دەپۋتات ەدىل جاڭبىرشين قىز الىپ قاشۋ ماسەلەسىن كوتەردى

فوتو: اشىق دەرەككوز

بۇگىنگى ءماجىلىس وتىرىسىندا ءبىر توپ دەپۋتات قىز الىپ قاشۋ ماسەلەسىن كوتەردى, دەپ حابارلايدى qandastar.kz

دەپۋتات مۇرات ابەنوۆ ساحنادا ايتىلىپ جۇرگەن اندەردى سىناپ, ولاردىڭ ماتىنىندە قىز الىپ قاشۋ دارىپتەلىپ جاتقانىن مالىمدەدى.

«وتكەن اپتادا استانادا ءبىر ۋنيۆەرسيتەت ستۋدەنتتەرىمەن كەزدەستىم. …قىز بالالار ماعان ءبىر روليك كورسەتتى. قىز بالانى الىپ قاشقان. قاسىندا بىرەۋ كوندىرىپ, ء«وز ەركىممەن كەلدىم دەپ جاز» دەپ ايتىپ وتىر. TikTok-تا تۇر. بارلىعى مازاق قىلىپ, سونى ايتىپ جاتىر. قۇقىقبۇزۋشىلىق. ناعىز زاڭبۇزۋشىلىق.

بەلگىلى انشىلەر ساحنادا وسىلاي ءان ايتىپ جاتىر: «الىپ قاشامىن, مەيلى ولاي قالاما. كەلىن قىلامىن, سەنى قالاي دا اناما» دەيدى. ەكىنشى ءانشى ايتادى. «كورەسىڭ, مەنىڭ ۇيىمە باراسىڭ, باسىڭا اپپاق ورامال تاعاسىڭ, كوندىرەمىن, كونەسىڭ. قىز بولىپ كەلەسىڭ, كەلىن بولىپ قالاسىڭ» دەيدى. مىنە, ماجبۇرلەۋ. سونى تەلەديداردان ناسيحاتتاپ, كورسەتىپ جاتىرمىز», — دەدى ول.

ءماجىلىس دەپۋتاتى ەدىل جاڭبىرشين دە بۇل ماسەلە كەلەكە قىلاتىن, كۇلەتىن نارسە ەمەس ەكەنىن ايتتى.

ء«بارىمىز دە قىز اسىراپ وتىرمىز. ول — ەتەك الىپ كەتكەن جاعداي. ءححى عاسىردا اكە-شەشەسىمەن كەلىسپەي, قىزبەن ءسوز بايلاسپاي, كوشەدەن كورىنگەن ادامدى سالىپ الۋ تاۋار ەمەس, زات ەمەس, ول ادام عوي. ونىڭ تاعدىرىنا اسەر ەتەدى. بۇل زاڭ اياسىندا قارالاتىن نارسە ەمەس شىعار, بىراق پارلامەنتتىڭ تورىندە قوعامداعى كەز كەلگەن وزەكتى ماسەلە تالقىلانۋى كەرەك دەپ پرەزيدەنت ايتقان جوق پا? جىگىتتەردى تۇسىنبەيمىن. قىزدىڭ كوڭىلىن تابا المايتىن جىگىت نە قىلعان جىگىت?! كوشەگە بارىپ, قىزدى بۇكتەپ-بۇكتەپ سالىپ الادى دەگەن… مەنىڭ ءۇش قىزىم بار. الدىنان ءوتىپ, ءسوز بايلاسىپ, قۇدا ءتۇسىپ العاندى ءبارىمىز دە جاقسى كورەمىز. مىناۋ — قوعامداعى ۇلكەن دەرت. قىلمىستىق جاۋاپكەرشىلىك قاراستىرىلۋى كەرەك» — دەدى ول.