Depýtat ishimdikke tyıym salýdy usyndy

Foto: ashyq derekkóz

Májilis depýtaty Ardaq Nazarov Túrkistan qalasynda ishimdik ishýge tyıym salýdy usyndy, dep jazdy qandastar.kz

Depýtat osydan 1-2 jyl buryn Túrkistanda bolǵanyn jetkizdi.

Túrkistan – rýhanı astanamyz. Túrkistan – araqsyz qala. Osy zańnyń aıasynda Túrkistanda araq ishýge, satýǵa, araq iship, «láılip» kóshede júrýge tyıym salsaq. Sebebi Túrkistan rýhanı astanamyz bolǵandyqtan, búkil qazaq osy jerden rýh alýy kerek. Ol jerde bizdiń babalarymyz, áýlıe, batyr, bılerimiz jatyr. Shetelden kóp qonaq kelgende bizdiń azamattarymyz iship alyp, aldynan shyǵatyn bolsa, uıat qoı. Osy zańnyń aıasynda «araqsyz qala», «rýhanı qala» dep araqqa tyıym salýǵa bola ma?, – dedi Ardaq Nazarov.

Májilistiń jalpy otyrysyna qatysqan Túrkistan oblysy ákiminiń orynbasary Beısenbaı Tájibaevtyń aıtýynsha, aımaqta «Ishimdiksiz aýyl» degen arnaıy joba bar.

Osy jobaǵa bizdiń oblys boıynsha 30-dan astam aýyl qosylyp otyr. Bul bastama boıynsha Túrkistan qalasynda da jergilikti zııaly qaýymmen, aqsaqaldarmen, ártúrli qoǵam belsendilerimen talqylaýlar ótkizildi. Degenmen Túrkistannyń negizgi rýhanı-mádenı baǵytymen qatar, týrıstik baǵyttaǵy qala retinde de tańdalyp, bekitilip otyr. Soǵan sáıkes bıznes qaýymdastyqtyń ókilderi tarapynan bul máselege de túrli kózqarasy bar. Atalǵan másele de oryndy. Aldaǵy ýaqytta zań jobasy qabyldanyp jatqannan keıin bul máseleni de tıisti zań normalary aıasynda qarastyrý qajet dep sanaımyz, – dedi oblys ákiminiń orynbasary.