دەپۋتات كولىگكتى 5 مينۋتتان ارتىق قىزدىرۋعا قاتىستى پىكىر ءبىلدىردى

فوتو: ءماجىلىس

ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى ەكاتەرينا سمىشلياەۆا قىستا تۇرعىن ۇيلەردىڭ جانىندا كولىگىن 5 مينۋتتان ارتىق قىزدىرىپ تۇراتىن جۇرگىزۋشىلەرگە ايىپپۇل سالۋ تۋرالى نورماعا قاتىستى پىكىر ءبىلدىردى. دەپۋتاتتىڭ ايتۋىنشا, مۇنداي نورما 20 جىلدان بەرى بار. سايكەسىنشە سمىشلياەۆا وسى ماسەلەگە قاتىستى تۋىنداعان داۋ-دامايدى «تەحنولوگيالىق حايپ» دەپ سانايدى, – دەپ حابارلايدى qandastar.kz 

ءماجىلىس دەپۋتاتى جول قوزعالىسى تۋرالى زاڭنىڭ قازىرگى رەداكتسياسىندا جازىلعان بۇل ەرەجەنىڭ كەي تۇستارى تۇسىنىكسىز ەكەنىن اتاپ ءوتتى.

«زاڭ شىعارۋشى رەتىندە اتالعان نورمانى تالداي كەلە, بۇل ەرەجەدە كەيبىر ماسەلەلەردىڭ ناقتىلانباعانىن اتاپ وتكەنىم ءجون. ماسەلەن, «ەلدى مەكەندەردە قوزعالتقىشى جۇمىس ىستەيتىن مەحانيكالىق كولىك قۇرالدارىنىڭ تۇراعىنا تۇرعىندارعا قولايسىزدىق تۋعىزعان جاعدايدا تىيىم سالىنادى» دەلىنگەن. بۇل جەردە قولايسىزدىق تۋدىردى دەپ كىمدى نەمەسە نەنى كىنالاۋعا بولادى? جاعىمسىز ءيىسى بار كولىكتەن شىعاتىن گازدى ما? الدە تۇنگى ۇشتە ەلدى ءتاتتى ۇيقىسىنان وياتاتىن قوزعالتقىشتىڭ داۋىسىن با? بولماسا كورشىمىزگە كولىگىڭىزدى ءۇيدىڭ جانىنا قويماڭىز دەيمىز بە? ياعني, ونىڭ ەلگە كەدەرگى كەلتىرىپ جاتقانىن قالاي انىقتايمىز? حالىقتىڭ ارىز تۇسىرگەنىن كۇتىپ وتىرامىز با? ول ارىز قانداي تالاپتار بويىنشا قابىلدانادى?», – دەيدى ەكاتەرينا سمىشلياەۆا.

سمىشلياەۆانىڭ ايتۋىنشا, تۇرعىندارعا كەدەرگى كەلتىرگەن كولىك جۇرگىزۋشىسىنە قالاي شاعىمدانۋ كەرەك ەكەنى دە تۇسىنىكسىز.

وسىعان بايلانىستى دەپۋتات بۇل ماسەلەنىڭ بىرنەشە شەشىمىن ۇسىندى.

• جاۋاپقا تارتۋ ءتارتىبى (قولايسىزدىق تۋىنداعانى جونىندە تۇرعىنداردىڭ نەگىزدەلگەن ءوتىنىشى بولعان جاعدايدا عانا);
• قولايسىز جاعدايلارعا نەنى جاتقىزۋعا بولاتىندىعىن ناقتىلاۋ;
• شاعىمنىڭ نەگىزدى بولۋى ءۇشىن ناقتى تالاپتاردى انىقتاۋ.

سونداي-اق ءماجىلىس دەپۋتاتى وسى ماسەلەنى شەشۋگە بايلانىستى كوپشىلىكتىڭ ۇسىنىستارىن قابىلداۋعا دايىن ەكەنىن جەتكىزدى.