دەپۋتات ەلدىڭ ىشكى ساياساتى قالاۋ جۇمىس ىستەۋ كەرەكتىگىن ايتتى

فوتو: parlam.kz

ىشكى ساياسات ەڭ ءبىرىنشى ۇلتتىق مۇددەگە, مەملەكەتتىك ساياساتقا قىزمەت ەتۋى كەرەك. مۇنداي پىكىردى BIZDIÑ ORTA پودكاسىندا ءماجىلىس دەپتۋتاتى ەرمۇرات ءباپي ءبىلدىردى, دەپ حابارلايدى qandastar.kz

— قازىرگى كەزدە قاراپ وتىرساق, بىزدەگى ىشكى ساياسات ءاربىر اكىمنىڭ تىكەلەي مۇراسى بولىپ كەتتى. ءار اكىمنىڭ ىشكى ساياساتى بار. ىشكى ساياسات ءبولىمىنىڭ ءبارى اكىمدەرگە قىزمەت ەتەدى. ىشكى ساياسات ەڭ ءبىرىنشى ۇلتقا, ۇلتتىق مۇددەگە, مەملەكەتتىك ساياساتقا قىزمەت ەتۋى كەرەك. ودان كەيىن عانا ۋاقىتى قالسا اكىمنىڭ اناۋ-مىناۋ ءىس-شاراسىنا, بارىپ كەل, شاۋىپ كەلىنە قىزمەت ەتۋى قاجەت. ەڭ باستىسى ءبىزدىڭ مەملەكەتتىگىمىز. ال مەملەكەتتىڭ نەگىزگى كەرەگەسىن, ۋىعىن ىشكى ساياسات ۇستاپ تۇرۋى ءتيىس. وسى تۇرعىدان كەلگەندە كوپتەن بەرى سۇرانىستا بولعان قۇجات (ىشكى ساياساتتاعى شارۋانىڭ ءبارىن جۇيەلەيتىن ءبىرتۇتاس تۇجىرىمدامالىق قۇجات) دەپ ەسەپتەيمىن, — دەدى ەرمۇرات ءباپي.

ءماجىلىس دەپۋتاتى اتالعان قۇجاتتى ازىرلەۋگە, دەپۋتاتتار, مەملەكەتتىك ورگاندارمەن قوعامدىق ينستيتۋتتار قاتىسۋى كەرەكتىگىن ايتادى.

وسى ورايدا ءماجىلىس دەپۋتاتى ەدىل جاڭبىرشين وسىدان ءبىراز ۋاقىت بۇرىن ىشكى ساياسات باسقارمالارىن وزگەرتۋ كەرەكتىگى تۋرالى ۇكىمەت اتىنان دەپۋتاتتىق ساۋال جولداعانىن اتاپ ءوتتى.

— ىشكى ساياسات دەگەننەن كەتىپ, قوعاممەن بايلانىس دەپارتامەنتتەرىن قۇرۋ تۋرالى ۇسىنىس بەرگەن ەدىم. ەستيتىن مەملەكەتتىڭ ءپرينتسيپىن ارى قاراي ىسكە اسىرۋىمىز قاجەت. ىشكى ساياسات باسقارمالارى اقپاراتپەن جانە ناسيحاتپەن اينالىسادى. ەكىجاقتى بىردەي سەرىكتەستىك مودەلى جوق. ءبىز بۇرىنعى قالىپ قويعان اكىمشىلىك-كوماندالىق مەملەكەت باسقارۋدىڭ ەلەمەنتتەرىن ءالى ۇستانىپ وتىرمىز. ەندى پرەزيدەنتتىڭ «ەستيتىن مەملەكەت» ءپرينتسيپىن الار بولساق, وندا جەرگىلىكتى بيلىكتە, مينيسترلىكتەردە ەستيتىن قۇلاق بولۋى ءتيىس. بارلىق دامىعان ەلدە, ءتىپتى ۇلكەن كورپوراتسيالاردا قوعاممەن بايلانىس دەپارتامەنتى بار. دەمەك, ءبىز قوعامداعى بارلىق پروبلەمانى ءسۇزىپ الىپ, سوعان ساي قىزمەت ەتۋىمىز قاجەت, — دەدى ول.