دەپۋتات ەرمۇرات ءباپي مەن ايدوس سارىمعا رەسەيگە كىرۋگە تىيىم سالىنعان – باق

بىرنەشە قازاقستاندىق دەپۋتات پەن قوعام بەلسەندىسىنە رەسەي فەدەراتسياسىنىڭ اۋماعىنا كىرۋگە تىيىم سالىندى. بۇل تۋرالى qandastar.kz سايتى DW باسىلىمىنا سىلتەمە جاساپ حابارلايدى.

رەسەي دە ەلگە كىرۋگە تىيىم سالىنعان تۇلعالاردىڭ ءتىزىمى بار ەكەن. ولاردىڭ قاتارىندا ساياساتتانۋشى دوسىم ساتپاەۆ پەن ديماش ءالجانوۆ, قوعام بەلسەندىلەرى مۇحتار تايجان مەن توعجان قوجالى, ماجىلىسمەندەر ەرمۇرات ءباپي مەن ايدوس سارىم بار. Deutsche Welle باسىلىمىنا پىكىر بىلدىرگەن ايدوس سارىم 2021 جىلى دا رەسەيگە كىرۋگە قاتىستى ماسەلە تۋىنداعانىن ايتتى.

ء«بىزدىڭ دەلەگاتسيا بريۋسسەلگە كونفەرەنتسياعا قاتىسۋ ءۇشىن ماسكەۋ ارقىلى ءۇشتى. رەيستەردىڭ اراسى 9 ساعات بولعاندىقتان, رەسەيدەگى قازاقستان ەلشىلىگى ماسكەۋدەگى شاراعا قاتىسۋدى ۇسىندى. بىراق ديپلوماتيالىق پاسپورتتىڭ بارىنا قاراماستان, مەنى قالاعا كىرگىزبەدى. دەلەگاتسيا ءوتىپ, مەن قالىپ قويدىم. تولقۇجات باقىلاۋ ايماعىندا ۇزاق ۋاقىت وتكىزىپ, ەلشىنى شاقىردىق. ءتىپتى فقب وفيتسەرى كەلدى. ول ماعان «نون گرات تۇلعاسى» ەكەنىم جازىلعان قاعاز ۇسىندى. ەلگە كىرۋگە نە ءۇشىن تىيىم سالىنعانىن تۇسىندىرمەدى, تەك ەسكەرتۋ. ەگەر تاعى دا ەرەجەنى بۇزسام, 8 جىلعا دەيىن سوتتالۋىم مۇمكىن», – دەدى ول.