Depýtat Qazaqstanda áıelder úshin jumys kúnin qysqartýdy usyndy

Foto: Májilis

Májilis otyrysynda depýtat Qaraqat Ábden premer-mınıstrge saýal joldap, elde áıelder úshin qysqartylǵan jumys kúnin engizý máselesin usyndy. Bul týraly qandastar.kz Stan.kz aqparat agenttigine silteme jasap habarlaıdy.

Depýtattyq saýalda “Aýyl” frakııasynyń depýtaty keıingi jyldary aýdan ákimi qyzmetine taǵaıyndalǵan áıelder sany 8% artqanyn aıtty. Degenmen bılikte áıelderdiń sanyn kóbeıtý úshin júıeli ózgerister kerek deıdi.

“2023 jyly memlekettik qyzmettegi áıelderdiń úlesi 55,7% bolsa, basshylyq qyzmettegilerdiń úlesi nebári 20,3%. Táýelsizdik alǵaly saıası laýazymda otyrǵan áıelderdiń úlesi 15%-dan asqan emes. IPU Parline reıtıngine súıensek, Qazaqstan saıasattaǵy áıelderdiń úlesi boıynsha 183 eldiń ishinde 124-orynda. Bul kórsetkish boıynsha О́zbekstan aldyńǵy orynda. Bul elde byltyr parlament saılaýy ótip, parlamenttiń zań shyǵarýshy palatasynda áıelderdiń úlesi 38% bolǵan. Al Qazaqstanda aımaqtardaǵy máslıhattaǵy áıelderdiń úlesi 21%. Biraq aımaqtarda kórsetkish ártúrli. Mysaly, Túrkistan oblysynda 21% ǵana. Al kvazımemlekettik sektorda negizgi laýazymdaǵy erler sany áli de basym”, – dedi Qaraqat Ábden.

Májilismen oblystyq ákimdikterde basshylyq qyzmettegi áıelderdiń úlesi tek 10% ekenin aıtyp, barlyq oblysty erler basqaratynyn alǵa tartty. Áıelder orynbasar qyzmetine taǵaıyndalyp, negizgi “jumys kúshine” aınalǵan eken.

“Joǵaryda aıtylǵandardy eskere otyryp, úkimetti áıelderdiń kóshbasshylyǵyn damytýǵa kómektesetin sharalar qabyldaýǵa shaqyramyn. Aldymen, basshylyq qyzmetke áıelderdiń qatysýyn arttyrý maqsatynda genderlik teńdik máseleleri boıynsha ulttyq baqylaý jáne esep júıesin qurý kerek. Sózsiz áıelderdi basshylyq laýazymǵa taǵaıyndaý tek olardyń biliktiligine súıene otyryp júzege asýy kerek. Ekinshiden, memlekettik qyzmet pen kvazımemlekettik sektordyń barlyq deńgeıinde áıelder kóshbasshylyǵy ulttyq baǵdarlamasyn engizý qajet. Úshinshiden, Skandınavııa elderiniń tájirıbesine súıene otyryp áıelder úshin qysqartylǵan jumys kúnin engizý múmkindigin qarastyrý kerek. Bul otbasy ınstıtýtyn damytýǵa kómektesip, jumys isteıtin áıelder bala tárbıesine kóbirek kóńil bóle alady”, – dep usyndy ol.

Sondaı-aq depýtat táýlik boıy jumys isteıtin balabaqshalar ashyp, jumys oryndarynda balalar bólmesin jabdyqtaý kerek deıdi.

“Aqyly dekret demalysyn merzimin 2 jylǵa deıin uzartý kerek. Sonymen qatar jumys ornynda áıeldi qorǵaý jáne kemsitýmen kúres maqsatyndaǵy quqyqtyq jumystardy kúsheıtken jón”, – dep túıindedi ol.