دەپۋتات قازاقستاندىقتاردىڭ كىتاپ وقۋعا قانشا ۋاقىت جۇمسايتىنىن ايتتى

فوتو: اشىق دەرەككوز

ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى نۇرسۇلتان بايتىلەسوۆ قازاقستاندىق وقۋشىلاردىڭ وقۋ ساۋاتى تومەندەگەنىنە قاتىستى الاڭداۋشىلىعىن ءبىلدىردى. دەپۋتات ەلىمىزدە كىتاپ وقۋ مادەنيەتىن دامىتۋ قاجەت ەكەنىن ايتىپ, پرەمەر-ءمينيستردىڭ ورىنباسارى ەرمەك كوشەرباەۆقا ساۋال جولدادى, – دەپ حابارلايدى qandastar.kz

ءماجىلىس دەپۋتاتى ادامي كاپيتالدى دامىتۋ جولىندا كىتاپ وقۋ مادەنيەتىن دامىتۋ ستراتەگيالىق باسىمدىق ەكەنىن ايتىپ, وسى باعىتتا ءتيىمدى ساياسات جۇرگىزىپ كەلە جاتقان ەلدەردى مىسالعا كەلتىردى.

– 2024 جىلى ەڭ كوپ كىتاپ وقيتىن مەملەكەتتەر قاتارىندا اقش, ۇلىبريتانيا, فرانتسيا جانە يتاليا بار. ازيادا قىتايلىقتار جىلىنا 154 ساعات, جاپوندار 135 ساعات, كورەيلەر 125 ساعات كىتاپ وقۋعا ارنايدى ەكەن. قازاقستاندا بۇل كورسەتكىش – نەبارى 65 ساعات, – دەپ ناقتىلادى دەپۋتات.

بايتىلەسوۆتىڭ ايتۋىنشا, PIRLS-2021 حالىقارالىق زەرتتەۋىندە قازاقستاندىق وقۋشىلاردىڭ وقۋ ساۋاتى ورتاشا دەڭگەيدە بولعانىمەن, 2016 جىلمەن سالىستىرعاندا 32 بالعا تومەندەگەن.

– مۇنىڭ سەبەپتەرى – قىزىعۋشىلىق ءىس-شارالاردىڭ از ۇيىمداستىرىلۋى جانە تسيفرلىق ءداۋىردىڭ ىقپالى. قىسقاشا فورماتتاعى كونتەنتكە ۇيرەنگەن كوپشىلىك ينتەرنەتتە ورتا ەسەپپەن نەبارى 55 سەكۋند قانا وقۋعا ۋاقىت بولەدى. بۇل تەرەڭ ويلاۋ مەن ءبىلىمدى دامىتۋعا جەتكىلىكسىز.

ەلىمىزدەگى كىتاپحانالاردىڭ جاي-كۇيى دە وزەكتى ماسەلە كۇيىندە قالىپ وتىر. ماتەريالدىق-تەحنيكالىق بازا مەن كىتاپ قورلارى جاڭارتۋدى قاجەت ەتەدى, ال زاماناۋي فورماتتاعى كىتاپحانالار – ساناۋلى. كوپ جەردە وقىرماندار ءۇشىن جايلى ورتا, كوۋوركينگ ايماقتارى مەن تسيفرلىق قىزمەتتەر جەتكىلىكسىز, – دەپ قوستى نۇرسۇلتان بايتىلەسوۆ.

وسى رەتتە دەپۋتات بىرقاتار دامىعان ەلدەردىڭ تاجىريبەسىنە توقتالىپ, قازاقستاندا دا ۇقساس فورماتتاعى ساباقتار مەن داستۇرلەردى ەنگىزۋ قاجەت ەكەنى ايتتى.

ءماجىلىس دەپۋتاتى ەلىمىزدە كىتاپقا قىزىعۋشىلىق مادەنيەتىن دامىتۋ ماقساتىندا مىناداي شارالاردى ۇسىندى:

• بىرىنشىدەن, بارلىق وقۋ ورىندارىندا عىلىمي نەگىزدەلگەن وقۋ ادىستەرىن ەنگىزىپ, ءتيىمدى كىتاپ وقۋ تاسىلدەرىن ناسيحاتتايتىن رەسۋرستاردى دامىتۋ.
• ەكىنشىدەن, كىتاپحانالار جەلىسىن جاڭعىرتىپ, زاماناۋي ينفراقۇرىلىم قالىپتاستىرىپ, تۇراقتى تۇردە «كىتاپ اپتالىعى», «ءبىر ەل – ءبىر كىتاپ» سياقتى جوبالاردى وتكىزۋ ارقىلى ەلدىڭ نازارىن كىتاپ وقۋعا اۋدارۋ كەرەك.
• ۇشىنشىدەن, جەرگىلىكتى دەڭگەيىندە تۇرعىندار اراسىندا وقۋ سايىستارىن, ادەبي بايقاۋلار ۇيىمداستىرىپ, وقۋشىلار مەن ەرەسەكتەردىڭ قىزىعۋشىلىعىن ارتتىرۋ قاجەت.

– پرەزيدەنت قاسىم-جومارت توقاەۆتىڭ: «وزىق ويلى ۇلت بولۋدىڭ ەڭ توتە جولى – كىتاپ وقۋ» دەگەن ءسوزىن ەسكەرە وتىرىپ, كىتاپ وقۋ مادەنيەتىن ۇلتتىق دەڭگەيدە قولداۋدىڭ جاڭا مودەلىن قالىپتاستىرۋ كەرەك دەپ ەسەپتەيمىن, – دەدى دەپۋتات.

ءسوز سوڭىندا نۇرسۇلتان بايتىلەسوۆ ۇسىنىستاردى قاراستىرىپ, كىتاپ وقۋ مادەنيەتىن دامىتۋ بويىنشا ناقتى شارالار قابىلداۋدى سۇرادى.