جاڭالىقتار
دەپۋتات ىشىمدىككە تىيىم سالۋدى ۇسىندى
فوتو: اشىق دەرەككوز
ءماجىلىس دەپۋتاتى ارداق نازاروۆ تۇركىستان قالاسىندا ىشىمدىك ىشۋگە تىيىم سالۋدى ۇسىندى, دەپ جازدى qandastar.kz
دەپۋتات وسىدان 1-2 جىل بۇرىن تۇركىستاندا بولعانىن جەتكىزدى.
تۇركىستان – رۋحاني استانامىز. تۇركىستان – اراقسىز قالا. وسى زاڭنىڭ اياسىندا تۇركىستاندا اراق ىشۋگە, ساتۋعا, اراق ءىشىپ, ء«لايلىپ» كوشەدە جۇرۋگە تىيىم سالساق. سەبەبى تۇركىستان رۋحاني استانامىز بولعاندىقتان, بۇكىل قازاق وسى جەردەن رۋح الۋى كەرەك. ول جەردە ءبىزدىڭ بابالارىمىز, اۋليە, باتىر, بيلەرىمىز جاتىر. شەتەلدەن كوپ قوناق كەلگەندە ءبىزدىڭ ازاماتتارىمىز ءىشىپ الىپ, الدىنان شىعاتىن بولسا, ۇيات قوي. وسى زاڭنىڭ اياسىندا «اراقسىز قالا», «رۋحاني قالا» دەپ اراققا تىيىم سالۋعا بولا ما?, – دەدى ارداق نازاروۆ.
ءماجىلىستىڭ جالپى وتىرىسىنا قاتىسقان تۇركىستان وبلىسى اكىمىنىڭ ورىنباسارى بەيسەنباي تاجىباەۆتىڭ ايتۋىنشا, ايماقتا «ىشىمدىكسىز اۋىل» دەگەن ارنايى جوبا بار.
وسى جوباعا ءبىزدىڭ وبلىس بويىنشا 30-دان استام اۋىل قوسىلىپ وتىر. بۇل باستاما بويىنشا تۇركىستان قالاسىندا دا جەرگىلىكتى زيالى قاۋىممەن, اقساقالدارمەن, ءارتۇرلى قوعام بەلسەندىلەرىمەن تالقىلاۋلار وتكىزىلدى. دەگەنمەن تۇركىستاننىڭ نەگىزگى رۋحاني-مادەني باعىتىمەن قاتار, تۋريستىك باعىتتاعى قالا رەتىندە دە تاڭدالىپ, بەكىتىلىپ وتىر. سوعان سايكەس بيزنەس قاۋىمداستىقتىڭ وكىلدەرى تاراپىنان بۇل ماسەلەگە دە ءتۇرلى كوزقاراسى بار. اتالعان ماسەلە دە ورىندى. الداعى ۋاقىتتا زاڭ جوباسى قابىلدانىپ جاتقاننان كەيىن بۇل ماسەلەنى دە ءتيىستى زاڭ نورمالارى اياسىندا قاراستىرۋ قاجەت دەپ سانايمىز, – دەدى وبلىس اكىمىنىڭ ورىنباسارى.
