جەكە قۇرام تارتىلادى دا, كوشەلەردى پاترۋلدەۋگە ادام قالمايدى», – دەدى دەپۋتات.

ولجاس قۇسپەكوۆ مەملەكەتتىك رەسۋرستاردى ءتيىمدى ءارى ماقساتتى پايدالانۋ قاجەت ەكەنىن ايتىپ, كوممەرتسيالىق ءىس-شارالاردىڭ قاۋىپسىزدىگىن قامتاماسىز ەتۋ مىندەتىن جەكە سەكتورعا جۇكتەۋ قيسىندى ەكەنىن جەتكىزدى.

«بۇگىندە ەلىمىزدە 4 مىڭعا جۋىق جەكە كۇزەت ۇيىمى جۇمىس ىستەيدى. وندا 100 مىڭنان اسا كاسىبي قىزمەتكەر بار, ولار بۇل مىندەتتى ءوز موينىنا الۋعا دايىن», – دەدى ول.